Македонија

Пристигна хеликоптер за гасење пожари од Романија, а се очекува и авион „Херкулес 530"

Помошта ќе биде распределена таму каде што е најкритично, соопшти денеска на прес-конференција помошник-раководителот на Секторот за операции и координација при Центарот за управување со кризи, Марија Милкова.

„Канадер Т21", специјализиран хеликоптер за гасење пожари пристигна од Романија, а напладне се очекува и авион „Хекрулес 530", кој е со најсовремена опрема, носи придружна противпожарна опрема, пожарникари и други пропратни материјално-технички ресурси за гасење пожари. Помошта ќе биде распределена таму каде што е најкритично, соопшти денеска на прес-конференција помошник-раководителот на Секторот за операции и координација при Центарот за управување со кризи, Марија Милкова.

Раководителот на Секторот за операции и координација при Центарот за управување со кризи, Горан Стојановски појасни дека авионот „Хекрулес 530" е товарен и е прилагоден дополнително за гасење на пожари.

– Се работи за специјализиран авион, за специјализирана намена кој со себе носи материјално-технички ресурси, носи луѓе, пожарникари и шесттонски кеси наполнети со вода и при летањето на подрачјето кое му се задава како координати за активен пожар тие се хидраулични и во форма на падобран бомба се концентрираат на пожарното дејствие каде практично е изворот на жариштето на пожарот. Тоа се големи авиони, нормално во координација со ВИНГ-от и со Генералштабот, нагласи Стојановски.

Тој потенцира дека оперативниот центар денеска ќе се одлучи од каде овој авион ќе се полни со вода, имајќи предвид дека со правилата на УНЕСКО тоа е забрането на Охридското Езеро.

– Имаме две можности – Преспанско Езеро и уште едно од поголемите вештачки езера, така што денеска ќе одлучиме како тоа ќе се врши и верувам дека денеска во 17 часот во пресекот на денот ќе имаме јасна информација за начинот и процесот и постапката на негово дејствување, рече Стојановски.

Тој рече дека верува оти со овие материјално-технинчки средства и летала кои навистина се користат за оваа намена, за големи пожари и ќе бидат добредојдени со оглед на временските педиспозиции кои се очекуваат – сончево, топло време и можноста од дополнителен развој на ситуацијата со дополнителни пожари многу ќе придонесе за да можат со нив да се справат.

Во врска со состојбата со пожарите Стојановски посочи дека во моментот Пехчево е најкритично.

– Утрово имавме добра температура од 9 степени која на некој начин дозволи сите хеликоптери да се кренат и да дејствуваат во тој правец. Тоа е Пехчевско-беровскиот регион затоа што пожарот и дејствијата на пожарот се одвиваат во таа насока. Сите материјално-технички ресурси и голем број човекови ресурси се во правец Пехчево – Берово, додека другата сила материјално-техничка и ресурси човекови се концентрирани во појасот на Делчево кон Разловци, затоа што во можност да се дејствува што повеќе за да се спречи пожарот да избие кон Берово, односно кон Голак, истакна Стојановски.

Во Штип, потенцира, има повторно реактивирање на пожарот во Криви Дел и таму се 35 војници и противпожарни екипи, а таму се и дел од Шумско стопанство кои повторно дејствуваат. Тој појасни дека теренот на кој е пожарот е многу непристапен.

– Имаме мака во тој дел, и кон Кадрифаково, тоа е на граница меѓу Штип и Свети Николе. Во Прилепско има два пожари. Едниот пожар е сосема под контрола и нема никаков проблем. но вториот пожар што е под Плетвар. Малку потежок заради непристапноста на теренот и во овој момент дејствуваат се додека е вакво времето, температурата е во ред за да може да се дејствува. Меѓутоа, оној непристапен терен не дозволува во моментот да можете со сите капацитети и сили да дејствувате. Се држи под контрола. Се договоривме со градоначалникот да видиме во текот на денот ако има потреба најверојатно ќе интервенираме и со летало. Ќе видиме какви насоки ќе добиеме, додаде Стојановски./МИА

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Фудбал

Кристијано Роналдо се огласи по збогувањето на Меси: Никој не ги очекуваше овие зборови...

Лионел Меси се прости од аргентинската репрезентација со емотивна порака по својот последен настап во дресот на „Гаучосите“, а набрзо потоа и Кристијано Роналдо ја коментираше неговата објава.

Еден од најдобрите свтески фудбалери во историјата, волшебникот со буба мара Лионел Меси се прости од аргентинската репрезентација со емотивна порака по својот последен настап во дресот на „Гаучосите“, а набрзо потоа и Кристијано Роналдо ја коментираше неговата објава.

Аргентинецот се осврна на својата репрезентативна кариера и призна дека веќе му недостига носењето на славниот сино-бел дрес.

„Вчера го одиграв последниот натпревар и веќе ми недостига сино-белиот дрес. Знам дека ја носам вистинската одлука. Тоа беше неверојатно патување, исполнето со радост и некои тажни моменти, но целосно сум убеден дека вредеше за секој чекор“, напиша Меси.

Тој особено им се заблагодари на своето семејство, пријателите, соиграчите и тренерите кои беа покрај него во текот на кариерата, но не го заборави ниту Диего Марадона.

„Не сакам да го заборавам Диего, кој ја издигна нашата земја таму каде што заслужуваше да биде и кој – како што секогаш велам – беше со нас на секој чекор, овде со нас, но и од небото“, рече Меси. Во емотивна порака, тој им се заблагодари на клубовите за кои настапуваше, како и на Бога, а на крајот повторно им се обрати на навивачите. „Ве сакам многу, ќе ми недостигате и засекогаш ќе бидам благодарен што бевте со нас – и со мене“, заклучи Меси.

А потоа уследи реакција што привлече посебно внимание. Под објавата на Меси се огласи Кристијано Роналдо, неговиот долгогодишен ривал од ерата што го одбележа светскиот фудбал.

„Лео, толку многу години во одбрана на твојата земја и историја што ќе остане засекогаш. Целосна почит за она што го постигна со Аргентина. Поздрав“, напиша Роналдо.

Меси ја заврши кариерата во националниот тим по финалето на Светското првенство во 2026 година, во кое Аргентина загуби од Шпанија со 0:1.

Сепак, тој се прости од репрезентацијата и на ревијалниот натпревар против Бенин, на кој Аргентина победи со 3:0. Двајцата беа најголеми ривали во светскиот фудбал повеќе од 15 години, но пораката на Роналдо уште еднаш покажа дека големото ривалство на теренот не мора да значи и недостаток на почит надвор од него.

Тагови: Кристијано Роналдо Лионел Меси

Македонија

„НаТочак“: Решението за БРТ не смее да биде на сметка на пешаците и велосипедистите

„НаТочак“ бара јавноста да го види целото решение пред да започне деталното проектирање на системот што ќе ги промени главните скопски булевари

Воведувањето на БРТ може да биде важен чекор за Скопје, но не смее да се претвори во изолиран проект за автобуски траси, туку треба да биде дел од интегриран систем со железницата, останатиот автобуски превоз, пешачењето и велосипедизмот, предупредува „НаТочак“.

Иницијативата на 2 октомври достави допис до Град Скопје и ЈСП (целосен текст достапен на линкот) со низа предлози за проектот. Причината за дописот, велат, е што БРТ нема само да пренамени 2 автомобилски во 2 автобуски ленти, туку ќе го промени целокупното сообраќајно решение на дел од главните булевари (пресек на булеварите, подземни инсталации, крстосници).

Еден од најголемите ризици што го посочуваат е начинот на кој ќе се распредели ограничениот простор.

Булеварот „Јане Сандански“, со профил од околу 60 метри, овозможува различни решенија. Но, „Партизански одреди“, „Климент Охридски“, „Кочо Рацин“, „11 Октомври“ и „Кузман Јосифовски-Питу“ се значително потесни, 30, 40, максимум 50 метри и ја немаат истата комоција.

„Концептот треба да почне од најслабите точки“, сметаат од „НаТочак“, односно од делниците каде просторот е најограничен, за да се избере решение со најмалку штета за останатите видови транспорт.

Особено го проблематизираат решението на „Партизански одреди“, каде во делот кај Буњаковец и Архитектонскиот факултет пешачките и велосипедските површини се со искористен капацитет и веќе се на граница на функционалност.

Според „НаТочак“, доколку таму дополнително се намалат тротоарите за да се обезбеди простор за новиот концепт, пешаците и велосипедистите би можеле да бидат ставени во меѓусебен конфликт.

„Пешачкиот и велосипедскиот сообраќај не се споредна инфраструктура во однос на БРТ. Тие се дел од истиот систем на одржлив транспорт и директно го хранат БРТ“, велат од иницијативата. „Само заедно со таков пакет можеме да дадеме алтернатива на автомобилската доминација“.

Од „НаТочак“ посочуваат дека времето на патување со јавен превоз не е само времето поминато во автобус. Во него влегува и времето потребно за пешачење (или возење велосипед) до станицата, преминување улици и трансфер од една линија на друга.

Затоа бараат станиците на БРТ да бидат добро поврзани со другите автобуски линии и железницата, со кратки и безбедни пешачки врски, усогласени возни редови и интегриран билетен систем.

Десни или леви врати - прашање што го менува целиот профил

Една од клучните дилеми е и позицијата на БРТ во сообраќајниот профил и типот на врати на возилата.

Решението автобусите на БРТ да се движат во најлева лента, а да бидат со десни врати може да има предности, но, според „НаТочак“, мора да се пресмета и што ќе чини тоа решение во простор: нови или проширени жардињери, двојни станици, преместување инсталации (атмосферска, гасовод, топловод…) и можни интервенции во постојните велосипедски и пешачки површини.

Од друга страна, централното поставување на станиците или користењето леви или двојни врати може да има поголеми трошоци за автобусите, но и да овозможи подобро искористување на ограничениот простор и помали трошоци за градежни работи.

Кое решение е подобро, велат, не треба да се одлучува само по принцип „што е подобро за постојните автобуси“, туку врз основа на конкретни податоци за времето на патување, трошоците и последиците врз целиот сообраќаен систем, oсобено пешачката и велосипедската инфраструктура.

Од иницијативата бараат да се објават и различните разгледувани варијанти (повеќе од 2-те кои ги илустрираат), предностите и недостатоците на секоја од нив, како и критериумите според кои е избрана сегашната варијанта и како таа се бодува според меѓународните стандарди.

БРТ како можност за подобар град

„НаТочак“ бара во проектот да се предвидат и услови за идниот развој на системот - меѓу другото, можност БРТ коридорите во иднина релативно лесно да се адаптираат за трамвајски превоз, а сите улици кои се планираат за градежни работи (како на пр. „Цветан Димов“) од старт да ги земат предвид барањата за втората БРТ линија, а не да се прекопува за неколку години.

Бараат и БРТ да има приоритет на семафорите, да се решат конфликтите со останатиот сообраќај и да се обезбеди универзална пристапност на станиците, тротоарите и премините.

Посебно внимание посветуваат на јавниот простор околу станиците, кој според нив не треба да биде само место за влез и излез од автобус, туку квалитетен простор со зеленило, сенка, места за седење, вода, информации и безбедни паркинзи за велосипеди.

Сепак, најголемото барање е транспарентност.

Од „НаТочак“ велат дека јавноста сè уште нема можност да го види целосното избрано решение, туку главно располага со изјави и неофицијални визуелни материјали.

„Не е доволно јавноста да добие само една сликичка од решението и усни раскажувања“, велат од иницијативата, барајќи да се објават напречните профили, анализите, алтернативите и податоците врз основа на кои е избрана конкретната варијанта.

За проект од ваков обем, сметаат, јавната дебата не треба да се случи откако решенијата веќе ќе бидат донесени.

„Ако еден мал ДУП кој засега стотина жители заслужува јавна презентација и анкета, уште повеќе тоа го заслужува проект кој засега стотици илјади жители на Скопје“, велат од „НаТочак“.

Од иницијативата нагласуваат дека не се против БРТ и дека нивната цел е системот да биде успешен и долгорочно функционален.

„БРТ треба да се искористи како можност Скопје да добие интегриран, пристапен и одржлив транспортен систем, а не само нова автобуска инфраструктура. Развојот на БРТ мора да биде пропратен со развој на пешачката и велосипедската инфраструктура, а не нивна деградација“.

Македонија

Движењето ЗНАМ за Наша Македонија: Кој е вистинскиот став на СДСМ за Барутана?

Очигледно е дека во СДСМ постои сериозна неусогласеност на ставовите за Барутана.

Претседателот на СДСМ Венко Филипче јавно порача, дека додека тој е лидер на партијата, во Барутана нема да се стави ниту една цигла.

Во истовреме спорниот нацрт ДУП за Барутана беше донесен пред Советот на Општина Центар и доби поддршка токму од Советниците на СДСМ.

Кој е вистинскиот став на СДСМ за Барутана?

Еден пред јавноста, а друг кога треба да се гласа.

Советниците на Движењето ЗНАМ за Наша Македонија,во Советот на Општина Центар имавме јасен став, гласавме против и остануваме доследни на тој став.

Ако лидерот на СДСМ вели денеска дека „Нема да се стави ниту една цигла“, тоа да не остане само уште една политичка изјава и дека се на истата линија со потпредседателот на СДСМ и актуелен Градоначалник на Општина Центар, Горан Герасимовски.

Затоа денес бареме од Градоначалникот Горан Герасимовски да направи конкретен чекор.

Граѓаните на Центар не барат ниту политички, ниту партиски координации, ниту празни ветувања.

Бараат јасна постапка.

Бараме Филипче, Герасимовски и советниците на СДСМ, во Советот на Општина Центар да ги усогласат ставовите и во интерес на граѓаните кои ги гласале, да се повлече нацрт ДУП-от за Барутана.