Обвинителството ќе ја чека писмената пресуда со која судијата Ељведин Ферати му досуди само две години затвор на Менсур Пајазити кој смртно ја прегази 22-годишната Теодора Ристовска на пешачки премин во Тетово, па ќе одлучи дали ќе поднесе жалба, иако според информациите на Канал 5, обвинителот во случајот првично смета дека има основ на жалба.

Менсур Пајазити се гонеше по член 300 од КЗ Тешки дела против безбедноста на луѓето во сообраќајот со смртни последици, но по ставовите дека делото е сторено од небрежност, казната се движи од една до 5 години затвор, за разлика од случајот со Фросина Кулакова каде обвинетиот Васил Јованов се гони по членови кои предвидуваат минимум 4 години затвор, до максимални 20.

Адвокатката на семејството на Теодора, Наташа Ѓорчевска не гледа пропусти во постапувањето на тетовските судии кои ја водеа првичната и повторената постапка, туку во одлуките на гостиварска апелација и Врховен суд, со што Менсур Пајазити во повторената постапка признал вина на старт на судењето кое судот го сметал како олеснителна околност.

-Во одмерувањето на казната никогаш не можеме да бидеме задоволни. Апелациониот суд Гостивар и Врховниот суд на РМ му дадоа можност на Менсур да си ја повтори постапката и отпочеток да си даде некое си признание на вина пред судот во Тетово и на тој начин да се смета како олеснителна околност. Во првата постапка тој не даде признание на вина во моментот како што предвидува ЗКП на првото прашање од судот, туку тоа го направи во завршен збор и затоа беше одмерена таа висина на казната. Со повторувањето на постапката која како можност му ја даде Врховниот суд на РМ тој го даде признанието сега на почетокот на постапката и тоа судот го рачуна како олеснителна околност,- изјави - Наташа Ѓорчевска – Адвокат.

Пајазити првично е осуден на 3,6 години затвор, казна која Апелација Гостивар ја намалува на 2 години откако вишата обвинителка Вјолца Елмази предложила да му се уважи жалбата на Пајазити и да му се изрече поблага санкција.

Но, по жалбата на обвинетиот, и оваа пресуда Врховен ја укинал откако утврдил недоследности околу признанието на вина и изведувањето на доказите.

Повтореното судење, по неколку одлагања, заврши со едно рочиште, откако Пајазити призна вина, а судот му одреди казна од 2 години – исто колку што Апелација му ја намали во претходната постапка.

По реакциите во јавност Судскиот совет најави дека ќе изврши увид во пресудата што ја одреди судијата Ељведин Ферати, а останува незивесно дали Обвинителството ќе ја обжали на Апелација.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.