Иако организаторите на женевскиот автомобилски саем во четврток соопшија дека манифестацијата ќе се одржи по планот од 3 до 15 март, новонастанатите околности и зголемениот број на заразени од коронавирус влијаеја на тоа швајцарските федерални власти да донесат одлука која всушност го забранува одржувањето на саемот во таа земја.
Владата на Швајцарија соопшти дека забраната за одржување на настани на кои присуствуваат повеќе од 1000 луѓе, ќе трае најмалку до 15 март, а токму во тој период и беше планиран саемот за автомобили во Женева.
Инаку, организаторите на саемот, кои во средата одржале состанок по повод новите околности кога станува збор за ширењето на епидемијата на коронавирусот на овој дел од Европа, вклучувајќи ја северна Италија, Австрија, Франција, Германија но и првиот забележан случај на заболување во Швајцарија, во четврток тие беа за тоа саемот сепак да се одржи, како што било предвидено.
Сепак подоцна тој ден, најавено е дека одлуката повторно ќе биде разгледана во петок.
Во муѓувреме се огласија и властите со забрана за поголеми собири, па организаторите практично се доведени пред свршен чин.
Потсетуваме, заради епидемијата на коронавирусот веќе е одложен автомобилскиот саем во Пекинг, кој треба да се одржи во април.
Саемот за автомобили во Женева е една од најважните и најдолговечни автомобилски манифестации, а оваа година требаше да се одржи по 90 пат.
Организаторите на вонредна прес конференција соопштија дека саемот е откажан, а не одложен, затоа што од логистички и други причини, не е можно да биде одржан во некој друг термин оваа година. Учесниците се замолени до 7 март да ги демонтираат своите штандови од изложниот центар.