Додека обвинителство и МВР ги расветлуваат скандалозните случувања кои што ја вознемирија јавноста во кампот „есенски бакнежи, прегратки 2021“ Сојузот на извидници на Македонија веќе го презеде првиот чекор со тоа што го суспендираше првиот скопски извиднички одред. Како што соопштија од таму, ваквата одлука е донесена поради претпазливост и независност на активностите за расветлување на настанот. Дали ќе има евентуални дисциплински мерки, ќе одлучува собранието на сојуз апропо резултатите од мерките и дејствијата.
-Ја користиме оваа можност уште еднаш да осудиме и да се оградиме од било какви активности кои би можеле на било каков начин да се доведат во корелација со сексуално или било какво друго вознемирување на млади. Примарна цел на секој извиднички настан, независно од програмските активности, е учесниците на истиот да се чувствуваат безбедно и сигурно, велат од СИМ.
Во екот на предизборната камапња, скандалот најде место и во политиката.. Од ВМРО-ДПМНЕ обвинуваат дека град Скопје финансиски поддржал контроверзен извиднички камп, а градоначалникот Шилегов пак им одговори дека Скопје финансира бројни едукациски проекти и дека не можат да го предвидат текот на секој од нив.
- Залудно се трудеше Шилегов да ја одбегне одговорноста, скандалозниот камп и настаните кои се случиле се финансирани од Град Скопје и тоа јасно се гледа во овој документ, вели Митева.
- Ги замолувам ВМРО-ДПМНЕ, зборуваме за дечиња, за родителски грижи, срамота е да се користат тие емоции. Аман веќе да престанеме со такви политики. Апликацијата подразбира камп со средните училишта, ова е надвор од училиштата, вели Шилегов.
Од првиот скопски извиднички одред вчера соопштија дека овој камп традиционално се одржувал секоја година и дека настаните кои што се случувале се погрешно протолкувани или децата не ги разбрале игрите. Инволвираните во случајот беа повикани на разговор во полиција, а обвинителството и натаму ги истражува случувањата во овој камп.