Од 25 кандидати за градоначалници кои ја добија довербата од Мицкоски и партискиот врв на ВМРО-ДПМНЕ во првиот круг, 22-ца веќе ги водат нивните општини во изминативе четири години, додека тројца кандидати се за општините Чучер Сандево, Делчево и Берово, каде ВМРО-ДПМНЕ не е на власт, туку коалицијата на СДСМ. За кандидат за градоначалник на Скопје партиите се уште немаат конечна одлука.
Од СДСМ засега се извесни кандидатурите на актуелните градоначалници - Горан Герасимовски за Општина Центар и на Томе Христоски за Крушево, а можно е поддршка за уште една изборна трка да добие актуелниот градоначалник на Крива Палнка, Сашко Митовски. За останатите кандидати се уште траат партиските анализи и во СДСМ и во опозициската ДУИ.
Според политичкиот аналитичар Петар Арсовски главните пораки на партиите во изборната кампања ќе бидат околу темите за кои тие се најсигурни, власта за инвестиции и инфраструктура, опозицијата – дека не фукционира системот.
-Во изборот на советнички листи најголемо влијание ќе има рејтингот на партиите, бидејќи таму се гласа за партии. Кај изборот на градоначалници повторно најголемо влијание има партијата, но значајно влијание има и личноста на кандидатот особено таму кадешто се работи за тековни градоначалници кои сакаат да се обидат за уште еден мандат. Што се однесува до главните пораки мислам дека власта ќе атакува на инвестиции, инфраструктура и градба, имајќи предвид дека е тоа национална тема по која Владата доста потроши енергија и напор во последниот период. Опозицијата ќе атакува на задржување на некои енклави кои веќе ги има и на напад дека не функционира системот. На некои места тоа ќе функционира како порака, на некои не, смета Арсовски.
И покрај постојаните барања на ДУИ и Ахмети за предвремени парламентарни заедно со локалните избори наесен, Арсовски смета дека ова е малку веројатно сценарио со оглед на роковите, но не ја исклучува можноста исходот од локалните да биде катализатор за одржување на брзи парламентарни избори согласно резултатите.
-Власта или мнозинството да имаше намера да распишува предвремени парламентрани избори заедно со локалните некаков сигнал за тоа ќе се појавеше во јавноста. Особено што не е голема тајна дека ВМРО-ДПМНЕ не го претпочита ДУИ како коалиционен партнер па затоа мислам дека има некако отпор кон задоволување на токму тие барања. Е сега, дали резултатите на локалните избори ќе предизвикаат брзи предвремени парламентарни избори ќе зависи од самите резултати. Раслојувањето на ВЛЕН може да доведе до тоа ДУИ да има повеќе гласови, но коалицијата на ВЛЕН со ВМРО-ДПМНЕ може да донесе ВЛЕН да има повеќе градоначалници. И двете групи да прогласат победа на изборите. Така што мислам дека за тоа каков катализатор ќе бидат локалните кон предвремени парламентарни треба да ги почекаме тие резултати.
Во следниот период се очекува и останатите партии да ги објават имињата на нивните кандидати за избората трка. Она што е извесно е дека и актуелниот градоначалник на Куманово и претседател на партијата ЗНАМ, Максим Димитриевски влегува во трката по трет мандат, но останува неизвесно дали ВМРО-ДПМНЕ ќе го поддржи коалицискиот партнер за уште еден мандат во Куманово или ќе оди со свој кандидат. Од ЗНАМ информираа дека преговорите за поддршка на претстојните локални избори од ВМРО-ДПМНЕ во некои општини се во тек, а засега може да се потврди дека ќе имаат свој кандидат во најмалку една од скопските општини.
Од албанските партии веќе ги разгледуваат можните кандидати, а нивната битка ќе биде жестока за Струга, Кичево, Тетово, Гостивар и Чаир.