Атмосферата на расправата за гласање недоверба на владата на Ципрас зовре, откако пратеникот на Златна зора Константинос Барбарусис од говорницата ја повика војската да ги уапси грчките лидери за предавство на националните интереси и повика на нивна јавна ликвицација, токму во Преспа.
- Бидејќи политичкото раководство на земјата не носи закони во интерес на нацијата, туку за личен интерес, го повикувам военото раководство на земјата да ја почитува дадената заклетва и да ги уапси премиерот Алексис Ципрас, Панос Каменос и Прокопис Павлопулос за одвраќање на ова предавство. Вашите глави во Преспа! Вашите глави во Преспа! , повика од говорницата Константинос Барбарусис, пратеник на Златна Зора.
- Денеска во грчкиот парламент паднаа маските. Политичката сила Златна зора повика на пуч врз политичкиот систем, во согласност од мнозинството на пратеничката група на Златна зора. Барам Златна Зора повеќе да не добие право на обраќање, зашто од грчкиот парламент, треба да испратиме порака на обединетост и осуда на фашизмот, изјави Никос Вуцис, претседател на Собранието на Грција
Пратениците на неонацистичката партија експресно беа отстранети од седницата, а подоцна стигна и изненадувачка информација дека Барбурусис во меѓувреме, бил избришан и од самата Златна Зора, како санкција за повикот за пуч. Чудата во грчкото собрание немаа крај, особено откако пратеникот од партијата на Ципрас, Јоргос Урзудис, кој потекнува од Северниот дел на Грција, се обрати на македонски.
Пред Собранието од утрината почна, како што го најавија 3-дневниот протест за одбрана на името Македонија и против постигнатиот договор. Протести се најавени и во Преспа, во исчекување на потпишувањето на спогодбата. Атмосферата се очекува да кулминира утре, кога ќе се гласа за доверба на владата и кога се најавени обраќањата на Ципрас и Мицотакис.
-Не дозволуваме Скопје да го преземе зборот Македонија во никава форма. Самото име Македонија е иредентистичко. Никој освен Грците не смеат да се нарекуваат Македонци, вели учесник на протестите
-Нема друга Македонија. Македонија е една и грчка. Нема да дозволиме да се прифати овој погубен договор, изјави учесник на протестите
Математиката вели дека Ципрас сепак лесно ќе го преживее гласањето доверба. Од 300-те пратеници во Собранието, Сириза има комотни 154 гласа поддршка, особено откако коалицискиот партнер, лидерот на Независни Грци, Каменос потврди дека нема да гласа против Ципрас, иако има жесток став против договорот со Македонија. Договорот за решение на спорот денеска повторно го пофали грчкиот министер Коѕијас, во чија реторика веќе го одомаќини името Северна Македонија. Договорот е вин-вин за двете страни. Интеграцијата на Северна Македонија во НАТО и ЕУ е избор на оваа држава. Ние едноставно нема да ги спречиме и ќе им помогнеме на нивниот европски пат, изјави тој за рускиот весник Известија.