Патниците на удар- Европската Унија сака да им го наплаќа и рачниот багаж и да нема отштета - Канал 5

Свет

Патниците на удар- Европската Унија сака да им го наплаќа и рачниот багаж и да нема отштета

Европската Унија подготвува контроверзни измени во регулативите што би можеле значително да влијаат на правата на патниците во авионите.

Патниците на удар- Европската Унија сака да им го наплаќа и рачниот багаж и да нема отштета

На состанокот на амбасадорите на земјите-членки во Брисел во среда, 4 јуни, ќе бидат разгледани предлози за да им се дозволи на авиокомпаниите да наплаќаат за рачен багаж и да се продолжи минималното времетраење на доцнењата на летовите што им дава право на патниците на надомест.

Предлогот за реформа, кој доаѓа од актуелното претседателство со Советот на ЕУ - Полска, е дел од поширок пакет што има за цел да ја модернизира Регулативата на ЕУ за правата на патниците во авионите, која датира од 2004 година. Планираните промени предизвикаа силни реакции и од организациите за заштита на потрошувачите и меѓу самите превозници, а конечната одлука би можела да има далекусежни последици за патниците низ цела Европа, како и за регионот.

Дали рачниот багаж повеќе нема да биде бесплатен?

Една од централните точки на предлогот се однесува на рачниот багаж. Имено, нацрт-реформата предвидува дека авиокомпаниите ќе имаат законско право да наплаќаат за рачен багаж што не може да се складира под седиштето. Патниците би можеле да внесат само една мала торба или ранец без дополнителен надомест, додека куферите и другите предмети од багажот сместени во полиците во кабината би можеле да се наплаќаат.

Оваа практика веќе постои кај неколку нискобуџетни превозници како што се „Рајанер“, „Виз Ер“ и „ИзиЏет“, но досега беше предмет на бројни жалби и судски случаи. Европската организација на потрошувачи BEUC неодамна поднесе формална тужба против седум нискобуџетни авиокомпании, обвинувајќи ги за нелегално наплаќање за услуги што треба да бидат дел од основната цена на билетот.

„Судот на правдата на ЕУ веќе јасно пресуди дека рачниот багаж со разумна големина е дел од основната услуга и дека не треба да подлежи на дополнителен надомест за негово носење во кабината“, рече Стивен Бергер од BEUC, предупредувајќи дека новите правила ќе легализираат надомест што претходно беше нелегален.

Од друга страна, авиокомпанијата A4E (Авиокомпании за Европа), која ги обединува најголемите европски превозници, го брани предлогот како начин за хармонизирање на различните практики на пазарот. „Сегашната иницијатива ги специфицира само димензиите на личните предмети со цел да се обезбеди транспарентност за сите патници и авиокомпании“, рече Кевин Хајни, директор за комуникации на A4E.

Продолжување на рокот за надомест

Уште поголем отпор предизвикува предлогот за промена на сегашното правило според кое патниците имаат право на надомест од 250 до 600 евра ако нивниот лет е одложен за три часа или повеќе. Според новиот нацрт, тој праг би се поместил на четири или дури шест часа, во зависност од должината на планираното патување.

Европската комисија предложи зголемување на прагот на пет часа уште во 2013 година, но тој предлог беше повлечен поради јавното негодување. Сега, полскиот предлог се движи во иста насока, предизвикувајќи стравувања дека милиони патници ќе го изгубат правото на надомест.

„Доколку овој предлог се усвои, многу патници кои денес имаат право на надомест, повеќе нема да го имаат утре“, предупредува Бергер од BEUC. „Тоа би бил сериозен удар врз темелите на правата на патниците во ЕУ.“

Од друга страна, организацијата A4E верува дека пофлексибилните рокови би им помогнале на авиокомпаниите подобро да управуваат со кризни ситуации. „Заменувањето на авион или екипаж по технички проблем може да потрае. Продолжувањето на рокот за надомест би ни овозможило пореално да управуваме со операциите“, смета Хајни.

Спор во рамките на ЕУ, Шпанија и Германија против промените

Во моментов нема договор за овие прашања во Советот на ЕУ. Германија и Шпанија јасно се изјаснија против олабавување на правата на патниците, додека другите земји-членки, особено од Источна Европа, се наклонети кон пофлексибилен пристап во корист на авиокомпаниите. Според правилата на ЕУ, десетина земји-членки можат да формираат малцинство кое ја блокира одлуката, оставајќи го исходот од преговорите отворен.

Интересно е што шпанскиот пазар е еден од најактивните во заштитата на правата на патниците - минатата година, властите во Мадрид казнија пет авиокомпании со вкупно 179 милиони евра за неосновани трошоци за рачен багаж.

Предлогот за измена на правата на патниците предизвика жестока дебата меѓу здруженијата на потрошувачи и авиоиндустријата. Додека некои го гледаат надоместокот за рачен багаж и продолжувањето на рокот за надомест како чекор назад во заштитата на патниците, други веруваат дека промените се неопходни за модернизирање на пазарот и за да им се овозможи на авиокомпаниите „подобро да управуваат со кризни ситуации“.

Конечната одлука ќе зависи од сложената политичка динамика во рамките на ЕУ, но и од подготвеноста на земјите-членки да ги бранат интересите на своите граѓани. Доколку се усвои во предложената форма, реформата би можела да означи нова ера во европскиот воздушен транспорт - ера во која патниците плаќаат повеќе, а добиваат помалку.

Тагови: патниците багаж

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Делегација на МЕРМС во Женева

58% од инсталираниот капацитет е од обновливи извори – следен чекор модерна мрежа и складирање.

Делегација на МЕРМС во Женева

Делегација од Министерството за енергетика, рударство и минерални суровини учествуваше на UNECE Sustainable Energy Week која се одржа во Палатата на нациите во Женева, со фокус на прашањата поврзани со енергетската транзиција, енергетската безбедност, достапноста на енергијата и одржливиот развој.

Во рамки на настанот се одржаа состаноци на Групата експерти за енергетска ефикасност (GEEE), Групата експерти за почисти електроенергетски системи (GECES) и Групата експерти за обновлива енергија (GERE), како и 35-тата сесија на Комитетот за одржлива енергија на UNECE (CSE).

Во рамки на 13-тата сесија на Групата експерти за обновлива енергија (GERE-13), на панел-дискусијата Exchange of experiences on how to increase the uptake of renewable energy, Марко Минов од Секторот за обновливи извори на енергија, го претстави напредокот во спроведувањето на регулаторната рамка од Законот за енергетика и новиот Закон за користење на енергијата од обновливи извори, со кои се унапредува интеграцијата на енергетскиот пазар и се создаваат предвидливи услови за развој и инвестиции во обновливите извори.

Како клучни реформи беа опфатени прекуграничната распределба на капацитети, балансирањето, оперативната сигурност, гаранциите за потекло, активните потрошувачи, енергетските заедници и конкурентните механизми за поддршка на производството од обновливи извори на енергија.

Во излагањето, Минов го истакна и значителниот раст на капацитетите од обновливи извори на енергија во Македонија, особено на фотонапонските електроцентрали, а ги претстави и Годишните планови за изградба на енергетски објекти како инструмент за предвидлив и координиран развој на енергетскиот сектор и систематско планирање на нови производни капацитети и системи за складирање на енергија.

Во рамки на дискусијата, меѓу другото беше нагласено и дека: „зголемувањето на капацитетите од обновливи извори е само дел од енергетската транзиција. Следниот предизвик е електроенергетскиот систем да стане пофлексибилен, поотпорен и способен да интегрира сè поголеми количини на варијабилни обновливи извори. Интеграцијата на нови капацитети од обновливи извори, модернизацијата на мрежна инфраструктура, пазарните механизми и складирањето на енергија ќе биде важен дел од идниот развој на енергетскиот систем“.

Во рамки на 35 сесија на Комитетот за одржлива енергија (CSE-35) на тема Strengthening Energy Security, Affordability and Sustainability in an Uncertain World, меѓу другото беше одржана и дискусија на високо ниво, посветена на приоритетите, предизвиците и можностите за зајакнување на енергетската безбедност, достапноста и одржливоста.

Во рамки на сесијата, Елена Ивановска, кабинетски службеник задолжен за следење на стратешките приоритети на Владата, која воедно претседаваше и со сесијата System-wide Solutions to Strengthen Energy Security, Affordability and Sustainability, се обрати во име на Македонија, претставувајќи ги приоритетите на земјата и конкретните активности за унапредување на сигурноста, достапноста и одржливоста на енергетскиот систем.

Во своето обраќање, Ивановска истакна дека за Македонија, трите цели (енергетската сигурност, достапноста и одржливоста) се тесно поврзани и дека забрзувањето на развојот на обновливите извори, намалувањето на зависноста од увоз на електрична енергија и обезбедувањето сигурно снабдување бараат модерна, отпорна и регионално поврзана електроенергетска мрежа.

Посебен акцент беше ставен на потребата развојот на мрежната инфраструктура да го следи брзиот раст на обновливите извори. Во таа насока, беше посочено дека Македонија од 2021 година, кога обновливите извори сочинувале околу 38% од инсталираниот производен капацитет, до 2025 година достигнала учество од околу 58%, со повеќе од 1.750 MW инсталирани капацитети од обновливи извори.

Брзиот развој на сончевата енергија носи и нови барања за преносниот систем, особено поради децентрализираното варијабилно производство, двонасочните текови на електрична енергија и потребата од балансирање на системот.

Ивановска посочи и на потребата од значителни инвестиции во преносната мрежа, унапредување на регионалната соработка и развој на механизми за флексибилност, батериски системи за складирање енергија и управување со потрошувачката.

Учеството на претставниците од Министерството: Елена Ивановска, Билјана Матевска, Марко Минов, Сара Кочева, Ангела Алексова, Ненад Стојковски и Љубица Трајковска Лешоска претставуваше можност за размена на искуства со земјите членки на UNECE, претставници на меѓународни организации и експерти од областа на енергетиката, особено во делот на забрзувањето на енергетската транзиција и создавањето пофлексибилни, сигурни и одржливи енергетски системи, но и можност за претставување на реформите и искуствата на нашата земја.

Државата останува посветена на сигурна, достапна и одржлива енергетска транзиција, со фокус на понатамошно зголемување на производството од обновливи извори, модернизација и проширување на мрежната инфраструктура, развој на складирањето на енергија, унапредување на пазарната интеграција и создавање предвидлива регулаторна рамка за нови инвестиции.

Пораката од Женева е јасна: амбициозниот развој на обновливите извори мора да биде проследен со инвестиции во мрежата, флексибилност, складирање, регионална поврзаност и институционален капацитет.

Само преку интегриран пристап може да се изгради енергетски систем кој истовремено ќе биде сигурен, отпорен и одржлив.

Со почит,

Министерство за енергетика, рударство и минерални суровини

Тагови: МЕРМС

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Лишени од слобода се 12 возачи поради сторено кривично дело „безобѕирно управување возило“

Во текот на изминатото деноноќие, на различни локации во државата, лишени од слобода се 12 возачи поради сторено кривично дело „безобѕирно управување возило“.

Лишени од слобода се 12 возачи поради сторено кривично дело „безобѕирно управување возило“

Од нив, осуммина управувале возило без положен возачки испит и тоа: М.Љ.(40), А.Ш.(22) и Ј.Б.(30) сите од Скопје, И.Р.(24) од с.Света Петка, скопско, А.Р.(23) од с.Беловиште, гостиварско, С.А.(35) од с.Мелница, велешко и Н.М.(28) од с.Зрновци, кочанско и 17-годишник од село во Општина Градско.

Под дејство на алкохол управувале две лица и тоа: Н.П.(29) од Куманово и М.Н.(19) од Скопје. Додека пак, со забрана за управување со моторно возило управувале С.Н. (37) од Кичево и Р.Х.(37) од с.Рашче, скопско.

По целосно документирање на случаите, ќе бидат поднесени соодветни кривични пријави.

Апелираме до сите учесници во сообраќајот да ги почитуваат сообраќајните правила и прописи, да не управуваат возило без положен возачки испит или доколку имаат изречена мерка за забрана за управување или доколку се под дејство на алкохол и сите заеднички да придонесеме за побезбеден сообраќај.

Тагови: безобѕирно управување

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Лишен од слобода бугарски државјанин на Граничниот премин Богородица поради фалсификувана исправа

На 02.10.2026 во 09:50 часот на Граничен премин Богородица, полициски службеници го лишија од слобода И.А.И.(58) од Бугарија поради основано сомнение за сторено кривично дело „фалсификување исправа“ по член 378 од Кривичниот законик.

Лишен од слобода бугарски државјанин на Граничниот премин Богородица поради фалсификувана исправа

Известен е јавен обвинител, по што лицето е предадено во полициска станица Гевгелија и по целосно документирање на случајот ќе биде поднесена соодветна пријава.

Тагови: бугарски државјанин

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер