Кандидатот на ВМРО-ДПМНЕ за градоначалник на Скопје – Орце Ѓорѓиевски преку социјалните мрежи сподели видео како од изутрна се собира сметот во неколку општини заедно со коалициски и кандидати од неговата партија. Ја повтори својата најава, дека по неговото евентуално стапување на функцијата, за 72 часа Скопје ќе биде исчистено.

-Од рано утринава со средување на состојбите поврзани со нефункционалноста на комунална хигиена овде во Кисела вода, во мојата општина, зад нас се наоѓа една од микролокациите која што е претворена во мини – депонија. Вака реагираме бидејќи комунална хигиена не ја работи својата работа и така ќе продолжиме уште наредните 10 дена, се до моментот, додека не ја преземеме градската власт и не ги средиме конечно состојбите таму, земајќи во предвид дека за 72 часа конечно ќе направиме Скопје да блесне,- Орце Ѓорѓиевски – Кандидат на за градоначалник на Скопје – ВМРО-ДПМНЕ.

„Фантастично беше што влеговме во вториот круг, фантастичното можеме да го очекуваме и понатаму“ – на овој начин ги посочи шансите за победа за Скопје кандидатот на Левица – Мециновиќ кој верува во победа. Вели, изборот е помеѓу кандидатот на скопјани и владиниот кандидат, односно Влада која, според него, со сметот прави театар од здравјето на граѓаните.

-Со оваа нова ситуација со ѓубрето, каде што сака да се прогласи кризна состојба со ѓубрето во Скопје, тоа значи дека секогаш можеле да ја направат, но очигледно е дека владата сакаше до крај да ги истроши скопјани, до самиот крај до пред избори за да прави театар од нивното здравје, токму тоа го прави владата и покажува дека деструктивна влада. Затоа ќе кажам дека следната недела ќе имаме јасен избор, помеѓу една уценувачка Влада и уценувачки владин кандидат кои ни велат ако не не изберете нема ништо да ви функционира, и имаме една опција обединувачка,- Амар Мециновиќ - Кандидат за градоначалник на Скопје – Левица .

Се огласија денеска и кандидатите за Карпош – Јакимовски и Лукровски. Кандидатот на „Искуство за успех“ најави реконструкција на улици и победа, кандидатот пак на ВМРО-ДПМНЕ преку социјалните мрежи посочи дека борбата станува се пожестока и дека е предмет на закани.

-Противкандидатот води со мала предност, минатиот пат, Душко Весовски беше многу посилен кандидат, водеше со 2700 гласа разлика, таа разлика ја надоместивме, очекувам граѓаните на Карпош, односно сите опозициони сили да ме поддржат за вториот круг, затоа што имаме програми, имаме резултати,- Стевчо Јакимовски.

-Борбата ќе станува се пожестока, знаеме сите со кого се судруваме, знаеме со кого си имаме работа, нема веќе завиткани ракави, да си кажеме се што имаме да кажеме, да знаат граѓаните со кого се соочуваат. Денеска пред да дојдам тука, веќе имам дојава за закани на луѓе кои се блиски до мене од локали бизниси. После ова, сето кога ќе заврши некој ќе мора да сноси одговорност,- Сотир Лукровски.

„Не би го коментирал вториот круг, не денеска“ – порача кандидатот и актуелен градоначалник на Центар – Герасимовски. Вели целиот фокус е на надминување на опасната ситуација со сметот, која како што вели е предизвикана од несобирањето на сметот на КХС. Неговиот противкандидат од ЗНАМ – Лабудовиќ кој беше со Ѓорѓиевски на терен, најави субвенции за учениците за лап топ или таблет.

Кампањата денеска ја продолжи и кандидатот на ВРЕДИ за Тетово – Касами, кој најави продолжување на проектите кои според него го подобриле животот во градот.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.