Судбина

Планинар едвај преживеал напад на пчели во национален парк- имал над 100 убоди

Вистинска драма се одвивала минатиот викенд на планинска патека во американската држава Аризона, каде што можело да загине еден планинар.

Несреќниот планинар бил нападнат од рој пчели и завршил со повеќе од 100 убоди. Набрзо, била организирана операција за спасување, а тој морал да биде пренесен со хеликоптер.

Несреќниот човек евакуиран со хеликоптер

Според соопштението од противпожарната служба, еден човек пријавил дека добил „повеќе од 100 убоди од пчели“ во саботата, околу 10 часот наутро.

Тој не можел да ја напушти заштитената зона Лукаут Маунтин Резерват, во северниот дел на Феникс, која е популарна кај планинарите, рекреативците и љубителите на природата, па спасувачите веднаш биле алармирани.

Несреќниот планинар бил подигнат од непристапниот терен со помош на специјална опрема и евакуиран по воздушен пат, со хеликоптер Фајрберд 10. После тоа, тој бил префрлен во подножјето на патеката, каде што го чекала амбулантна кола, и бил транспортиран во болница.

Инцидентот ги потсети властите на важноста на претпазливоста кога е на отворено, објавува Гардијан.

Пожарникарите ги повикаа планинарите да не ги вознемируваат кошниците за пчели, да не користат миризливи производи на отворено, да носат светла облека и, доколку наидат на рој пчели, веднаш да избегаат - заштитувајќи ги главите и лицата.

„Кога ќе се чувствуваат загрозени...“

Експертите предупредуваат дека повеќекратните убоди од пчели можат да имаат сериозни здравствени последици.

„Нивниот отров, во големи количини, практично го уништува мускулното ткиво“, рече професорот Френк Ловекио од Универзитетот во Аризона, додавајќи дека локалните пчели се познати по своето агресивно однесување.

Државата Аризона со децении се справува со проблемот со африканските пчели, кои пристигнале во овој дел од САД во 1990-тите. Тоа е агресивен вид, а дури и најмалото вознемирување може да предизвика напад од рој, загрозувајќи ги луѓето, домашните миленици и добитокот.

„Сè е во заштитата на матицата и кошницата. Кога ќе се чувствуваат загрозени, пчелите испраќаат сигнал до другите и потоа се случува масовен напад“, објасни професорот.

Невообичаено топлата зима оваа година доведе до зголемена активност на пчелите низ Аризона, а инцидентот од саботата е само еден во низата слични инциденти.

Во еден неодамнешен случај, рој пчели прекина фудбалски натпревар на универзитетски кампус во Темпе. Пет лица беа каснати, од кои едно заврши во болница.

Тагови: планинарот пчели

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

ВМРО-ДПМНЕ: Валбон Лимани бега од одговорност за скандалот со водата, СДС, ДУИ и Таравари го штитат со молк

Валбон Лимани, кандидатот на Филипче, Ахмети и Таравари, покажа дека за него најважно е да ја зачува функцијата, а не довербата на граѓаните.

Наместо да излезе пред јавноста со чувство на одговорност и да признае дека како градоначалник ја носи најголемата одговорност за случувањата во Општина Гостивар, тој избра да се огради од скандалот со водата и да порача дека не чувствува никаква морална одговорност.

Токму тоа е суштинската разлика меѓу политичарите кои преземаат одговорност и оние кои секогаш бараат изговори.

Кога целиот град е погоден од ваков сериозен проблем, граѓаните не очекуваат оправдувања, туку отчетност. Ако градоначалникот не е одговорен за работата на луѓето што самиот ги поставил да раководат со јавните претпријатија, тогаш кој е?

Дополнително загрижува молкот на СДС, ДУИ и Таравари. Наместо да побараат одговорност од својот кандидат, тие избраа да молчат. Очигледно, кога станува збор за нивни функционер, стандардите се менуваат, а принципите исчезнуваат.

Никој не смее да биде заштитен од политичка или институционална одговорност. Ги повикуваме надлежните институции целосно да го расчистат случајот, без селективност и без политички калкулации.

Граѓаните на Гостивар заслужуваат одговорност, а не ароганција, заслужуваат градоначалник кој ќе стои зад своите одлуки.

Оттука, сметаме дека моралната одговорност и политичките последици за Валбон Лимани се неизбежни доколку сака да покаже почит кон граѓаните на Гостивар.

Со почит,

Центар за комуникации на ВМРО-ДПМНЕ

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Втор ден од посетата на индиската претседателка- ќе ги посети Спомен-куќата на Мајка Тереза и Музејот на град Скопје и Охрид

Претседателката на Индија Друпади Мурму на вториот ден од официјалната посета на земјава, денеска заедно со претседателката Гордана Сиљановска Давкова ќе ги посетат Спомен-куќата на Мајка Тереза и Музејот на град Скопје.

Претседателката на Индија Друпади Мурму на вториот ден од официјалната посета на земјава, денеска заедно со претседателката Гордана Сиљановска Давкова ќе ги посетат Спомен-куќата на Мајка Тереза и Музејот на град Скопје, кадешто ќе се обратат на церемонија на откривање на биста на Махатма Ганди.

По церемонијата во Музејот на град Скопје, претседателката Сиљановска-Давкова и претседателката Мурму ќе се упатат кон Охрид, кадешто ќе го посетат манастирскиот комплекс Свети Наум, како и манастири и цркви во стариот град на Охрид.

Вчера, на првиот ден од посетата на индиската претседателката заедно со владината и бизнис делегацијата, на средба во Вила Водно со Сиљановска Давкова, ги потврдија пријателските односи, заедничките вредности и заемната почит меѓу Македонија и Индија.

Ова е прва посета на индиски претседател на државава.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Герасимовски: Работевме до доцна во ноќта, продолжуваме и утрово – сите екипи остануваат на терен

Екипите на Општина Центар работеа до доцна во ноќта на расчистување на последиците од силното невреме што ја зафати општината.

Веднаш по невремето беше свикан итен состанок на Општинскиот штаб за заштита и спасување, по што сите расположливи служби беа упатени на терен и започнаа со интервенции на најкритичните локации.

Во текот на ноќта беа расчистени повеќе локации во Капиштец, Дебар Маало, населба Пролет и потегот кај Соборниот храм, а екипите интервенираа и во Буњаковец, како и на други места каде што беа пријавени паднати дрвја, оштетувања и опасности за безбедноста на граѓаните.

„Работевме до доцна во ноќта и уште од раните утрински часови повторно сме на терен. Приоритет ни е да ги отстраниме сите опасности и што побрзо да ја нормализираме состојбата. Благодарам на сите служби за нивната пожртвуваност и на граѓаните за разбирањето, трпението и навремените пријави“, изјави градоначалникот Горан Герасимовски.

Општина Центар и понатаму ги повикува граѓаните да пријавуваат кризни локации, паднати дрвја, оштетувања на инфраструктурата или каква било ситуација што може да ја загрози безбедноста на следните телефонски броеви:

075 219 068
076 350 767

Секоја навремена пријава овозможува побрза реакција на терен.

Воедно, апелираме до граѓаните, онаму каде што имаат можност, да помогнат во расчистување на своите дворови и просторот пред своите домови, со цел побрзо нормализирање на состојбата.

Екипите на Општина Центар и денес продолжуваат со интензивни активности на терен и ќе интервенираат согласно приоритетите и пристигнатите пријави, сè до целосно санирање на последиците од невремето.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.