Автомобилизам

Порше го претстави новото заштитно лице

Најдобрата германска тенисерка Ева Лис во иднина ќе го претставува Порше како „пријател на брендот“.

Ева Лис со години се подготвува за професионална кариера како член на Junior Team и Porsche Talent Team. Сега заедно со Порше оди чекор понатаму, а искрено, како што вели, со нетрпение ја очекува новата улога на заштитно лице.

Споделување на истата страст

„Неверојатна чест е да се приклучам на семејството Порше, бренд што го отелотворува она што го сакам: перформанси, прецизност и елеганција“, рече Ева Лис. „Додека продолжувам да ги поместувам границите на терен, одлично е да се има поддршка од компанија која ја дели истата страст за извонредност“.

На тениското Гранд При на Порше (од 12 до 21 април) ќе се појават бројни тениски ѕвезди, а најдобрата ќе добие финансиска награда, како и Порше Макан Турбо Електрик. Ева Лис по втор пат ќе се појави пред публиката во Штутгарт благодарение на вајлд-карта.

Слабо рангирана, но потенцијалот не е спорен

Моментално 68. играчка во светот и прворангирана Германка, таа има посебен однос со овој традиционален турнир. Во Порше Арената во 2022 година ја постигна првата победа во главниот ждреб на еден ВТА турнир. Porsche јасно гледа голем потенцијал во неа.

Порше до неодамна стоеше покрај британската тенисерка Ема Радукана, која извесен период играше сензационално, но потоа почна серија слаби резултати. Доволно за прекин на соработката. Така, Ева има дополнителна причина да биде уште подобра.

Тагови: заштитно лице Порше

Живот

Серена Вилијамс: Доколку јас бев на местото на Синер ќе ме казнеа 20 години

„Го сакам тој човек, ја сакам оваа игра“, изјави за магазинот Тајм легендарната Вилијамс.

Легендарната американска тенисерка Серена Вилијамс рече дека сигурно би добила 20 годишна суспензија и одземање на сите освоени грен слем титули доколку би била позитивна на допинг тест како во случајот со светскиот рекет број еден Јаник Синер минатата година.

Синер прифати тримесечна забрана во февруари по договорот со Светската антидопинг агенција, која ја оспори одлуката на независен суд да го ослободи од вината по двата позитивни теста за анаболниот агенс клостебол.

„Го сакам тој човек, ја сакам оваа игра“, изјави за магазинот Тајм легендарната Вилијамс, која се пензионираше во 2022 година откако освои 23 грен слем трофеи.

„Синер е одличен за овој спорт, потребен му е на машкиот тенис. Но, да го направев тоа јас, ќе добиев 20-годишна казна“, додаде таа.

Синер, чија забрана истекува на 4 мај, отсекогаш тврди дека е виновен, иако неговиот случај иницира прашања за тоа дали добил повластен третман од спортските федерации./МИА

Тагови: Серена Вилијамс

Фудбал

Медиуми: Анчелоти го напушта Реал, ќе биде селектор на Бразил

Се очекува тренерот на Реал Мадрид, Карло Анчелоти да ја напушти клупата на шпанскиот гигант по финалето на Купот на кралот, што ќе се одигра на 26 април против Барселона во Севиља, дознава „Скај Спорт“.

Анчелоти дополнително ги подгреа сомнежите околу неговата иднина во Реал вчерашната елиминација од Арсенал во четвртфиналето во Лигата на шампиони.

Според „Скај Спорт“, 65-годишниот италијански стратег ќе остане на клупата на Реал до финалето на домашниот Куп, но се очекува потоа да го напушти клубот.

Анчелоти сè почесто се споменува и како најсериозен кандидат за нов селектор на Бразил, а оваа вест би можела и официјално да биде потврдена пред крајот на сезоната.

Фото: ЕПА

Тагови: Бразил Карло Анчелоти Реал Мадрид

Свет

Нетанјаху: Израел нема да дозволи Иран да развие нуклеарно оружје

Израелскиот премиер Бенјамин Нетанјаху денеска изјави дека Израел нема да дозволи Иран да развие нуклеарно оружје, прецизирајќи дека извршил безброј „отворени и прикриени“ акции кои ја уназадиле иранската нуклеарна програма за „речиси една деценија“.

Ова е прва изјава на Нетанјаху за Иран откако администрацијата на американскиот претседател Доналд Трамп ги почна преговорите со Техеран во обид да склучи нов ирански нуклеарен договор.

- Како што многупати изјави премиерот – Израел нема да дозволи Иран да се здобие со нуклеарно оружје, се вели во соопштението од кабинетот на Нетанјаху.

- Премиерот предводеше безброј акции, отворени и прикриени, во борбата против иранската нуклеарна програма, без која Иран денес би имал нуклеарен арсенал. Тие акции ја вратија иранската нуклеарна програма речиси една деценија назад, се додава во соопштението.

Западните земји, предводени од САД, се сомневаат дека Иран сака да се здобие со нуклеарно оружје. Техеран ги отфрла тие обвинувања и го брани правото на нуклеарна енергија за цивилни цели, особено за енергија.

Иран и САД, кои немаат дипломатски односи од 1980 година, минатата сабота ги одржаа првите разговори, со посредство на властите во Оман, за иранската нуклеарна програма.

Втората средба на официјалните претставници на двете земји е закажана за в сабота во Рим./МИА

Тагови: Бенјамин Нетанјаху Иран