Со критика за судските органи, Гир изјави дека владеењето на правото е еден од клучните принципи, кој е под постојан мониторинг од Европската Унија.
По реакциите на претседателот Пендаровски и министерот за правда Лога, и премиерот Ковачевски даде своја оценка- за него случувањата во Судскиот совет се недолични, но уверува дека во судската власт нема политички влијанија.
-Разрешувањето на претседателката на Судскиот совет беа сцени кои не доликуваа на највисокиот орган во правосудството. Судската власт е независна, извршната власт е независна и законодавната власт е независна. Секој мора да си ги извршува работите во рамките на своите надлежности. Дали некој им се мешал тоа ќе треба самите да го пријават низ соодветна процедура,- Димитар Ковачевски – претседател на Влада.
Лидерот на опозициската ВМРО-ДПМНЕ Мицкоски, ги нарече срамни кавгите во Судски совет, а смета и дека ќе се рефлектираат на меѓународниот углед на државата.
-Гледате таму партиски кланови се борат за превласт, кој да биде претседател, па кој да биде после избран за судија, таков еден срам, такво едно девалвирање, таков вандализам и вагабонтство на отворена сцена Македонија не познава. Ова дури и на држави со апсолутистички режим како Северна Кореја не им е пракса. Ја повикувам и меѓународната заедница, овие луѓе што се во владата не им е гајле за народот што мисли тие тоа го кажуваат јавно, тие многу повеќе сакаат да коленичат и да веднат глава пред вас во вашите кабинети, кога го газат дебелиот килим и во Брисел и во вашите амбасади овде, кажете им да заминат така ќе го спасите и народот и државата и самите себе,- Христијан Мицкоски – претседател на ВМРО-ДПМНЕ.
Скандалозно е разрешувањето на Дамева, правосудството уште еднаш потфрли и станува средство во рацете на политичарите и подземјето- реагираа и од Алтернатива на Африм Гаши. Како што се одвиваат работите во Македонија во областа на правото, многу брзо ќе бидеме принудени да бараме меѓународен протекторат на целокупниот правосуден систем.- стои во партиското соопштение.
Вчера, седницата за избор на нов претседател на Судскиот совет се одложи за во вторник. Дали процедурата за разрешувањето на Дамева е законита или не, и понатаму останува дилема.