Минатата недела Европската унија откри план што ќе им овозможи на луѓето да се одморат и да се релаксираат на свеж воздух. Планот вклучува препораки за отворање на внатрешните граници, започнување железнички и патен транспорт и отворање на туризмот.
Но, надлежните веќе имаат проблеми да се справат со приливот на туристи и граѓани на една од најатрактивните летни локации - плажите. Така, во средата, еден ден откако Франција ги олабави рестриктивните мерки и отвори стотици плажи, пет плажи во Бретанија беа затворени поради „неприфатливо однесување“ и неможноста да се одржат мерките за физичко растојание.
Властите во холандската провинција Зеланд во средата привремено ги затворија патиштата за време на викендите до 1 јуни, бидејќи тие предвидуваат дека доброто време би можело да доведе до нарушување на мерките за дистанца.
Во шпанскиот град Барселона, властите ги предупредија граѓаните да се држат до закажаните датуми поставени за посета на плажа, а во Велика Британија, крајбрежните градски власти побараа од граѓаните да не создаваат толпа пред националниот празник во понеделник.
Експертот за патувања Тони Џонстон изјави за Си-Ен-Ен дека како што летото се приближува, луѓето сакаат да одат на одмор и да ги посетуваат плажите, дома или во странство. Тој додаде дека властите мора да изготват стратегии за да избегнат пренатрупаност во текот на летната сезона.
„Неизбежно, со убавото време низ целиот континент, овој проблем ќе се појави“, рече Џонстон, кој е раководител на Катедрата за хотелиерство, туризам и рекреација на Институтот Атлон. Според него, наместо надлежните да издадат целосни забрани, треба да охрабруваат добро однесување на плажите. Целосните забрани би довеле до преместување на проблемот на друго место.
Локалните власти во некои области веќе издадоа упатства за повторно отворање на плажите. Шпанскиот министер Рејес Марото изјави дека земјата, една од најпогодените од коронавирусот, размислува за „различни сценарија“ за отворање на плажите.
„Откако ќе се започне меѓународниот туризам, треба да можеме да гарантираме дека луѓето што доаѓаат во Шпанија ќе бидат безбедни“, рече Марото.
Властите во градот Канет д’ен Беренге, сместен во шпанската провинција Валенсија, веќе издадоа упатства да им дозволат на само 5000 луѓе на ден пристап на нивните плажи. Инаку, во текот на летото, секој ден има двојно повеќе луѓе на плажите на овој град.
Во Санкенкс, сместена во шпанската провинција Галиција, плажите постојано ќе се чистат, а јавните тушеви и тоалетите постојано ќе се дезинфицираат.
Властите во некои француски провинции како Ландес ги отворија плажите само за индивидуални физички активности.
Џонстон додаде дека властите во Шпанија, Италија, Франција и Грција, кои се многу зависни од туризмот, треба да овозможат безбеден туризам и да издаваат препораки што ќе ги промовираат хигиенските навики на јавни места.
„Околу 330 милиони луѓе работат во туризмот. Ќе биде предизвик да се балансира помеѓу исполнувањето на потребите и желбите на туристите, што донесуваат економски влијанија“, заклучи тој.