Шоу биз

Поради навреда кралицата после 60 години раскина соработка со компанија

Компанијата „Rigby & Peller” од Лондон ги изгуби привилегиите кај британското кралско семејство откако ја објави автобиографијата на нејзината поранешна сопственичка.

Компанијата, која од 1960 година произведува долна облека за кралицата Елизабета II и другите членови на кралското семејство, ги изгуби привилегиите откако Џун Китон ја објави својата автобиографија под името „Storm in a D-Cup”.

Китон, која за кралицата произведувала градници во шеесеттите и седумдесеттите години, во својата книга открила дека била официјален произведувач на корсети за кралското семејство во време на своите редовни посети на Бакингемската палата.

„Жал ми е што Бакингемската палата тоа го сфати како навреда. Станува збор за симпатична приказна за тоа што се случуваше во мојот живот, но и во мојата работа“ – изјавила 82 годишната Китон.

„Се што напишав во книгата е дека сум отишла таму. Никогаш, со ниту еден збор не сум напишала што правев таму“ – додала таа.

Китон изјави дека одлуката на кралското семејство ја смета за “неверојатна“ и дека веројатно пред објавувањето на книгата требало да ја праша палатата за дозвола, но според неа воопшто не ни помислила дека тоа што го прави било погрешно.

„Толку е вознемирувачки што се случува пред крајот на мојот живот. Но што можам да направам. Не можам да влегувам во конфликт со палатата, ниту тоа го сакам, но тешко е“ – изјавила таа.

Бакингемската палата одбила да ги коментира овие наводи.

Британската асоцијација за кралските повластици наведува дека губењето на статусот на компанијата не е поврзано со објавувањето на биографијата, додавајќи дека секоја година се откажуваат 20 до 40 повластици, кои им се доделуваат на други компании.

Кралските повластици, кои може да ги издадат само кралицата Елизабета II личност, принцот Филип и принцот Чарлс, се доделуваат на компаниите и занаетите кои во претходните пет до седум години за кралското семејство извршиле разни извонредни услуги или го снабдиле со извонредни добра.

Повластиците не се доделуваат на припадници на професии кои имаат врска со банкарство, законот или новинарство.

Во овој момент, кралските повластици ги уживаат околу 800 компании и поединци.

Македонија

Едeн загинат во сообраќајка на експресниот пат Штип - Кочани

Триесет и деветгодишен маж загина во сообраќајка на експресниот пат Штип-Кочани. Жената и двете малолетни деца поради здобиените повреди се пренесени во штипската Клиничка болница.

Пријавата во СВР-Штип е во 02:24 часот, изјави за МИА Гордана Панајотова, портпарол на СВР-Штип.

Несреќата се случила во близина на клучката кај селото Крупиште, а според првичните информации, во несреќата учествувало само едно возило. Автомобил марка рено „лагуна“ со скопски регистерски таблички излетало од коловозот, а од здобиените повреди починал возачот И.М од Скопје.

Увидот во несреќата е во тек. Сообраќајот на експресниот пат Штип-Кочани се одвива по двете коловозни ленти.

На овој експресен пат од почетокот на годината досега во три тешки сообраќајки, животите ги загубија пет лица.

Свет

Прелиминарни резултати: Гласачите во Панама го избраа Мулино за нов претседател

Гласачите во Панама го избраа Хозе Раул Мулино за претседател, според прелиминарните резултати објавени доцна синоќа.

Мулино, кој е близок човек од доверба на поранешниот шеф на државата Рикардо Мартинели, сака да ја запре нерегуларната миграција низ џунглата Дариен на југот на централноамериканската земја кон САД.

Мулино освои околу 35 отсто од гласовите, соопшти изборната власт на земјата откако беа преброени повеќе од 90 отсто од гласовите.

Околу 3 милиони луѓе имаа право да гласаат на изборите, при што беа одржани гласања за вкупно 71 парламентарно место и речиси 800 локални канцеларии.

Уставот на Панама забранува директен реизбор на актуелниот претседател, пренесува ДПА.

Меѓу осумте претседателски кандидати беа Хозе Габриел Каризо од владејачката партија ПРД, поранешниот претседател Мартин Торијос, поранешниот конзул во Вашингтон, Рикардо Ломбана и поранешниот министер за Панамскиот канал, Ромуло Ру.

Мулино (64) ќе ја преземе функцијата шеф на државата и премиер на 1 јули.

Фудбал

Баерн почна преговори со Тен Хаг

Тренерот на Манчестер јунајтед, Ерик тен Хаг може да ја продолжи кариерата во Баерн, објави на социјалните мрежи новинарот Флоријан Плетенберг.

Според Плетенбург, во последните недели се воделе преговори меѓу клубот и застапници на холандскиот фудбалски стручњак.

Иднината на тренерот во Манчестер јунајтед сè уште не е одредена. Тен Хег би сакал да го одработи договорот до 2025 година. Но, доколку мора да ја напушти функцијата на крајот од сезоната, тој е подготвен да го води Баерн.

Претходно беше објавено дека сегашниот тренер на Баварците, Томас Тухел планира да го напушти Баерн. Сепак, на 4 мај во медиумите се појави информација според која Германецот би можел да остане во германскиот клуб.

Баерн не ја одбрани титулата во Бундеслигата, додека по 34 кола во Премиер лигата, Манчестер јунајтед е на 6. место.