Владата на седницата одржана на 17 јули ја донесе одлуката за одобрување на продолжување на рокот за постоење на кризна состојба заради можност за настанување на пореметување на снабдување со нафта и нафтени деривати на територијата на Република Северна Македонија.

Со донесената одлука, како што соопштија, рокот на важење на кризната состојба се продолжува од 21 јули до 20 октомври, со што се обезбедува континуитет во институционалното постапување и навремено преземање мерки доколку дојде до нарушувања во снабдувањето или до значителни ценовни шокови на меѓународните пазари на нафта и нафтени деривати.

– Целта на оваа одлука е Владата да располага со соодветен правен механизам за брза и ефикасна реакција, со цел да се зачува стабилноста во снабдувањето, да се ублажат последиците од евентуални пазарни нарушувања и да се заштитат интересите и животниот стандард на граѓаните и стопанството. Владата и понатаму внимателно ќе ги следи состојбите на домашниот и на меѓународниот енергетски пазар и доколку тоа го наложат околностите, ќе продолжи да носи навремени и соодветни мерки во интерес на сигурно, стабилно и непречено снабдување со нафта и нафтени деривати – посочија од владината прес-служба.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Рокот за носење на нов Изборен законик помина, пет дена подоцна власта и опозицијата се уште меѓусебно се обвинуваат кој е виновен за неисполнување на оваа реформска обврска. Од ВМРО-ДПМНЕ и денеска ги прозваа СДСМ, Левица и ДУИ за намерна блокада на Изборниот законик со цел, како што велат, да предизвикаат застој во реформите и да извлечат политичка корист на сметка на државните интереси и реформска агенда.

- Кога државата има можност да исполни уште една реформска обврска, тие избираат блокада. Ние повторно ќе бидеме предводници во регионот. Од 10 реформи ние сами сами 9. Не дојдовме до таа последната токму поради блокадата на СДС, Левица и ДУИ. Затоа што кога е потребен консензус, тие избираат конфронтација. Со тоа, покажаа дека нивната цел не е подобар Изборен законик, ниту подобар изборен процес, изјави Манасиевски од ВМРО-ДПМНЕ.

СДСМ, од друга страна, возврати со обвинувања дека ВМРО-ДПМНЕ и премиерот Мицкоски не сакаат Изборен законик усогласен со препораките на ОБСЕ и ОДИХР, туку закон кој, според нив, ќе овозможи манипулации со изборниот процес. Од „Бихаќка“ повторија дека е потребенно донесување на закон кој ќе биде во согласност со европските и меѓународните стандарди.

„ВМРО-ОКГ и Христијан Мицкоски го блокираат донесувањето на нов Изборен законик во согласност со препораките на ОБСЕ и ОДИХР. Наместо да се донесе закон кој ќе обезбеди фер, транспарентни и демократски избори, тие се обидуваат да протуркаат решенија кои ќе им овозможат контрола и манипулација врз изборниот процес. Особено загрижувачки е нивниот однос кон гласањето на дијаспората, велат од СДСМ.“

Од Левица, пак, соопштија дека не се откажуваат од барањето за воведување една изборна единица и ја обвинија ВМРО-ДПМНЕ дека е одговорна за недонесувањето на новиот Изборен законик во рокот предвиден од ЕУ. Ставот на ДУИ е за една изборна единица, но со изборен праг од 5 проценти. Од ВМРО-ДПМНЕ претходно, пак, се изјаснија дека ќе дадат бланко поддршка на се што опозицијата ќе договори - и една изборна единица и моделот на финансирање, со единствен услов – дијаспората да може да гласа.

Изборниот законик беше десеттата обврска што Македонија требаше да ја исполни во рамките на Реформската агенда за користење на средствата од Планот за раст на Европската унија. Поради недонесувањето на законот, земјата остана без предвидените 4,2 милиони евра.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Министерството за одбрана на САД официјално ги идентификуваше двајцата војници на американската армија кои беа убиени во саботата навечер за време на иранскиот напад со балистички ракети врз воздухопловната база „Мувафак ал Салти“ во Јордан. Една од убиените е 19-годишна девојка која штотуку ја започнала својата воена кариера.

Пентагон објави дека 25-годишниот поручник Тајлер Џејмс Фихан од Ева Бич, Хаваи, и 19-годишната војничка Изабела Гонзалес од Каролтон, Тексас, биле убиени во нападот. Двајцата биле распоредени во воздушни и ракетни одбранбени единици на американската армија.

BREAKING:

New video shows yesterday’s Iranian missile strikes that killed 2 U.S. soldiers in Jordan pic.twitter.com/HoiUPMGy7b

— Visegrád 24 (@visegrad24) July 18, 2026

Официјално распоредени како дел од друга операција

Интересно е што Пентагон официјално ги припиша овие жртви на операцијата „Инхерентна решителност“ (која првично беше започната за борба против ИСИС), а не на тековната војна што Америка ја води против Иран. Јасно е дека оваа класификација ја одразува оперативната рамка според која војниците формално биле распоредени на Блискиот Исток, а не вистинските геополитички околности на нивната смрт.

Војната меѓу САД и Израел од една страна и Иран од друга страна започна на 28 февруари 2026 година. По месеци жестоки борби, се чинеше дека е постигнат дипломатски спас кога САД и Иран го потпишаа таканаречениот Меморандум за разбирање (MoU) од Исламабад на 17 јуни 2026 година.

Договорот отвори 60-дневен преговарачки прозорец и донесе привремен прекин на огнот на сите фронтови за да се преговара за траен мир и да се реши прашањето за нуклеарната програма на Иран и отворањето на Ормутскиот теснец, кој Иран го затвори поради нападите меѓу САД и Израел.

Сепак, Договорот од Исламабад траеше помалку од еден месец пред целосно да се распадне под налетот на нови еднострани дејствија и ескалација. Со обновувањето на непријателствата, кое трае веќе втора недела, војната влезе во уште побрутална фаза во која САД спроведуваат континуирани воздушни напади врз иранската инфраструктура, додека Техеран одговори со балистички ракети врз американските бази во соседните земји. Со смртта на младите војници во Јордан, вкупниот официјален број на американски воени жртви од почетокот на војната се искачи на 17 убиени припадници на вооружените сили на САД.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.