Редот во нелојалната конкурецнија и неоправдано високите цени, според Министерството за економија ќе се стави преку носењето на законот за нефер трговски практики, кој треба да доведе токму до намалување на цените на производите.
Законското решение минатата недела го мина првиот собраниски филтер, но засега нова седница за него не е закажана. Мерката, која беше воведена лани во септември, со цел заштита на стандардот на граѓаните, истекува на 29-ти месецов. Но останува отворено прашањето дали законот ќе биде донесен до завршување на мерката, со цел да нема нов скок на цените на храната.
„Очекуваме ова законско решение, кое е целосно усогласено со европската регулатива и е со европско знаменце, да биде усвоено во најкраток можен рок. Со законот очекуваме да се намалат цените на прехранбените и земјоделските производи.“ - Министерство за економија.
Гаранција дека цените нема да одат нагоре, откако ќе се укине мерката, па се до носењето на законското решение, не може да даде никој, оценуваат екпертите. Благица Петрески од Фајненс тинк вели се зависи од побарувачката и понудата. Дополнително смета дека владините мерки, како што се субвенционирањето на струјата и замрзнувањето на цените полека треба да приврушуваат, а токму ова го покажува и последната анализа на Фајнес тинк.
„Во која мера цените ќе реагираат не може да даде никој затоа што тоа е во пазарна економија, реагираат силите на понудата и побарувачката, но и играчите кои што се директно засегнати. Но сметам дека мерката за замрзнување на цените ги исцрпи своите ефекти и останатите мерки кои треба да одат во насока на справување со таквите неповолни појави треба да бидат во рамки на постоечките механизми. “-изјави Благица Петрески – Фајненс Тинк.
Анализата на Институтот за економски истражувања и политики покажува дека владините мерки како субвенционирањето на сметките за струја и замрзнатите цени, иако им помогнале на посиромашните домаќинства, сепак голема корист имале и побогатите, кои сами можеле да си ги подмират торшоците. Па оттука од институтот препорачуваат надлежните во иднина фокусот да го ставаат на поранливите категории граѓани.