Речиси секој втор што поради КОВИД 19 влегол во болница, ја загубил битката со вирусот. Ова го покажува статистиката од последниот официјален извештај на Институтот за јавно здравје според кој од почетокот на пандемијата од вкупниот број на ковид пациенти во болниците - 11851, 5150 починале за време на хоспитализацијата. Изразено во проценти според овој извештај стапката на смртност во болниците е 43 отсто. За потврда на информациите на вкупниот број на хоспитализирани од почетокот на пандемијата, Канал 5 се обрати и до Институтот за јавно здравје.
-Ние имаме комплетни податоци до 04.01.2021 и за дотогаш можеме да дадеме податоци со 100% сигурност, после тоа се премина преку „Мој Термин“ и се уште немаме комплетен пристап за да можеме да направиме анализи по анкетите. Од она што е до ИЈЗ пријавено, бројката е на хоспитализирани е 11851.-Институт за јавно здравје.
Од Министерството за здравство високиот процент на смртност кај хоспитализираните го објаснуваат со податокот дека 9 од 10 од починатите имале хронични болести.
-Огромен процент од починатите пациентите се со коморбидитети и имале тешка форма од некоја друга хронична болест од којашто биле лекувани долго време. Сериозен број на пациенти касно дошле во болница и веќе имале многу тешка манифестација на болеста. Но, над 85% од починатите се пациенти коишто имале повеќе хронични заболувања.-Министерство за здравство.
Во меѓувреме, во земјава официјалното советодавно тело – Комисијата за заразни болести, епидемиолошката состојба ја оценува како стабилна, а согласно официјалните податоци, заклучно со 18 месецов, на ниво на држава поради компликации од вирусот во болница лежат триесетина граѓани, од нив деветмина се на кислородна поддршка.