Дијана Коцева Миланова, лекар на вакциналниот пункт, вели дека во изминатите пет дена само на овој пункт се имунизирани над 4.600 граѓани.
– Само денеска до 12 часот имаме аплицирано 500 вакцини. Дел од вакцините, кои изминатите пет дена ни пристигнаа на пунктот, се дадени и на Здравствените домови во општините од штипскиот и струмичкиот регион, каде што се вакцинираат повозрасните граѓани, со цел да не патуваат до регионалниот пункт, вели Коцева-Миланова.
Со новите вакцини, наредните денови ќе се имунизираат и вработените од критичната инфраструктура од општините од штипскиот и струмичкиот регион, како и лицата кои имаат добиено термини. Вработените во најголемото штипско основно училиште „Ванчо Прќе" денеска имаат закажани термини за имунизација.
Таа додава дека претпладнево паднал системот на „Мој термин", застојот на имунизацијата на пунктот, како и на останатите во земјава бил од 40 минути до еден час. Откако системот повторно профункционирал без застој и проблеми се одвива имунизацијата. /МИА