Тоа е нова иницијатива за поттикнување на компаниите и владите да ги намалат емисиите на стакленички гасови.

Новиот систем наречен МАРС е резултат на ветувањето потпишано минатата година од 119 земји за намалување на емисиите на метан за 30 отсто оваа деценија. Научниците нагласуваат дека оваа цел е клучна за борбата против климатските промени.

„МАРС е голем чекор во помагањето на владите и земјите да ја постигнат оваа важна, краткорочна цел за климата“, рече Ингер Андерсен, извршниот директор на УНЕП, во изјавата на самитот за климата COP27 во Египет.

„Намалувањето на емисиите на метан може да донесе брза и голема промена бидејќи тој гас ја напушта атмосферата многу побрзо од јаглерод диоксидот“, додаде таа.

Метанот е безбоен, запалив гас без мирис, кој најмногу се појавува во депониите, во земјоделството, сточарството и при екстракција на нафта и гас. Во однос на количината, по јаглерод диоксидот, тој е втор најзастапен стакленички гас во атмосферата и е одговорен за околу една четвртина од затоплувањето на планетата.

На глобално ниво, метанот е одговорен за околу 30 проценти од затоплувањето, според Обединетите нации.

Иако метанот ја загрева планетата 80 пати посилно од јаглерод диоксидот, тој исчезнува од атмосферата за две децении, додека јаглеродниот диоксид останува стотици години, па се верува дека неговото намалување брзо ќе влијае на глобалното затоплување.

Системот МАРС ќе ја користи постоечката мрежа на сателити за да го открие гасот ширум светот, да определи колкаво е истекувањето и да ги идентификува одговорните компании и влади, соопшти УНЕП. Програмската опсерваторија потоа ќе ги сподели тие информации со одговорните засегнати страни за да се поправи истекувањето.

По период од 45 до 75 дена, опсерваторијата ќе објави информации за истекувањето и одговор од компанијата или владата во базата на податоци.

Системот прво ќе се фокусира на светските постројки за нафта и гас, еден од најголемите извори на метан, по што ќе се префрли на индустријата за јаглен, отпадот, сточарството и производството на ориз. Иницијативата делумно ќе биде финансирана од САД и Европската унија, заедно со филантропските организации на основачот на Амазон ,Џеф Безос и Глобалниот центар за метан.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.