Во тешката пазарна средина, VW лани испорачал 5,32 милиони возила на клиенти низ целиот свет, што е скоро за еден милион помалку отколку претходната година, покажува извештајот објавен во вторникот. Најголем пад на побарувачката е забележан на западноевропскиот пазар, каде продажбата паднала за 23,4 проценти, додека во Кина падот бил значително помал и изнесувал 9,9%.
Податоците од областа на електромобилноста, на кои Фолксваген е целосно посветен, се охрабрувачки. Неговите бројки за целосно електрични возила (BEV) се скоро тројно зголемени, додека испораките на сите категории електрични автомобили, вклучително и plug-in хибриди, се зголемиле за повеќе од двапати.
„Ауди“ објави лани испорачани над 1,69 милиони возила на клиенти ширум светот, што е за 8,3 проценти помалку од претходната година. Во Кина, продажбата се зголемила за околу пет проценти, но вкупниот годишен резултат се должи на падот во Европа и САД, каде влијанието на пандемијата е подолготрајно.
Меѓу германските производители на луксузни автомобили, „Ауди“ минатата година се најде на третото место, зад „Мерцедес-Бенц“ на „Дајмлер“, со продадени 2,16 милиони автомобили и „БМВ“, кој продал 2,03 милиони, според агенцијата ДПА.