-За првпат, три големи земји, Велика Британија, Франција и Канада, заедно одлучија дека ќе се спротивстават на тоа што се случува во Појасот Газа и дека заеднички ќе ја признаат државата Палестина. И тоа движење што започна нема да биде запрено“ рече Бајру во францускиот Парламент за време на седницата за пратенички прашања, пренесен од француските медиуми.

Француските, британските и канадските лидери Емануел Макрон, Кир Стармер и Марк Карни вчера предупредија дека „нема да стојат настрана“ пред „скандалозните постапки“ на израелската Влада во Појасот Газа, заканувајќи се со „конкретни мерки“ ако тој премиерот Бенјамин Нетанјаху не ја запре воената офанзива и не ја деблокира хуманитарната помош.

-Таа осуда и повторените предупредувања се апсолутно јасни и нè обврзуваат. Но, никогаш не смееме да заборавиме дека оваа ситуација со трагедијата што ја предизвика имаше поводник. А поводникот е палестинското движење Хамас, кое го нападна Израел на 7 октомври (2023 година, додаде Бајру, кој се залага за решение со две држави.

Според него, ситуацијата во Појасот Газа е хумано и хуманитарно неприфатлива.

Шефот на француската дипломатија, Жан-Ноел Баро, денеска за радио „Франс Интер“ изјави дека Париз е решен да ја признае државата Палестина и додаде дека тоа е „во интерес на Палестинците, но и за безбедноста на Израел“.

Се очекува признавањето на Палестина да биде објавено на меѓународна конференција под претседателство на Франција и Саудиска Арабија.

Целта на таа конференција од 17 до 20 јуни е повторно да се започне мирно решение за израелско-палестинскиот конфликт, односно решение за две држави. /МИА

Администрацијата на американскиот претседател Доналд Трамп работи на постигнување договор што би му дозволил на Иран да има цивилна програма за нуклеарна енергија, но не и да збогатува ураниум, изјави денеска американскиот државен секретар Марко Рубио.

Рубио пред Комитетот за надворешни односи на Сенатот изјави дека администрацијата се стреми да му даде можност на Иран да се стреми кон мир и просперитет, јавија француските медиуми.

-Нема да биде лесно, но тоа е процесот во кој сме вклучени во моментов, рече Рубио.

Иранскиот заменик министер за надворешни работи, Казем Гарибабади, денеска изјави дека Техеран добил и моментално разгледува предлог за петтата рунда нуклеарни преговори со САД.

Тој го изјави ова неколку дена откако американскиот претседател Доналд Трамп изјави дека Техеран мора брзо да ги продолжи преговорите, пренесоа британските медиуми.

Два дена претходно, шефот на иранската дипломатија, Абас Арагчи, изјави дека датумот за петтата рунда нуклеарни разговори меѓу Иран и САД е одреден, но се чека одобрување и наскоро ќе биде објавен. /МИА

Администрацијата на претседателот на САД, Доналд Трам се обратила до Катар со иницијатива да купи авион „Боинг 747“ што би се користел како привремена замена за претседателскиот авион Air Force One, што треба да биде испорачан дури во 2027 година, дознава „Си-ен-ен“.

Вредноста на авионот се проценува на околу 400 милиони долари. Трамп претходно тврдеше дека двоспратното летало може да биде „подарок“ од Катар.

По преземањето на функцијата во јануари Трамп побарал побрза замена за претседателскиот авион од планираната испорака на новите модели на Боинг. Со помош на Пентагон и пратеникот за Блискиот Исток Стив Виткоф, била идентификувана можност за набавка на авион од странски клиент — меѓу кои и Катар.

Според изворите, Пентагон понудил да го купи авионот, а разговорите на почетокот биле за изнајмување. И покрај тоа, Трамп јавно го претстави потенцијалниот договор како „гест“ од катарското кралско семејство, кој ќе му служи додека не се испорача новиот Air Force One, а потоа би бил предаден на неговата библиотека.

Белата куќа и катарските власти нагласија дека трансферот ќе биде регулиран преку договор меѓу двете министерства за одбрана, што сè уште е предмет на правна анализа. Авионот, чија вредност се проценува на околу 400 милиони долари, веќе е разгледан од Трамп на аеродромот во Палм Бич.

Повеќе американски демокартски законодавци, но и некои републиканци, изразија загриженост околу етичноста на договорот. Дополнително, трансформацијата на авионот во безбедносно прилагоден претседателски авион би била многу скапа и би траела со години.

Оригинално порачаниот Air Force One што го изработува Боинг се очекува да биде готов во 2027 година — две години пред крајот на вториот мандат на Трамп. /МИА