Младиот навивач на Вардар, Никола Саздовски – Саздо бил убиен на свиреп начин, објави Јавното обвинителство од каде денеска соопштија дека е поднесено обвинение против две лица. Напаѓачите прво му побарале лична карта на автобуската постојка на булеварот “Александар Македонски”, а откако им ја покажал идентификацијата тие почнале да го удираат со боксови во пределот на главата и градите. Од силните удари Саздовски загубил рамнотежа, паднал на тротоарот по што обвинетите без милост продолжиле со клоци да го удираат по главата и телото. Од силните удари паднал во коматозна состојба, по што бил пренесен на КАРИЛ. Истиот ден бил пренесен на Клиниката за трауматологија, каде на 3ти јули била констатирана мозочна смрт, а од здобиелните повреди на 9ти јули Саздовски почина, стои во обвинението. Против двете лица од обвинителството предложи мерката притвор да биде продолжена поради опасност дека можат да влијаат врз сведоците или да побегнат. По третиот осомничен за нападот на Саздовски се уште се трага, од обвинителството велат дека исражната постапка против него е запрена.
“ Против третото осомничено лице, за кое обвинителството исто така водеше истражна постапка за истото кривично дело како соизвршител заедно со двајцата сега обвинети, согласно член 300 од Законот за кривична постапка, надлежниот јавен обвинител донесе Наредба со која ја прекина истражната постапка. Имено, со оглед на тоа што трето осомничениот се уште е недостапен на државните органи, за ова лице за кое е распишана домашна и меѓународна потерница, истражната постапка ќе продолжи во моментот кога ќе биде достапно на државните органи. “
За сега нема детали кој бил мотивот за убиството на Саздовски. Најпрво, тројцата осомничени беа годнети за насилство што предизвика масовни протести од навивачката група Комити, по што делото се преквалификува во убиство.