И по десетина дена од изборите, партиите и од македонскиот и албанскиот блок, не ги откриваат своите адути за можни коалиции и обезбедување на парламентарно мнозинство.
Од Алијансата за Албанците и Алтернатива, сепак, не ја исклучуваат можноста да бидат дел од владина коалиција во која би учествувала и ДУИ. И покрај првичниот категоричен став дека коалиција со „интегративците“ не доаѓа во предвид, денеска со омекнат став, велат, иако е тешко изводливо, се е во игра.
- Ние сме кажале дека не исклучуваме никого, но исто така сме кажале дека со ДУИ во Влада ќе биде многу тешко, можеби неизводливо. Но сепак, ќе оставиме на политичките лидери во договорите, има многу варијанти, кој ќе биде исходот ќе видиме. Нема нешто конкретно, нема нешто ново. Како коалиција ама и поединечно како партии комуницираме со сите политички партии а тие контакти ги одржуваме и денес. Следи период кога треба да почнат преговори за формирање Влада. Чекаме претседателот на државата да го предаде мандатот по што и мандатарот ќе ги почне преговорите за формирање на новата Влада воедно и тој одлучува со кој ќе коалицира, изјави Шефик Дураку од коалицијата АА и Алтернатива.
Покрај партиските калкулации, коалициските партнери Алијанса и Алтернатива утре ќе протестираат, незадоволни од последните избори и правото на слободен глас на, како што велат, албанските граѓани. Најавија т.н „Марш на демократијата“со партиски знамиња и албанското национално знаме.
Од ВМРО-ДПМНЕ остануваат на ставот дека во тек се неформални разговори, но не откриваат детали се додека нема конечен исход.Повикот на Заев за сите пратеници да им се приклучат во коалицијата, од ВМРО-ДПМНЕ го оценуваат како поткуп и пазар.
-Само за Зоран Заев и за СДСМ демократијата е пазар на кој што може да се купат гласови и со злоупотреба на државата да се купат пратеници. Претседателот на ВМРО- ДПМНЕ Проф д-р Христијан Мицкоски од партиските тела доби овластување да разговара со другите парламентарни партии за состав на нова влада предводена од ВМРО-ДПМНЕ. Во интерес на разговорите до нивно финализирање нема да откриваме детали, велат од партијата.
И од СДСМ не откриваат ништо ново околу плановите за новата Влада. Го повторија ставот дека преговорите за идната коалициска соработка ќе ги започнат идната недела после Илинденските празници.
ДУИ по цврстиот став за премиер Албанец според последните изјави на партиските функционери ја омекнуваат позицијата и како коалициски услов го потенцираат почитувањето Охридскиот, Преспанскиот како и Договорот за добрососедство со Бугарија.