Живот

Под мразот на Антарктикот се пронајдени 330 џиновски кањони- откритие важно за иднината на човештвото

Научниците открија дури 332 подводни кањони по должината на континенталните рабови на Антарктикот, од кои некои достигнуваат длабочина од повеќе од 4.000 метри!

Ова откритие значително ги надминува претходните проценки и го менува разбирањето за геоморфологијата на морското дно на ледениот континент.

Истражувањето го спроведоа експерти од Шпанија и Ирска, користејќи нова батиметрија со висока резолуција - техника за прецизно мапирање на релјефот на морското дно.

Кањони поделени по форма

„Најимпресивните системи се наоѓаат во областа на Источен Антарктик, каде што кањоните имаат разгранети структури, а потоа се спојуваат во еден главен канал што се спушта по стрмната континентална падина во длабокиот океан“, рече проф. Дејвид Амблас од Универзитетот во Барселона.

Разликите помеѓу источниот и западниот брег на Антарктикот, исто така, откриваат различни геолошки истории, објавува IFL Science.

Додека кањоните во Источен Антарктик се сложени и широки, со карактеристични U-профили, оние во Западен Антарктик се пократки, пострмни и обликувани во V-профили.

Антарктикот крие многу тајни

Научниците веруваат дека ова укажува дека ледената покривка на Источен Антарктик е значително постара од ледената покривка на Западен Антарктик и дека е формирана порано, што досега беше познато главно врз основа на седиментолошки истражувања, но не и врз основа на геоморфологијата на морското дно во големи размери.

Антарктикот не е само „лебдечки блок мраз“ околу Јужниот Пол. Под масивната ледена покривка се наоѓа цврст континент со планински венци и гигантски кањони, слични на другите континенти како што се Северна Америка или Европа.

Подводните кањони функционираат како „вени“ на континентот, поврзувајќи ги поплитките и подлабоките слоеви на океанот и создавајќи екосистеми богати со морски живот.

Важно откритие

Познавањето на овие кањони е од клучно значење, бидејќи тие играат голема улога во циркулацијата на океанот, а со тоа и во глобалните климатски процеси, важни за човештвото. Досега, околу 10.000 подводни кањони се мапирани низ целиот свет, но експертите проценуваат дека има уште десетици илјади, со оглед на тоа што помалку од една третина од морското дно е точно мапирано.

„Затоа, потребно е да се продолжи со собирање батиметриски податоци со висока резолуција во неистражени области, како и да се подобрат климатските модели за попрецизно предвидување на последиците од климатските промени“, заклучуваат авторите на студијата.

Новата студија е објавена во научното списание „Морска геологија“.

Тагови: Антарктикот Човештвото

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Кина е длабоко загрижена

Кина е длабоко загрижена поради обновената ескалација на воените конфликти во регионот на Персискиот Залив, изјави денес портпаролот на кинеското Министерство за надворешни работи, Лин Џијан.

Тој, исто така, ги повика сите релевантни страни да покажат воздржаност и „да го одржат тешко постигнатиот прекин на огнот“, објави Синхуа.

Одговарајќи на поврзано прашање за време на редовната прес-конференција, Лин ги повика сите вклучени страни да избегнат враќање на војната.

Тој особено нагласи дека спречувањето на понатамошна ескалација на борбите е клучно за заштита на животите на невините луѓе.

„Почитувањето на легитимните права и интереси на крајбрежните земји на Ормутскиот теснец и брзото враќање на нормалниот и безбеден премин низ теснецот е она што меѓународната заедница сака да го види“, рече Лин, додавајќи дека релевантните страни мора да работат во иста насока и да бараат соодветно решение, соопшти агенцијата.

Централната команда на САД (CENTCOM) објави претходно денес дека го завршила најновиот бран напади врз воени цели во Иран.

САД започнаа неколку бранови напади врз Иран од 7 јули.

CENTCOM соопшти дека нападите биле одговор на иранските напади врз комерцијалниот брод во Ормутскиот теснец.

Техеран одговори со напади врз американските бази во Кувајт, Бахреин и Јордан.

Тагови: Кина

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Ѓорѓиевски: Конечно решение за булевар „Борис Трајковски“

Фејсбук објава на градоначалникот на Град Скоје, Орце Ѓорѓиевски.

„30 години голгота - конечно решение за булевар „Борис Трајковски“

Зборот е збор.

Со силна динамика продолжуваат работите на довршување на булеварот „Борис Трајковски“, проект што со децении беше симбол на лажни ветувања, застој и секојдневен сообраќаен хаос.

Денес, со задоволство можам да кажам дека работите напредуваат според предвидената динамика и дека наскоро повеќе од 100.000 жители ќе добијат нов, модерен и безбеден булевар со четири сообраќајни ленти, како и уредена пешачка и велосипедска патека.

Трасата е речиси целосно пробиена, а паралелно се гради и нова атмосферска канализација, со што трајно се решаваат проблемите што со години го отежнуваа животот на граѓаните од овој дел на Скопје.

Свесен сум низ што поминуваше мојот народ сите овие години.

Свесен сум за изгубеното време, нервозите и долгото чекање.

Но, деценискиот сообраќаен хаос конечно заминува во историјата.

Ова е враќање на достоинството на граѓаните и доказ дека кога има волја, работа и одговорност - нема невозможни работи!

Продолжуваме да го менуваме ликот на Скопје!“- напиша Ѓорѓиевски.

Тагови: Орце Ѓорѓиевски

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

ТИРЗ: ВДЛ Бус Македонија ќе започне со трета фаза на инвестицијата - производство на нов модел на автобус

Директорот на ТИРЗ Гоце Димовски денес имаше средба со Аврам Стојчевски, генерален директор на компанијата ВДЛ Бус Македонија.

На средбата се разговараше за тековните активности на компанијата, реализирањето на третата фаза од инвестицијата која ќе изнесува повеќе од 5 милиони евра, со нови 150 висококвалификувани работни места во рамките на ТИРЗ Скопје 2.

Димовски нагласи дека Дирекцијата за ТИРЗ останува посветен партнер на компаниите кои веќе инвестираат во земјата, преку навремена институционална поддршка и активно следење на нивните потреби. Тој истакна дека токму постојните инвеститори претставуваат најсилен показател за квалитетот на деловното окружување, а нивното проширување е важен сигнал за довербата во домашната економија.

На средбата беше разгледан планот за реализација на третата фаза од инвестицијата, која предвидува производство на нов модел на автобус. Дополнително, беше потврдена заложбата за продолжување на конструктивна соработка, со цел создавање услови за успешна реализација на овој инвестициски циклус, натамошен развој и зајакнување на конкурентноста на домашната економија.

Инаку, компанијата во април годинава од ВДЛ Ван Хоол Македонија се преименува во ВДЛ Бус Македонија, со што истата започна нова развојна фаза во своето работење. Промената е дел од поширокиот процес на трансформација и развој на компанијата, со фокус на понатамошно унапредување на производствените активности и зајакнување на нејзината позиција во автомобилската индустрија.

Тагови: ТИРЗ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.