Здравје

Од понеделник почнува вакцинацијата против сезонски грип за граѓаните кои не влегуваат во ризичната група

Сите граѓани што не влегуваат во ризичната група од понеделник ќе може да се вакцинираат против сезонски грип.

Вакцинацијата ќе се одвива во Центарот за јавно здравје „Пролет“ и според информациите ќе чини 700 денари. Од таму велат дека за Скопјани набавени се 1.000 вакцини, а вакцинацијата ќе се одвива по принципот прв дојден прв услужен, што значи дека нема да има потреба од претходно пријавување. Од центарот за јавно здравје за Канал 5 велат бројот на набавени вакцини е ист како и минатата година, и очекуваат истите да бидат потрошени во целост, бидејќи велат и лани интересот бил голем.

„Со вакцинација почнуваме во понеделник. Оваа година имаме 1000 дози, во споредба со минатата година бројката е иста, лани ги потрошивме сите количини што ги имавме па верувам дека и оваа година ќе ги потрошиме затоа што интересот е многу голем. Цената на вакцината е 700 денари, не треба термин да закажуваат, само треба да дојдат во Центар за јавно здравје и да се вакцинираат. “ - Љуљзиме Бајрами – Центар за јавно здравје

Пред околу една недела започна и бесплатната вакцинација, со која се опфатени лица над 65 години, лица со хронични заболувања, здравствени работници, бремени жени, деца од шест месеци до пет години и лица сместени во установи за социјална заштита на стари лица и вработените во нив. Пријавувањето за оваа категорија граѓани се врши преку вакцинација мк. Министерството за здравство досега набави најмногу или 80 илјади вакцини и очекуваат оваа бројка да е доволна за сите оние кои имаат право на бесплатна вацина и сакаат да се имунизираат против грип. Засега пријавени се околу 75илјади граѓани, а досега според информациите повеќе од 37 илјади се вакцинирале.

Инаку, според последните податоци на институот за јавно здравје за две недели регистрирани се 140 случаи, или за четири седмици околу 240 граѓани се заразиле со инфлуенца, но сè уште не е достигнат прагот на влез во сезоната на грип, кој се очекува дури во февруари да го достигне својот пик. Иако процентот на заразени е околу 60 отсто повисок од истиот период лани, состојбата, според лекарите, не е алармантна и е очекувана.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Општина Аеродром: Почна реконструкцијата на улицата „Ѓорѓи Капчев 5“

Градоначалникот на Општина Аеродром, Дејан Митески, заедно со општинските стручни служби денеска изврши увид во почетокот на градежните работи за реконструкција на улицата „Ѓорѓи Капчев 5“.

Реконструкцијата ќе се изведува според постојната состојба, во должина од 279 метри, при што ќе се асфалтира површина од 1098 квадратни метри.

Овие активности се одвиваат во рамките на проектот за реконструкција на 18 улици на територијата на Општина Аеродром.

„Продолжуваме активно да работиме на подобрување на уличната инфраструктура низ Општина Аеродром. Ветивме – реализираме. Чекор по чекор, улица по улица, градиме подобар и поуреден Аеродром“, изјави градоначалникот Митески.

13.8.2026

Општина Аеродром

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Живот

Германско здружение поднесе жалба против „Мета“ поради паметни очила, бара забрана за продажба

Германската организација за заштита на дигиталните права „HateAid“ поднесе кривична пријава против „Meta“ и компаниите што ги продаваат нејзините очила со вештачка интелигенција во Германија.

Во пријавата се наведува дека овие уреди – конкретно моделот „Ray-Ban Meta Wayfarer“ – ги прекршуваат германските закони за дигитална приватност.

Ова претставува најнов случај на правен притисок во земја каде што правото на приватност е високо ценето, пренесува „Ројтерс“.

Организацијата ја поднесе пријавата до Централната канцеларија за борба против сајбер-криминалот (ZIT) со седиште во Франкфурт, насочена против раководството на „Meta“, производителот на очила „EssilorLuxottica“ (во чија сопственост е брендот „Ray-Ban“), како и против трговците на мало „Fielmann“, „Apollo-Optik“, „Mister Spex“ и „MediaMarkt“.

„Не можете да им побегнете на паметните очила. Во секој момент мора да претпоставите дека некој ве снима и дека снимката ќе ја објави на интернет“, изјави извршната директорка на „HateAid“, Жозефин Балон.

HateAid истакнува дека нејзината претставка се заснова на сојузниот закон за заштита на дигитални податоци. Тој закон ја забранува продажбата на комуникациски уреди наменети за тајно снимање на луѓе.

Од Mister Spex изјавија дека прашањето за заштита на приватноста го сфаќаат многу сериозно, но дека сè уште не се официјално известени за претставката. Другите споменати компании и ZIT не одговорија веднаш на барањата за коментар.

Германскиот регулатор за дигитални комуникации, Сојузната агенција за мрежи (BNetzA), уште кон крајот на 2023 година објави дека се забранети поврзани уреди способни за тајно аудио или видео снимање.

Во средата, агенцијата за „Ројтерс“ изјави дека внимателно го следи пазарот на паметни очила, но во моментов не спроведува официјална истрага.

„Поседувањето, увозот или продажбата на паметни очила не се забранети, под услов функцијата за снимање да биде јасно видлива – на пример, преку светлосен сигнал“, објасни портпарол на агенцијата. Во јули, медиумската куќа SWR објави дека и органот за заштита на податоци на покраината Хамбург презема правни мерки во врска со употребата на паметни очила.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Култура

Драмски театар со претставата „Кармен“ го отвора театарскиот фестивал „Бранко Ѓорчев“ во Неготино

Со изведба на претставата „Кармен“ на НУ Драмски театар Скопје утре, на 14 август, во Неготино се отвора Театарскиот фестивал „Бранко Ѓорчев“. Ова е трет фестивал што се одржува во чест на истакнатиот македонски актер Бранко Ѓорчев.

Фестивалот се одржува во салата на Центарот за култура „Ацо Ѓорчев“. Претставите започнуваат во 20 часот, а влезот за публиката е слободен. Публиката во Неготино од 14 до 23 август ќе има можност да проследи пет претстави во ревијалната фестивалска програма.

По утрешното отворање на фестивалот со монодрамата „Кармен“ на актерката Биљана Драгиќевиќ- Пројковска во режија на Дејан Пројковски на НУ Драмски театар Скопје, наредната фестивалска вечер ќе биде во вторник на 18 август со изведбата на претставата „Знаме и куфер“ на режисерката Изабела Јакимова во продукција на „Театар за тебе“ од Скопје.

Во среда на 19 август театарот „Ј.Х.К.-Џинот“ од Велес ќе ја изведе претставата „Синиот портокал“ на режисерот Александар Ивановски. На 21 август (петок) на програмата на фестивалот е „Магионичарско шоу“, детска програма со Кристијан Шопов - Кико Магико. Годинашниот театарски фестивал „Бранко Ѓорчев“ се затвора во недела на 23 август со ансамблот на Народниот театар „Ацо Шопов“ од Штип кој ќе ја изведе претставата „ЈЗУ Европа“ на режисерката Кристина Атансова.

Монодрамата „Кармен“ на фестивалот во Неготино ќе биде изведена 51. пат по премиерата што претставата ја имаше во мај 2021 година.

Претставата е работена по мотив од романот „Пет часа со Марио“ од шпанскиот писател Мигел Делибес. Актерката Биљана Драгиќевиќ-Пројковска за улогата Кармен има добиено неколку меѓународни награди и признанија. Режијата и драматизацијата се на Дејан Пројковски, сценографијата на Валентин Светозарев, сценските движења на Олга Панго, костимографијата на Раде Василев, а музиката на Горан Трајкоски.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.