Огњановски за МИА: Корупцијата во фокусот на петтата сезона на Фчерашни, никој нема да биде поштеден - Канал 5

Забава

Огњановски за МИА: Корупцијата во фокусот на петтата сезона на Фчерашни, никој нема да биде поштеден

Корупцијата ќе биде во фокусот на петтата сезона на Фчерашни новости – емисија што на интересен и забавен начин, преку хумор, сатира и исмејување ги критикува носителите на власта во државата, но и секојдневните општествени збиднувања.

Огњановски за МИА: Корупцијата во фокусот на петтата сезона на Фчерашни, никој нема да биде поштеден

Во новата сезона, како што вели во интервјуто за МИА главниот и одговорен уредник на емисијата Бранко Огњановски, ќе се третираат сите проблеми во секојдневното живеење, но сепак најмногу ќе се разобличува корупцијата, како „рана што одамна ни се гледа".

Станува збор за емисија што го зазема високото место на популарност во земјава. Изминаа четири сезони, кои гледачите со задоволство ги прогласија за успешни. Огњановски во интервју за МИА е дециден дека и во новата сезона нема да штедат никого.

Проверен рецепт за нив е традиција, но сепак вели дека во однос на претходните сезони, петтата ќе ја почнат со некои новости. Тоа значи дека покрај класичниот формат на вести, ќе имаат и други новитети што планираат да ги разработат.

Во однос на тимот на Фчерашни, Огњановски вели дека во новата сезона ќе има и нови ликови, но ќе има и еден посебен дел посветен на новинарството и многу други новости за кои не открива многу затоа што, како што вели, останува на гледачите да ги видат.

Фчерашни новости сезона 5, ќе има?

– Да, ќе има петта сезона. По 120 снимени епизоди, продолжуваме со петтата сезона. Првата епизода од петтата сезона ќе почне в недела, 27 октомври, во 19:30 часот на телевизијата Канал 5, како и минатата сезона.

Останувате на стариот проверен рецепт или ќе има промени?

– Проверен рецепт е традиција кај нас, така што сега малку ќе измешаме. Покрај тоа што ќе оди оној класичен формат на вести, ќе имаме еден новитет што оваа редакција што ја имавме пред тоа ќе се обидеме малку да ја разработиме, односно да ѕирнеме под хаубата на Фчерашни. Практично, да видиме каков е моторот. Тоа значи да се запознаеме со тие карактери што практично ќе учествуваат во вестите, да видиме што им се случува приватно, каде припаѓаат, но и какви проблеми имаат, како се прават вестите. Тоа значи дека ќе се обидеме да внесеме еден новитет. Тоа е отприлика пред вестите. Во тој период ќе има некои десетина минути играна програма каде што ќе се обидеме да доловиме многу работи, кои на гледачите се надевам ќе им се допаднат.

Секоја сезона се навикнуваме да има нови ликови, ќе има ли и оваа?

– Па добро, ако сте навикнати, ќе треба да се одвикнете малку. Нови ликови ќе има, ние да речеме сега сезоната ќе ја почнеме со аудиција. Практично, цело време ќе имаме отворена аудиција за нови ликови во Фчерашни. Тоа ќе биде и еден сегмент од емисијата, но, за жал, поради буџетските отежнувања, односно елиминираниот буџет, не можевме сите ликови да ги вклучиме повторно, така што ликовите што ќе се појавуваат малку повеќе ќе бидат позастапени. Тоа значи дека нема да ги гледате истите ликови, има некои старо-нови, но ќе има и нови. Како и да е, ќе видите самите во текот на емисијата. Во секој случај, корот на тимот е горе-долу тој.

Ќе ни откриете ли некоја од темите што ќе ги гледаме следната сезона? Дали повторно ќе ја има онаа добро позната критика кон општеството и власта?

– Па, реално, мислам да. Темите ќе бидат оние што и класичните вести ги обработуваат, односно секојдневието со кое сите сме опкружени. Со самото тоа што нашата емисија практично, на некој начин вестите ги прикажува како во огледало, односно обратно се прикажани, сè што ќе биде застапено, сите проблеми од секојдневното живеење ќе бидат третирани и во нашата емисија. Посебен фокус ќе имаме на корупцијата и тој дел од општеството. Тоа ни е, да речеме, некоја рана што одамна ни се гледа. Меѓутоа, сите теми ќе бидат застапени. И нема да штедиме никого. Секако, одговорни секогаш за состојбите се луѓето од власта, луѓето што се одговорни за политиките што ги креираат, но и опозицијата, практично секојдневното живеење. Сите ќе бидат во фокусот.

Ни откривте дека ќе има дел посветен на „редакција", односно на „новинарството" во Фчерашни. Дали тоа значи дека ќе се борите и против тоа како, особено во последно време, се создаваат вестите, против лажните вести и дезинформациите?

– Па, да речеме дека ние ќе се бориме. Ќе се бориме, меѓутоа ние сме мал сегмент. Ние барем се декларираме дека сме лажни вести и не знам, практично треба сами против себе да се бориме. Но, секако, тоа е еден од фокусите што ќе ги обработуваме.

Омилен лик ни е Душан Петровски, дечкото што го глуми Менде Гибнатио и Алфа од Алфа и Буби. Ќе го гледаме ли во следната епизода?

– Како да не го гледате, па Душан Петровски е носечки лик во серијата. Да бидете горди што ќе го гледате и со задоволство да го гледате. Оваа сезона тој ќе биде еден од репортерите што ги играше Менде Гибнатио, така што покрај ликовите што ќе ги толкува во оние играни делови, ќе има и една значајна улога на еден репортер што од битолски крај кариерата ја продолжил во Скопје и ќе биде многу горд со неговите стории што ќе ги работи. Да ги поздравам вашите гледачи и да им повторам дека в недела почнуваме со првата епизода на Канал 5 во 19:30 часот.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Андоновски: Во октомври реализирани рекордни 20 милиони трансакции на платформата за интероперабилност

Октомври е најуспешен месец досега во однос на користењето на платформата за интероперабилност. 

Андоновски: Во октомври реализирани рекордни 20 милиони трансакции на платформата за интероперабилност

Министерот за дигитална трансформација Стефан Андоновски денеска соопшти дека се реализирани рекордни 20 милиони трансакции.

„За споредба, тоа значи дека се реализираат речиси 650.000 трансакции дневно, а во 2024 година имало приближно 700.000 трансакции месечно. Тоа значи дека денес достигнуваме број на трансакции што претходно се реализирале за цел месец. Овој раст се одразува и врз користењето на порталот за услуги. На порталот за е-услуги регистрирани се 30.040 услуги што е нов рекорд по 29 илјади регистрирани во септември. Во овие 30 илјади трансакции, предничат услугите достапни преку мобилната апликација m.Uslugi. “- изјави Андоновски пред 9. издание на регионалната конференција за е-трговија, што се одржува во Скопје.

Оваа недела министерот очекува да се пушти и втората верзија на апликацијата со дополнителни подобрувања.

„Ова е само почеток. Јас и при самото лансирање реков дека станува збор за нов почеток на односот меѓу државата и граѓанинот. Ме радува што повеќе од 30.000 наши сограѓани веќе ја препознаа апликацијата и се нејзини корисници. Тоа се одразува и врз зголеменото користење на порталот. Очекувам дека во наредниот период, со воведувањето нови услуги и поширокото прифаќање на апликацијата, таа ќе заземе значајно место во односот меѓу државата и граѓанинот“ - потенцира Андоновски.

За посетата на Бон, каде што беше заедно со премиерот Христијан Мицкоски, министерот денеска изјави дека најголем дел од разговорите се однесувале на дигиталната трансформација и имале можност да се запознаат со искуствата на „Дојче телеком“, особено во областа на сајбер-безбедноста.

„Тие располагаат со центар за сајбер-безбедност, кој ги опслужува компаниите во рамките на групацијата, но и други клиенти во Европа и светот. Правиме напори за да привлечеме вакви инвестиции и во Македонија. Знаете дека државата има удел во „Македонски телеком“, а целта е да видиме како ваквите инвестиции и знаења можеме да ги пренесеме и кај нас. Сакаме да создадеме нови компании што ќе се занимаваат со сајбер-безбедност и да им помогнеме на малите и средните претпријатија, вклучително и на учесниците на оваа конференција, да ги зајакнат своите капацитети во процесот на дигитална трансформација и да бидат безбедни и заштитени“ - изјави Андоновски.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Авион полн со патници добил дојава за бомба, извршил принудно слетување

Авион што летал од Лондон кон Варшава денес извршил вонредно слетување на аеродромот „Варшава-Модлин“, откако било пријавено присуство на експлозивна направа во леталото. 

Авион полн со патници добил дојава за бомба, извршил принудно слетување

Ова доведе до затворање на аеродромот, соопштија аеродромските власти.

Авионот слетал во Модлин во 10:01 часот со 181 лице во него, изјави Адам Шабловски, портпарол на аеродромот „Варшава-Модлин“, пренесува „TVN24“.

Тој додаде дека во моментов се очекува пристигнување на екипи за деактивирање експлозивни направи.

Авионот првично требало да слета на аеродромот „Варшава-Шопен“, но бил пренасочен кон Модлин.

Според соопштението од аеродромот, тревога била прогласена во 9:54 часот, откако била пријавена закана за бомба на летот од лондонскиот аеродром „Хитроу“ кон аеродромот „Варшава-Шопен“.

Во моментот на слетувањето, во авионот имало 3,7 тони гориво.

„По слетувањето, леталото беше упатено кон посебно одредена зона, каде што ќе остане до донесување на натамошни одлуки и добивање упатства од надлежните органи, вклучително и екипите за деактивирање експлозивни направи“, се наведува во соопштението.

Аеродромот „Варшава-Модлин“ останува затворен до понатамошно известување, додека властите ја истражуваат пријавената закана и преземаат мерки за да се осигура безбедноста на сите присутни на аеродромот. „Безбедноста на патниците, екипажот и аеродромскиот персонал во моментов е приоритет“, се вели во соопштението, при што се додава дека информациите за евентуални промени во ситуацијата и за повторното воспоставување на воздушниот сообраќај ќе бидат објавени дополнително.

Тагови: авион

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Герасимовски: 50 години Општина Центар, половина век историја, развој и визија за иднината

Општина Центар денеска одбележува 50 години од своето постоење. Јубилејот е повод да се потсетиме на нејзиниот развој, но и да ги истакнеме промените и резултатите со кои Центар продолжува да се развива како современо урбано јадро на Скопје.

Герасимовски: 50 години Општина Центар, половина век историја, развој и визија за иднината

„Среќен сум и горд што токму во мојот градоначалнички мандат го одбележуваме овој голем јубилеј. Центар има богато минато, силен урбан дух и голема иднина што заедно ја градиме. Во изминатите пет години работевме општината да биде посовремена, подостапна, потранспарентна и поблиску до секој граѓанин. Општина во која секој е добредојден, секој глас се слуша и секој денар се вложува одговорно“, истакнува градоначалникот Горан Герасимовски.

Во мандатот на Герасимовски се реализираа низа значајни проекти во образованието, детската заштита, спортот, инфраструктурата и услугите за граѓаните. Изградена е градинката „Пролет“, со капацитет за 173 деца, обновена е спортската сала „Работнички“, реконструирани се улици, доградени училишта и подобрени условите за образование и престој на најмладите.

Паралелно, општината инвестира во зелената и енергетската трансформација, обновливите извори на енергија, нови паркови и зелени површини, како и во програми за поддршка на учениците, младите, повозрасните и лицата со попреченост.

„Секој проект има своја приказна, но сите имаат иста цел – подобар Центар за сите генерации. Особено ми значи довербата што граѓаните ми ја дадоа за втор мандат. Тоа е обврска да продолжиме уште посилно, со нови идеи, амбициозни проекти и конкретни резултати. Верувам дека најголемата вредност на една општина се луѓето и условите што им ги создава за живот“, додава Герасимовски.

Центар останува општина со силен урбан идентитет, препознатлива по својата динамика, културно наследство и континуирани вложувања во современи урбани решенија.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер