Учесникот на регионалниот шоу-програм „Коктел Мастер - Бадел Мастерклас“ – Давид Давидовиќ, успеа да го воодушеви жирито и со мнозинство гласови беше прогласен за „Master of Mixology“.

Нè интересираше какво е чувството да се биде победник, а Давид тоа ни го објасни на свој начин:

– Искрено, и мене ме интересираше какво е чувството, па решив да дадам сè од себе за да победам. Се чувствувам како целата напорна работа, експериментирање и долги ноќи во бар, конечно се исплатиле. Чувството е прекрасно, а честа уште поголема да се биде број еден на Балканот, според Бадел Мастерклас. Кога ги гледам епизодите, постои огромен наплив на емоции, адреналин и секако длабоко чувство на гордост, посебно што покрај толку многу искусни и подготвени бармени, јас успеав да одговорам на сите предизвици и да го освојам првото место. Со оглед на тоа дека снимањето се одвиваше пред една година и требаше да држиме тајна до емитувањето на шоуто, сега искрено ми е многу полесно – изјави Давид.

Фото: Бадел Мастерклас

„Тоа е најскапиот коктел на Балканот“

Како често победниците не се свесни што им се случува, го прашавме дали претчувствувал дека нешто вакво може да се случи?

– Сигурен сум дека желбата постои кај секој натпреварувач и со таа цел се пријавуваме. Јас влегов со амбиција за успех, но искрено, на почетокот не размислував за прво, второ или трето место, едноставно сакав да си докажам на себе колку можам и колку вредам. Ги ставив конкуренцијата и камерите на страна и решив да одам напред чекор по чекор – максимално фокусиран и посветен, стигнав таму каде што сите посакуваат – изјави тој за порталот на Канал 5.

Со сите колеги имал одлична соработка, но не интересираше кој најмногу му помогна за време на натпреварот:

– Нормално дека меѓу нас, колегите од Македонија – Вања, Љупчо и Дарко – си бевме голема поддршка. Истото можам да го кажам и за колегите од другите држави. Иако сите настапувавме како поединци, сепак бевме како тим и владееше многу позитивна енергија. Си делевме совети, се бодревме едни со други – едноставно станавме фамилија, народски кажано, а тоа ми е посебно драго- изјави Давид за порталот на Канал 5.

Фото: Бадел Мастерклас

Рецептот за победничкиот коктел

– Единствено тој предизвик ни го кажаа кога дојдовме во Загреб – дека коктелот во финалето ќе биде со Антик пелинковец, без ограничување на време и состојки. Не размислував многу за рецептурата, се фокусирав на моменталните предизвици. Но, како се приближуваше финалето, притисокот растеше – бидејќи треба да се направи нешто уникатно. Тоа е најскапиот коктел на Балканот, како што велат од Бадел. Идејата ми беше да направам освежителен коктел со мој печат и печатот на Антик – што не беше лесно. Ризикував со повеќе вкусови, но сè беше добро избалансирано и ме донесе до посакуваниот резултат- изјави Давид.

Gentleman’s choice:

-Антик – 50 мл

-Ликер од портокал – 30 мл

-Италикус (ликер од бергамот) – 20 мл

-Сируп од ѓумбир – 10 мл

-Сируп од хибискус – 10 мл

-Свеж сок од лимон – 10 мл

-Stillabunt magic velvet – 3-4 капки

-Декорација: чили конци во форма на „А“

Фото: Бадел Мастерклас

Како ќе ја искористи наградата?

– Со оглед на тоа што некое време веќе не работам постојано во бар, додека не отворам свој, се одлучив да набавам пренослив бар за настани. Дел од наградата ја инвестирав во опрема за коктел кетеринг – нарачав професионален шанк за настани и целата потребна опрема. Во тек е и изработка на Инстаграм профил, каде што заинтересираните клиенти ќе можат да се информираат за нашите услуги. Секогаш професионални и посветени – каде што секоја приказна има свој коктел! Тоа за сега, а за понатака здравје,се гледаме во бар кај мене- заклучил Давид.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.