Македонија

Орбан: Груевски ми е сојузник, а кон сојузниците треба да сме чесни

Виктор Орбан си го отвори срцето за случајот Груевски. Во интервју за државното радио Кошут, унгарскиот премиер вели дека доделениот политички азил е природна реакција, кога сојузник од сојузник ќе побара помош.

Поранешниот македонски премиер имаше клучна улога во справувањето со нелегалната миграција, потенцира Орбан. Уверува дека ова не е прв пат Будимпешта да заштити важни луѓе, но дека ниту еден случај не покренал толку реакции.

-Ако не беше поранешниот македонски премиер, Груевски, ќе ни беше многу тешко да ја заштитиме унгарската граница, и покрај тоа што поставивме ограда. Тој побара помош од нас и ние му помогнавме, зашто искрено ги третираме своите сојузници.

Зад прогонот на поранешниот премиер стои организацијата поврзана со Џорџ Сорос. Унгарија ќе му обезбеди праведен третман на Груевски, а ние како Влада нема да се мешаме во правните процедури. Надлежните органи во Унгарија и ќе одлучат што ќе прават во врска со барањето за негова екстрадиција, изјави Виктор Орбан, премиер на Унгарија

Доби ли со овие изјави Брисел разумно објаснување за азилот на Груевски, како што со денови бараше од Орбан засега не е познато. Она што е познато е дека унгарскиот лидер во интервјуто користеше реторика, на која со години му забележува Европската Унија. Орбан веројатно добро го помни минатогодишниот настап на поранешниот белгиски премиер Верхофштат во Европскиот Парламент, кога буквално го понижи Орбан, сумирајќи го неговиот политички пат од прогресивен социјален либерал во доцните 80-ти.

Во тоа време, вам ви помагаше Џорџ Сорос, го помнам тоа. Вие бевте Емануел Макрон во Унгарија во 1989-тата, иако Макрон не би бил задоволен од ова што го кажувам денеска.

А, листата на она што го направивте е долга: вознемирување невладини организации, репресија врз критички медиуми, подигање ѕидови. Планиравте да воведете и смртна казна во земјата.

Моето прашање е колку далеку планирате да одите? , изјави Ги Верхофштат, поранешен премиер на Белгија, лани во Европскиот Парламент.

Унгарските медиуми вчера објавија дека Груевски е единственото лице кое добило азил во Унгарија во последниве пет месеци, алудирајќи на ригорозната мигрантска политика на земјата.

Автомобилизам

Трикратниот шампион Игор Иџе Стефановски во поход по нова европска титула

Трикратниот европски шампион, Игор Стефановски Иџе овој викенд со трката во Австрија започнува нова сезона во која ќе се обиде да стигне до четвртата титула во Европскиот шампионат на ридски патеки (еHC).

Летечкиот Македонец, Игор Стефановски викендов пред нов предизвик. Во Австрија, на патеката Рекбер тој ќе го започне својот најнов поход на Европскиот шампионат на ридски патеки, кој и годинава има 10 трки. Шампионатот започнува на 28.04.2024, а ќе заврши во септември со трката во Хрватска.

Стефановски и оваа сезона не ги крие своите шампионски амбиции, за кои верува дека ќе може да се реализираат, особено затоа што годинава на патеката ќе управува со новиот автомобилски ѕвер од Ферари 488 B8, специјално дизајниран за овие патеки.

„Очекувам добра трка. Посакувам да постигнеме одличен резултат. Би сакал да се заблагодарам на мојот тим, како и на тие кои го препознаа потенцијалот и ме поддржуваат за натпреварувањата во оваа сезона, особено моите спонзори кои веруваат во мојот потенцијал “- вели Стефановски.

Минатата година Иџе во текот на целата сезона беше во сигурна доминација со седум победи на 10 трки.

Фудбал

Чави останува на клупата на Барселона до крајот на договорот, јуни 2025 година

Шпанската легенда Чави ќе остане тренер на фудбалерите на европскиот гигант Барселона до јуни 2025 година.

Фудбалскиот тренер на Барселона, Чави Ернандез, ќе остане во каталонскиот клуб до крајот на договорот, односно до јуни 2025 година, јавуваат шпанските медиуми.

Чави во јануари годинава објави дека ќе го напушти клубот на крајот на сезоната. Шпанските медиуми пренесуваат дека Чави одлучил да остане во клубот до крајот на договорот за време на денешниот разговор со претседателот на Барселона Жоан Лапорте и спортскиот директор Деко.

Чави наводно ги прифатил условите на челниците на Барселона на средбата со клупските челници, а каталонскиот клуб во наредниот период треба официјално да ги соопшти деталите од договорот.

44 годишниот Чави ја презеде Барселона во 2021 година. Каталонскиот клуб е на второто место во поредокот во Ла Лига со 11 бодови помалку од првопласираниот Реал.

Македонија

Николоски од Подгорица: Полноправното членство во ЕУ најбрзо преку економското приближување

  Економското приближување на земјите од Западен Балкан до ЕУ е вистинската формула за остварување на нашата заедничка цел како регион - полноправно членство во ЕУ. 

Имплементацијата на реформите се вистинскиот чекор, а тие чекори се поттикнати и со новиот План за раст на Западен Балкан на кој интензивно работиме и од двете страни и земјите од регионот и ЕУ, порачал заменик-министерот за финансии Филип Николоски кој во Подгорица учествува на состанокот на министри од регионот и претстаници од ЕУ посветен на Планот за раст на Западен Балкан.

- Ваквиот регионален формат на состанување, кој е трет посветен на Планот за раст, претставува ефикасен модел за забрзување на реформската агенда. Реформската агенда во РС Македонија е веќе усвоена од страна на Владата и испратена во ЕК. Она што е важно е да дадеме поттик во остварување на тие реформски процеси и да го забрзаме нивното спроведување. Тоа ќе биде нашиот вистински пат за да стигнеме до ЕУ, истакнал заменик-министерот Николоски.

Како што соопшти Министерството за финансии, на регионалниот состанок Николовски се осврнал на конкретните активности што ги презема Владата во однос на пристапувањето на земјата кон СЕПА регионот и унапредување на зелените коридори.

- РС Македонија изрази подготвеност да ги исполни критериумите за блиски економски и правни односи со ЕУ и подготвеност да врши платни трансакции во евра преку пристапувањето во СЕПА. Тоа од причина што ќе придонесе за отстранување на пазарните бариери со земјите од ЕУ, подигнување на кредибилитетот на финансискиот сектор на меѓународната сцена, продлабочување на трговските односи со европскиот економски регион, поедноставни, побрзи и поевтини услуги за граѓаните и компаниите. Барањето е подготвено и се очекува да се поднесе апликацијата до средината на оваа година, нагласил Николоски.

Тој додал дека дополнителни придобивки се очекуваат и од унапредувањето на зелените коридори кои беа воспоставени за време на ковид-кризата.

- Постојните зелени ленти веќе придонесоа за намалување на времето на чекање на граничните премини, а со нивното натамошно проширување, ќе се обезбедат непрекинати синџири на снабдување и засилена трговија, што ќе го направи регионот поатрактивен за инвеститорите Со нивното проширување ќе се вклучат повеќе видови стоки коишто ќе бидат опфатени со зелените коридори, како и гранични премини меѓу Европската унија и земјите од Западен Балкан, рекол заменик-министерот за финансии.

Притоа посочил на поддршката што ЕУ ја дава во областа на царината, како и на посветеноста на Владата во спроведување на националните реформи во оваа област. Тој нагласил дека понатамошното унапредување на царинската соработка треба да се фокусира не само на олеснување на трговијата, туку и на заштита на финансиските интереси и на ЕУ и на земјите од Западен Балкан, како и на безбедноста граѓаните.

Ова е трет министерски состанок посветен на Планот за раст. Првиот се одржа во Скопје, вториот во Тирана и на денешниот состанок домаќин е Подгорица.

притисни ентер