Разговорите меѓу високи функционери на двете земји траеле со месеци, но пропаднале минатата недела откако американската влада ги прекина дипломатските контакти со Каракас.

Според повеќе лица запознаени со преговорите, Мадуро им понудил на американските компании доминантен удел во тековните и идните проекти за нафта и злато, преференцијални договори и пренасочување на извозот на сурова нафта од Кина во САД. Покрај тоа, Каракас ќе ги ограничи енергетските и рударските врски со Кина, Иран и Русија.

Вашингтон ја отфрли понудата

И покрај тие отстапки, администрацијата на Доналд Трамп го отфрли договорот, нарекувајќи ја владата на Мадуро „наркотерористички картел“. Во исто време, го зголеми своето воено присуство на Карибите и продолжи да напаѓа бродови за кои тврди дека транспортираат дрога од Венецуела.

Постојат поделби во американската влада околу пристапот кон Венецуела. Државниот секретар на Трамп и советник за национална безбедност, Марко Рубио, има тврдокорен став кон Каракас и го смета Мадуро за „бегалец од американската правда“. Дипломатскиот канал што го води специјалниот претставник Ричард Гренел засега е замрзнат.

Мадуро се обидува да ја спаси економијата

Според информациите од „Њујорк тајмс“, блиските соработници на Мадуро му понудиле на Вашингтон отстапки што би ги отстраниле остатоците од економскиот национализам што ја формираа основата на политиките на Уго Чавез. Сепак, преговорите се заглавени по прашањето за политичката иднина на Мадуро, бидејќи Каракас одби да разговара за неговото заминување од власт.

Откако ја презеде функцијата во 2013 година, Мадуро брутално ги потиснува протестите и ја одржува власта и покрај меѓународната изолација. Минатата година, тој ја задржа позицијата претседател по изборите што беа прогласени за наместени од независни набљудувачи.

Економска трка со опозицијата

Додека Мадуро бараше договор со Америка, лидерката на опозицијата Марија Корина Мачадо го претстави својот план за економско закрепнување на Венецуела во Вашингтон, тврдејќи дека американските компании во демократска Венецуела би можеле да остварат профит од 1,7 трилиони долари во следните 15 години.

„Мадуро не им нуди на инвеститорите стабилност, туку контрола - контрола одржувана со терор“, рече советникот на Мачадо, Сари Леви. „Администрацијата на Трамп јасно стави до знаење дека нема да падне на такви понуди“.

Мачадо денес ја доби Нобеловата награда за мир за нејзината „неуморна работа за промовирање на демократските права на венецуелскиот народ“, објави Норвешкиот Нобелов комитет.

Американските компании веќе се во игра, но поголемиот дел од нафтата оди во Кина

Венецуела моментално произведува околу еден милион барели нафта дневно, три пати помалку отколку на почетокот на ерата на Чавез. Поголемиот дел од извозот оди во Кина, освен помалите количини што ги продава американската корпорација „Шеврон“. Владата на Мадуро се обидува да ги обнови врските со „Шеврон“ и „КонокоФилипс“ и да им даде поголем удел во нафтените полиња.

„Шеврон“ доби дозвола од САД да продолжи со работа во Венецуела во јули, додека оваа недела Министерството за финансии на САД издаде нова лиценца со која ѝ се дозволува на европската „Шел“ да се врати во земјата и да го експлоатира големото гасно поле „Драгон“.

Рубио рече дека Вашингтон „нема да дозволи проектот „Драгон“ да донесе значителни придобивки за режимот на Мадуро“. Според „Њујорк тајмс“, „Шел“ ќе инвестира во социјални проекти во Венецуела, наместо да плаќа директни такси на владата.

Извори на „Њујорк тајмс“ тврдат дека Мадуро се согласил да ги намали економските врски со Москва и Пекинг бидејќи проценил дека тоа е цената за избегнување на можен американски воен удар. Венецуела, исто така, ги суспендираше испораките на нафта за Куба, предизвикувајќи сериозен недостиг на електрична енергија на островот.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.