Свет

По пет месеци затворените грчки војници во Турција се вратија дома

По пет месеци минати во затвор во Турција, двајцата грчки војници кои во март залутаа на турска територија, минатата ноќ се вратија во Грција со владин авион.

Како што јави грчката државна телевизија ЕРТ, авионот со војниците слета на аеродромот во Солун во 3.30 часот по локално време (2.30 часот по средно европско време), каде беа пречекани од грчкиот министер за одбрана Панос Каменос, началникот на Генералштабот на Вооружените сили на Грција, почесна гарда и нивните родители. Целиот настан беше директно пренесуван на ЕРТ.

По пристигнувањето на војниците, Каменос најави дека ќе му се јави на неговиот турски колега за да изрази задоволство од одлуката на Турција за нивно ослободување и дека ќе го покани да ја посети Грција.

– Се надевам дека нивното ослободување ќе отвори ново поглавје во грчко-турските односи. Можеме да живееме во мир за доброто на нашите два народи, изјави Каменос.

Војниците беа уапсени на 1 март годинава, кога за време на патрола долж грчко-турската граница во реонот на реката Марица, во услови на густа магла, залутаа и преминаа на територија на Турција.

Турските валсти ги обвинија за шпионажа и досега ги одбиваа барањата на Грција за нивното ослободување. Апсењето на двајцата војници предизвика дополнителни тензии и во онака напнатите грчко-турски односи.

Каменос во неколку наврати ги обвинуваше властите во Анкара дека војниците ги држат како заложници, со цел да издејствуваат нивна замена за турските осмутемина турски офицери кои по неуспешниот обид за пуч во Турција во јули 2016 година избегаа во Грција.

Атина одбива да ги екстрадира осумте офицери во Турција со образложение дека се сомнева оти тие ќе имаат правичен судски процес и дека нивните животи би биле во опасност.

Свет

Украина во војска ќе може да повикува и затвореници

Парламентот на Украина денеска гласаше за мерка со која се дозволува воена мобилизација на некои затвореници во замена за условно ослободување.

Повеќе од 26 месеци по почетокот на руската инвазија, Украина се обидува да го надополни недостигот од војници, што некои воени аналитичари го сметаат за најголем предизвик за Киев во борбата против многу поголемиот непријател.

Се очекува дека новата мерка ќе ги зајакне вооружените сили само за неколку од вкупно 20-те илјади затвореници, изјави пратеникот Дејвид Арахамиа.

Не се однесува на оние кои извршиле најтешки кривични дела – осудени за убиство со умисла на две или повеќе лица, силување, сексуално насилство, кривични дела против националната безбедност и тешки кривични дела за корупција.

„Не е тајна дека мобилизацискиот потенцијал на нашиот непријател е огромен, затоа мора да ги искористиме сите расположливи решенија за да се бориме како вооружена сила“, стои во белешката што ја придружува усвоената мерка. „Дел од тие луѓе се мотивирани патриотски граѓани кои се подготвени да се искупат пред општеството на бојното поле.“

Минатиот месец Украина ја намали возраста за мобилизација од 27 на 25 години и ги промени правилата за регрутирање цивили во армијата за да ја зајакне и да ги ротира војниците.

Владата, исто така, привремено ги суспендираше конзуларните услуги за работоспособните мажи кои живеат во странство, жалејќи се дека тие не и помагаат на нивната земја која се бори.