Македонија

Пендаровски: ВМРО-ДПМНЕ и Силјановска не го осудија упадот во Собранието

Пред две години на овој ден имавме една од најгрдите епизоди воопшто во историјата на модерна Република Македонија. 

Тој ден беше организиран упад во највисокиот законодавен дом во кој тогашната партија на власт се обиде да го спречи мирниот трансфер на власта. Партијата што тогаш тоа го организираше, ВМРО-ДПМНЕ и нејзиниот кандидат за претседател Гордана Силјановска ниту тогаш, ниту во изминатите две години, по кој било повод не кажа ниту еден збор осуда за тој чин што ја посрамоти Македонија и ја нареди во кругот на земји каде такви случаи се практикуваат во недостиг на базичен мир и безбедност за граѓаните.

Ова денеска го изјави кандидатот за претседател на СДСМ и коалицијата, Стево Пендаровски, кој рече дека на тој ден страдаа пратениците, новинарите, вработените во Собранието.

– Дел од луѓето кои упаднаа добија судски пресуди, за дел од нив постапките се во тек. Тоа што е најважно и што мислам дека треба во овој изборен контекст во пресрет на вториот изборен круг да се потенцира е дека не слушнавме политичка осуда, каква било осуда макар од човечки аспект на луѓето на политичката партија на кандидатите кои и сега ја бараат вашата доверба во пресрет на 5 мај, вториот круг на претседателските избори, истакна Пендаровски.

Во модерна Европа, нагласи, таков чин нема забележано во изминативе неколку векови.

– Ние бевме првата европска држава која тоа го направи и тие кои тоа го направија и ден денеска ја бараат вашата доверба врз истата платформа, врз истите политички постулати, велејќи дека сакаат повторно да дојдат на власт и колнејќи се во правото и во правдата. Почитувани граѓани сите тие флоскули, сите тие фрази за право и правдина би вределе, би имале тежина само ако во случај Силјановска и партијата која ја поддржува го осудат овој чин и конечно кажат дека од таквите луѓе кои тоа го организираа сите ние треба да се срамиме. Ова е многу побитно од тоа кој ќе добие на изборите, од пратенички мандати, од советнички мандати и од бројот на гласови што ќе го добиеме. Ова е побитно дури и од тоа дали ќе добиеме датум за преговори или нема да добиеме датум за преговори во јуни, рече Пендаровски.

Едноставно, додаде, како луѓе мораме да се погледнеме во очи и да си кажеме тоа не беше во ред, тоа не беше демократски и дека такви практики никогаш повеќе во оваа држава нема да се повторуваат.

Свет

Орбан: Претпоставките за врската на атентатот врз Фицо и војната во Украина се оправдани

Унгарскиот премиер Виктор Орбан смета дека е оправдано да се претпоставува дека има поврзаност меѓу атентатот на словачкиот премиер Роберт Фицо и војната во Украина.

Орбан рече дека „малку земји зборувале со гласот на мирот, освен неодамна Унгарија, Ватикан и Словачка“ и додаде дека „силните центри на моќ имаат интерес да ја продолжат војната“ во Украина, пренесува МТИ.

Унгарскиот премиер рече дека „сигурно е дека напаѓачот бил левичар и провоен“ и оти затоа претпоставките за поврзаноста меѓу атентатот и војната „не се неоправдани“ бидејќи, како што оцени, „постојат големи сили зад политичарите кои се за војна“.

„Оние кои се за мир не смеат да се плашат и мора да се соочат со империјата на Сорос и, доколку е потребно, со американската надворешна политика и мора јасно да кажат дека во интерес на Европа е страните да се вратат на преговарачка маса“, рече Орбан.

Македонија

Управен суд ја одби тужбата на „Европски фронт“ за избирачкото место 1470 во Долнени

Управниот суд денеска ја одби како неоснована тужбата од Коалицијата „Европски фронт“ на решението на Државната изборна комисија (ДИК) за прифаќање на приговорот од Коалицијата „Твоја Македонија" за избирачкото место 1470 во Долнени.

Коалицијата „Европски фронт“ поднесе седум тужби против решенија на ДИК на Парламентарните избори 2024. За сите се оформени предмети и закажани во текот на денешниот ден.

Досега Управниот суд ja одби како неоснована и тужбата за избирачкото место 1194 во Општина Крушево.

ДИК на 104 седница ги разгледа приговорите поднесени од политичките партии по одржувањето на парламентарните избори на 8 мај. Од вкупно 27 поднесени приговори - девет од коалицијата „Влен“, осум од ВМРО-ДПМНЕ, пет од СДСМ и четири од Левица, прифатени беа седум и тоа шест во Петтата изборна единица и еден во Шестата изборна единица.

Во Изборната единица 5 прифатени беа приговорите за избирачките места 1272 во Охрид, 1194 и 1202 во Крушево, 1844 во Струга, 1470 и 1470/1 во Долнени. Во Изборната единица 6 прифатен е еден приговор за избирачкото место 2101 во Желино.

Според првичните официјални резултати за парламентарите избори што ги објави ДИК, Коалицијата „Твоја Македонија“ предводена од ВМРО-ДПМНЕ има освоено 58 пратенички мандати, по што следуваат Коалицијата „Европски фронт“ предводена од ДУИ со 19 пратенички мандати, Коалицијата за европска иднина предводена од СДСМ со 18, Коалицијата „Вреди“ со 13, а Движење ЗНАМ за наша Македонија и Левица по шест пратенички мандати.

Фудбал

Јувентис го смени тренерот Алегри- дивеел по победата во Купот на Италија

Јувентус го отпушти тренерот Масимилијано Алегри два дена по освојувањето на Купот на Италија победувајќи ја Аталанта во финалето.

Во официјалното соопштение, клубот од Торино објасни дека Алегри добил отказ поради „однесување за време и по финалето на Купот на Италија, кое клубот го смета за некомпатибилно со вредностите на Јувентус“.

Да потсетиме, дивеењето на Алегри започнало кога беше исклучен поради протестирање на судиската одлука. Во исто време, тој го започна своето шоу во кое што од бес ја соблече јакната и им се фрли во лице на другите, а по исклучувањето ја соблече и вратоврската, ја фрли и почна да си ја откопчува кошулата.

Неговиот конфликт не застана тука. Пред доделувањето на трофејот, тој беше снимен како го турка спортскиот директор на клубот, Кристијано Џунтоли. По натпреварот тој ги навредуваше и новинарите. Директорот на италијанскиот Tuttosport Гвидо Вакаиго откри: „По натпреварот Алегри ми кажа дека сум лут менаџер и дека треба да ја напишам вистината во весникот, а не она што клубот ми го сервира“.

Потоа го цитираше Алегри и неговите закани: „Ми рече: „Гледај, знам каде можам да те најдам. Знам каде можам да те начекам. Ќе дојдам и ќе ти ги скинам двете уши. Ќе дојдам и ќе ти удрам тупаница во лице, почни да ја пишуваш вистината во твоите весници.“

Претходно се очекуваше дека Јувентус ќе се раздели со Алегри на крајот од сезоната, иако тој имаше уште една година од договорот. Сепак, Алегри нема да го дочека крајот на сезоната и во последните два натпревари од сезоната тимот ќе го предводи Уругваецот Пауло Монтеро, кој досега беше тренер на селекцијата до 19 години. Фабрицио Романо пишува дека Јувентус веќе испратил официјална понуда до тренерот на Болоња, Тиаго Мота, кого сакаат да го доведат следната сезона.

Ова беше втор мандат на Алегри на клупата на Јувентус, а започна на стартот од сезоната 2021/22, кога го наследи Андреа Пирло. Годинешниот Куп е единствениот трофеј што Јувентус го освоил во тој период. Првиот мандат на Алегри, кој траеше од 2014 до 2019 година, беше многу поуспешен. Потоа беше шампион во сите пет сезони, а четири пати ја освои двојната круна, додека два пати играше и во финалето на Лигата на шампионите.

притисни ентер