Повлекувањето на преостанатите 142 поднесени аманди на седница го соопшти координаторот на пратеничката група на СДСМ Оливер Спасовски, кој најави дека ќе поднесат два нови комисиски амандмани насочени кон справување со последиците од трагичниот пожар во дискотеката „Пулс“ во Кочани и тековните пожари низ државата.

-Сметаме дека во едни вакви услови во коишто имаме од една страна сериозни пожари во државата, не може и не треба да тече нормална дебата, туку треба да се посветиме и на такви активности. Ние доставивме еден допис до претседателката на Комисијата со конкретните амандмани. Најавуваме дека ќе поднесеме два комисиски амандмани кои ќе се однесуваат - едниот на Кочани со одредена сума на пари, и вториот амандман со сума на пари за справување со пожарите, пред се човечките капацитети. На тој начин да ја привршиме целата оваа работа во однос на амандманската расправа за ребалансот на буџетот, рече Спасовски.

Пратеникот на ВМРО-ДПМНЕ, Бојан Стојаноски нагласи дека опозициската СДСМ со повлекувањето на амандманите бега од дебата и оти креира политика нврз човекова трагедија.

-Колку и да ми е јасно дека ете има обид за политизација, практично досега е незабележано како што кажа и и колешката Стојановска опозиција да повлече амандмани и да одбие да дебати, а да има уште седум дена за расправа. Факт е дека побегнавте. Факт е дека сега креирате политика на нешто кое што е човекова трагедија. Еве ќе ви објаснам неколку работи. Прво за Кочани. Истото што ќе го кажеш утре, јас ќе излезам и прв ќе ти објаснам дека си лицемерен и лажеш. Поднесе амандман на кој што си потпишан за 3 милиони денари за старечки дом, а обезбедени се 199 милиони, бидејќи градоначалникот сметал дека тоа е приоритет. И за секој амандман подробно ќе ти објаснам што вие го барате колку е реално и колку е сега помогнато на тие луѓе. Второ работа, еве за пожарите. Ти беше министер седум години и тогаш имаше и сега има пожари. Знаеш која е разликата? Што сите авиони сега се сервисирани и веќе функционираат и максимално траење на пожар е 12 часа. Се сеќаваш како Маричиќ и Заев седеа на плажа додека народот не се буни да се вратат тука и да ги гаснат пожарите. Е тоа сега го нема, рече Стојановски.

Стојановски нагласи дека со овој ребаланс се покачуваат плати, пензии, се финансираат проекти, се градат автопати, факултети, училишта, болници, се модернизира полицијата, се модернизира армијата...

-Еве ќе ти кажам три работи зошто избегавте од дебата. Прво, заради тоа што немате аргументи. Ние не избегавме, 12 месеци сме власт. Амандман по амандман трпеливо ве газевме со аргументи. Начинот на кој луѓето излегуваа и ги кажуваа тука амандманите, доволно беше да не ве слушаат луѓето што зборувате, само да ве гледаа еден по еден кој ги поднесува тие амандмани и да види во изминатите 7 седум години што тие луѓе кои што сега бараат амандмани придонесоа за тоа да се решени. Втора работа зошто избегавте – покрај недостатокот на аргументи, се дека граѓаните сфаќаат дека проблемот во амандманите се директна ваша вина. Седум години ништо не направивте за решавање на тие амандмани, а тука имаме претседател на Собранието, премиер, министри во претходната влада и нула, ништо не направено и затоа избегавте. И Третата работа која е особено важна – ајде да ги фатиме амандман по амандман, ние за тоа сме тука. Најголем дел од амандманите веќе се во завршна фаза за решавање. Затоа побегнавте вие. И сега ќе зборуваме за Кочани и за пожари. Во ред, ќе зборуваме за што сакате. Не е никаков проблем, ние не побегнавме, рече пратеникот Стојановски.

Пратеникот на СДСМ, Фатмир Битиќи истакна дека со повлекувањето на амандманите нудат можност за справување на државата со пожарите.

-Не знам дали ова што се обидувате да го направите со процедуралното е знак дека ви се плаче затоа што ќе се справите со два комисиски амандмани коишто болат, а вие бегате, а тоа е Кочани и пожарот во Кочани. И второ, нудиме можност конечно да имате пари да се справите со пожарите, бидејќи луѓето не вредат за вас. Ние ви викаме еве ви можност комисиски амандмани. Повлекуваме амандмани од 10 милијарди денари за да ви понудиме два комисиски амандмани за да помогнете таму каде што вие секако ниту емпатија ниту солидарност знаете да покажете кон луѓето, рече тој.

Битиќи потенцира дека нивно деловничко и морално право е да повлечат амандмани кога, како што рече, гледаме дека државата е во сериозен проблем.

-Горат стопанства, куќи, гинат луѓе. Некој треба да им излезе во пресрет. Да не се случи за една недела ДЗС и ЦУК да кажат дека нема немаме средства за да помогнеме. Ние ви викаме еве ви комисиски амандман за да има доволно средства. Ако останат, во ноември ќе направиме пренамена и ќе ги однесеме. Не сакаме амандмани за улички и да мачкаме очи на луѓето со асфалт. Сакаме вистински да покажеме дека знаеме да се грижиме за тие на коишто повеќе им е потребна, рече Битиќи.

Со ребалансот се врши реалокација на средства меѓу буџетските корисници, се дообезбедуваат средства за исплата на плати пред се во Министерството за внатрешни работи, каде е обезбеден раст на платите на вработените од 10 проценти, а обезбедени се дополнителни средства и за исплата на зголемени пензии и дополнителни околу 300 милиони денари за капитални расходи.

Вкупните приходи со ребаланост се проектирани на ниво од 362,4 милијарди денари, а расходите на износ од 403,7 милијарди денари, по еден процент (околу 3,5 милијарди денари) повеќе во однос на иницијалните проекции со планот за годинава. Проекцијата за БДП останува 3,7 проценти, а инфлацијата е проектирана на ниво од 2,8 проценти. Буџетскиот дефицит останува непроменет и во апсолутен износ и како процент од БДП, односно 41,3 милијарди денари или 4 проценти од БДП. Капиталните расходи, пак, на износ од 47,5 милијарди денари. Државниот долг на крајот на 2025 година според проекциите на Владата ќе изнесува 53,3 проценти од БДП, а јавниот долг се очекува да биде на нивото од 62,1 процент.

Седница на Комисијата за финансирање и буџет со амандманската расправа по ребалансот на Буџетот продолжува утре во 12:30 часот.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.