Министерот за внатрешни работи Панче Тошковски, заедно со претседателот на Владата Христијан Мицкоски, денеска во рамки на посетата на Велес, го посетија модернизираниот команден центар на СВР Велес, каде што се запознаа со неговото функционирање и го означија почетокот на функционирањето на системот „Безбеден град“ на подрачјето на СВР Велес.

Министерот Тошковски информираше дека новиот команден центар е сместен во целосно реконструирани и реновирани простории кои во минатото биле користени од Министерството за одбрана, а потоа околу 15 до 20 години не биле во употреба. Со нивното ставање во функција, СВР Велес добива современ простор од кој се реализираат активностите поврзани со системот „Безбеден град“.

„Само во текот на вчерашниот ден, за 24 часа, имаме констатирано околу 124 казни, а денеска досега околу 27, односно за ден и половина околу 150 казни на територијата на СВР Велес, што ги опфаќа Велес, Кавадарци, Неготино и Демир Капија. Најголем дел се за брзо возење, а три-четири казни се за поминување на црвено светло. Тоа е фрапантно подобрување на почитувањето на сообраќајните правила од страна на македонските граѓани“, истакна Тошковски.

Министерот нагласи дека основната цел на системот „Безбеден град“ не е казнувањето и полнењето на буџетот, туку промена на сообраќајните навики и спасување човечки животи.

„Сакам уште еднаш да им се заблагодарам, пред сè, на македонските граѓани, затоа што со имплементирањето на еден систем чијашто првична цел е спасување човечки животи, а не полнење на буџетот, покажавме дека навистина можеме да се однесуваме европски. Позитивните ефекти од таквото однесување се многу помал број жртви, многу помал број сообраќајни незгоди и многу помалку негативни последици од непочитувањето на сообраќајните правила“, потенцираше Тошковски.

Осврнувајќи се на последиците од непочитувањето на сообраќајните правила, министерот посочи дека трагичните сообраќајни незгоди се реалност која може да го погоди секого, притоа посочувајќи на вчерашната сообраќајна незгода на патот Миладиновци – Аеродром, во која две лица починале на самото место, а три лица биле повредени, од кои две се во особено тешка, животозагрозувачка состојба.

„Сето ова што ни се случува поврзано со сообраќајните незгоди не е некаде далеку. Тоа е тука и може да му се случи на секого. Повторувам, никогаш немаме сообраќајна незгода со смртни последици доколку се почитуваат сообраќајните правила. Ова треба навистина да допре до сите“, порача министерот.

Тошковски изрази благодарност и до медиумите, општествено одговорните компании и организациите кои се вклучија во кампањата за подигнување на сообраќајната култура, издвојувајќи ја Фудбалската федерација на Македонија и фудбалерите кои учествуваа во промотивната кампања за почитување на сообраќајните правила.

Како особено значаен показател за ефектите од преземените мерки, министерот ги посочи податоците за бројот на жртви во сообраќајот.

„Заклучно со месец август, ако минатата година сме имале 96 жртви, оваа година за истиот период имаме 61 жртва. Тоа е фрапантна разлика за период од една година. Според информациите што ги добивам од експертите, доколку продолжиме вака и со почитување на правилата од страна на сите македонски граѓани, можеме да бидеме пример не само во Европа, туку и во светот, како за многу краток период сме успеале да го намалиме бројот на жртви за околу 40 проценти“, истакна Тошковски.

Министерот порача дека сите активности, инвестиции и кампањи што се преземаат во областа на сообраќајната безбедност имаат една заедничка цел – Македонија да стане побезбедна држава за сите.

„Сето ова го правиме само за да дојдеме до држава којашто ќе биде побезбедна за сите“, заклучи министерот Тошковски.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Почитувани сограѓани,

Пред неполна една година ја презедов одговорноста за раководење со Општина Ранковце.

Функцијата градоначалник ја прифатив знаејќи дека таа не претставува привилегија, туку обврска, одговорност и доверба што ја доделуваат граѓаните.

Денес пред вас не излегувам со нови ветувања, туку со отчет.

Отчет за реализираните активности.

Отчет за проектите што се во тек.

И отчет за проектите за кои се обезбедени средства и кои претставуваат следен чекор во развојот на нашата општина.

Во изминатиот период работевме водени од едно јасно начело:

Со општинските средства да управуваме одговорно и рационално, а секој работен ден да го претвораме во конкретен резултат за граѓаните.

Силната локална самоуправа се темели на луѓето кои ја сочинуваат.

Затоа, во првата година обезбедивме зголемување на платите за сите вработени во Општина Ранковце и ТППЕ за 4.000 денари.

На сите вработени им е исплатен и регресот за годишен одмор за 2026 година, во висина од 60% од просечната исплатена нето-плата во претходната година.

Паралелно со грижата за вработените, посветено работиме и на одржувањето на финансиската стабилност на институцијата.

Врз основа на судската пресуда во спорот со „Макоил“, од Буџетот на Општина Ранковце се исплатени околу 11.000.000 денари, со што се опфатени главниот долг, каматата, адвокатските и судските трошоци.

По завршувањето на локалните избори, целосно се исплатени и Општинската изборна комисија и избирачките одбори, во вкупен износ околу 2.500.000 денари.

Денес можеме одговорно да констатираме:

Сите фактури по преземените договори за јавни набавки и тековните трошоци се сервисираат навремено. Нема доспеани, а неплатени фактури.

Тоа е основата врз која се гради стабилна и функционална општина.

Во првата година инвестиравме во инфраструктурата и во подобрувањето на условите за живот во населените места.

Реализирана е реконструкција на објекти во сопственост на Општина Ранковце, во вкупна вредност од 991.000 денари, со средства од општинскиот буџет.

Станува збор за канцелариите на ЈКП Чист Ден и канцеларија која ќе се стави во функција на социјалниот центар за потребите на граѓаните.

За потребите на ТППЕ набавивме противпожарна опрема и друга механизација, во вредност од околу 200.000 денари.

За потребите на ЈКП и Општината е набавен комунален мулчер, во вредност од околу 105.000 денари.

Обезбедени се и околу 730.000 денари за набавка на мешан и дробен камен за тампонирање и подобрување на уличната мрежа.

ЈКП „Чист Ден“ е поддржано со 1.000.000 денари трансфер од општинскиот буџет, согласно одлуката на Советот.

Во областа на уличното осветлување, реализирано е осветлување во с. Псача и с. Гиновце, во вредност од околу 1.000.000 денари.

Во с. Ранковце е изграден дел од улица во должина од 250 метри, во вредност од околу 1.000.000 денари, со средства обезбедени од Министерството за транспорт и врски.

Сервисирана е и обврската кон АД „Водостопанство на РМ“, со што се создадени услови за чистење и уредување на речните корита.

Станува збор за различни инвестиции, но сите имаат една заедничка цел:

Ранковце да биде поуредно, побезбедно и поквалитетно место за живеење.

Еден од нашите најзначајни приоритети е подобрувањето на локалната патна инфраструктура.

Во с. Опила е реализирана реконструкција на локален пат во должина од околу 1 километар, со вкупна вредност од 13.207.000 денари:

2.529.000 денари од Буџетот на Општина Ранковце;

10.678.000 денари обезбедени од Владата преку унгарскиот заем.

Во с. Гиновце е реализирана реконструкција на локалниот пат кај железничката пруга, во должина од 520 метри, во вредност од 3.600.000 денари, со средства обезбедени преку Владата од унгарскиот заем.

Во с. Псача и с. Петралица – Дикина Маала е реализирана изградба на дел од локален пат во должина од околу 1.200 метри, во вредност од околу 9.000.000 денари, со средства обезбедени од Владата преку унгарскиот заем.

Со средства обезбедени од Светска банка се реализира и реконструкција на локалниот пат во с. Одрено и с. Псача, во должина од околу 2,5 километри.

Овие километри не се само обична бројка.

Тие значат полесно движење, подобра поврзаност меѓу населените места и поквалитетно секојдневие за граѓаните.

Нашата визија за Ранковце не се темели само на асфалт и инфраструктура.

Општина во која сакаме да живеат младите мора да создава услови и за нивните деца.

Затоа е спроведена јавна набавка за изградба на детски игралишта и поставување урбана опрема, со средства од Буџетот на Општина Ранковце во висина од 4.129.245 денари.

Тоа е инвестиција директно насочена кон најмладите жители на нашата општина.

Развојот не завршува со реализираните активности.

Во тек е јавна набавка за изградба на улично осветлување во с. Ранковце, во вредност од околу 1.500.000 денари.

Во тек е и јавна набавка за набавка на нова компјутерска опрема за Општинската администрација, со што продолжуваме со модернизацијата на локалната самоуправа.

Еден од нашите стратешки приоритети е обезбедувањето средства надвор од општинскиот буџет.

Во тек е реализација на ИПА-проект за прекугранична соработка со Република Бугарија, во вредност од околу 116.000 евра.

Преку проектот ќе се адаптира училишната зграда во с. Петралица во Центар за традиционални вредности, а ќе се опремат и простории во с. Отошница за престој на туристи.

Дополнително, обезбеден е и ИПА-проект со Република Косово, во вредност од околу 180.000 евра, за регулација на коритото на Голем Дол.

Овие средства не претставуваат само финансиска поддршка.

Тие се можност за инфраструктурен, туристички и економски развој на Ранковце.

Почитувани сограѓани,

Пред неполна една година ја побаравме вашата доверба.

Денес, ја оправдуваме со работа и резултати.

Зад нас е период во кој:

се инвестираше во патишта,

се изгради улична инфраструктура,

се подобри уличното осветлување,

се вложи во ТППЕ,

се поддржа комуналниот сектор,

се инвестираше во децата,

се сервисираа наследените обврски,

се исплатија тековните обврски,

се обезбедија средства од Владата,

се обезбедија средства од Светска банка,

и се привлече европско финансирање.

Но, најважно од сè:

Општина Ранковце продолжи да работи и да се развива.

Не тврдиме дека се решени сите проблеми.

Пред нас има уште многу работа.

Но денес имаме јасна насока, финансиска дисциплина, започнати проекти и обезбедени средства.

Ова не е крајот на една работа.

Ова е почеток на долгорочен развоен процес.

Резултатите се видливи.

А работата продолжува.

ЗА РАНКОВЦЕ.

ЗА СЕКОЈ ГРАЃАНИН.

ЗА ИДНИНАТА ШТО ЈА ГРАДИМЕ ЗАЕДНО.

Даниел Павловски, градоначалник на општина Ранковце

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

„Renault“ официјално ја претстави новата „Niagara“, пикап наменет за пазарите во Бразил, Аргентина и Колумбија.

Производството ќе се одвива во фабриката Санта Изабел во Аргентина, а моделот е создаден со идеја за комбинирање на удобноста на теренец со робусноста на пикап.

Дизајнот е еден од неговите главни адути.

„Niagara“ е многу сличен на концептот со исто име што „Renault“ го претстави пред речиси три години, што не е вообичаено кога концептот влегува во сериско производство.

Бензински мотор и погон „4x4“

„Niagara“ се нуди исклучиво со 1,3-литарски турбо-бензински мотор. Во верзијата со погон на предните тркала, развива 156 КС, додека моделот со погон „4x4“ има 160 КС.

Вртежниот момент во двата случаи е 270 Nm.

Купувачите можат да изберат помеѓу шестстепенски мануелен и шестстепенски автоматски менувач со двојна спојка.

За подобро управување под оптоварување, „Renault“ разви специјално задно потпирање со специфични пружини и амортизери.

Товарниот простор има волумен од 938 литри и капацитет на товар до 654 килограми, а има и извлекувачки капак за ролна, осум куки за товар и штекер од 12 волти.

Максималната тежина на приколката е 710 килограми, така што „Niagara“ не е наменет за влечење особено тешки товари.

„4x4“ за возење надвор од патот

Растојанието од земјата на верзијата „4x4“ е 233 mm, додека моделот „4x2“ има 223 mm.

„4x4“ погонот, исто така, носи неколку режими на возење кои ја прилагодуваат распределбата на моќноста помеѓу оските за да се подобри прилепувањето на различни површини.

Кабина позната од другите модели на „Renault“

Внатрешноста е значително поконвенционална од надворешноста и се потпира на решенија познати од другите модели на „Renault“. Инструменталната табла има 10,2-инчен дигитален дисплеј, додека мултимедијалниот систем користи 10,1-инчен дисплеј.

Мултимедијалниот „OpenR“ доаѓа со интегрирани услуги на „Google“, вклучувајќи „Google Maps“, „Gemini“ и продавницата „Google Play“.

Безбедносните системи вклучуваат адаптивен темпомат со функција „Stop & Go“, помош при одржување на лента, автоматско сопирање во итни случаи и предупредување за мртва точка.

„Renault“ сè уште не ги објави цените или деталите за почетокот на продажбата на „Niagara“ на латиноамериканските пазари.

Извор: Б92

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.