Државите кои имаат проблем со миграција на населението треба да ги попишуваат иселениците, смета директорот на Државниот завод за статистика Апостол Симовски. Во изјава за Канал 5 вели дека според препораките на Обединетите нации за попис не е задолжителна дијаспората, но за Македонија е потребна статистиката колку луѓе живеат надвор од границите на државата. Методологијата не треба да се менува, а нема ниту време за тоа, додава Симовски кој очекува во земјава да се намали стравот кај граѓаните за безбедноста при попишувањето во септември.
„Секако јас не би сакал да додеведеме било кого во ситуација да ја шириме болеста понатаму и да има страв кај населението. Не мора, не е задолжително, но земјите кои имаат проблем со миграцијата е корисно да соберат податоци од повеќе причини, да се градат политики да се стопира колку што е можно, а зошто да не и постепено да се враќаат луѓето назад.“
Дали дијаспората се попишува или само се евидентира е дилема која ја отвори претседателот на ВМРО-ДПМНЕ Мицкоски по лидерската средба. Во синоќешното Само Интервју, премиерот Заев рече дека тогаш разговарале само за технички измени во методологијата, а дијаспората мора да се попишува како што е договорено, во наредните пет месеци. Сепак,од ВМРО ДПМНЕ повторија дека ќе го признаат само резидентното население на крајот од процесот.
„Му дадов задача на министерот за правда Маричиќ ќе работи со некој од претставниците од ВМРО-ДПМНЕ, но за технички работи, ние немаме намера да отвораме, па после ДУИ, Алијанса, малите етнички заедници да отвориме проблем. Таа е методологијата, одобрена од ЕВРОСТАТ. Чуден е човекот, со полна уста убави зборови за нашата дијаспора кога треба да не изгласаат за парламентарни, претседателски избори. Сега кога попишуваме како тоа да е друг народ. Тоа е наш народ. “
„Ние остануваме на ставот дека резидентното население треба да се попишува, нерезидентното може само да се евидентира заради тоа што се знае точно што значи некој кој што е надвор од државата 12 месеци, се знае точно што значи одјавена адреса и токму поради тоа доколку пописот во Република Македонија се спроведува со методологија која што не е од прирачникот на ЕУРОСТАТ, која што јасно утврдува методологија како треба да се изврши одреден попис, ВМРО-ДПМНЕ нема да ги признае резултатите од пописот.
Против попис на дијаспората е и Левица, а доколку не се смени законот за иселениците да не влезат во статистиката, најавија дека повторно ќе повикаат на бојкот. По неколку часовна дебата Собранието синоќа и официјално го одложи пописот со 95 гласа ЗА и 12 ПРОТИВ. Според последните измени во законот, попишувањето во земјава ќе се спроведе од 5ти до 30 септември.