Ова беше истакнато на семинарот под наслов „20. Медитерански игри Таранто 2026: Наследство од спорт, одржливост и мултикултурен дијалог“ што се одржа во Арагонската тврдина во четвртокот во организација на АМАН Алијансата и Организацискиот комитет на Игрите.

Овој спортски настан од 21 август до 3 септември следната година ќе донесе во Таранто 5.000 спортисти од 26 земји и три континенти што граничат со Средоземното Море.

На меѓународниот семинар организиран од Алијансата на медитерански Новински агенции присуствуваше и Македонската информативна агенција МИА.

Во рамки на одржување на семинарот, во Villaggio IN Italia пристигна и бродот „Америго Веспучи“, тренинг брод на Италијанската морнарица, кој моментално е закотвен во Таранто како дел од неговата светска турнеја и ќе остане таму до 22 април.

На настанот присуствуваа министерот за спорт и млади на Италија, Андреа Абоди, министерот за европски прашања Томазо Фоти, Масимо Ферарезе, специјален комесар и претседател на Организацискиот комитет на XX Медитерански игри Таранто 2026, како и Стефано Де Алесандри, претседател на АМАН и извршен директор на Италијанската новинска агенција АНСА.

Според министерот Абоди, смислата на Медитеранските игри е да се поврзе спортското натпреварување со вредностите на спортот.

- Смислата на Медитеранските игри, како и на Олимписките и Параолимписките игри, е да се поврзе спортското натпреварување со вредностите на спортот, со добра политика и со идеја за геополитика која обединува луѓе и знае како да ги надмине проблемите што се толку очигледни и насилно присутни во секојдневните вести, истакна тој.

Верува дека Медитеранските игри 2026 ќе бидат прекрасно поглавје не само за спортот, туку и за културната размена, бидејќи не се работи само за натпреварување, туку и за вистинско и длабоко пријателство меѓу народите.

Нагласи дека изградбата на објектите за Медитеранските игри напредува и дека во следните месеци ќе биде многу поочигледна.

Воедно, најави и дека Владата на Италија ќе додели дополнителни 25 милиони евра за организација на игрите, покрај веќе доделените 25 милиони евра.

Оптимизам за навремено завршување на спортските објекти изрази и специјалниот комесар Ферарезе.

- Ова ќе биде најважниот настан во историјата на Јужна Италија бидејќи никогаш досега не биле вложени 350 милиони евра во ваков настан и затоа имаме должност да работиме со голема сила и одлучност. И имавме и среќа што бродот Веспучи е тука, најубавиот брод на светот, и со него ќе се стремиме да ги промовираме и истакнеме Игрите низ целиот свет, нагласи Ферарезе.

Вели дека преку соработката со АМАН сакаат да го претстават градот Таранто како централна точка на Медитеранските игри 2026 и да ја покажат интензивната работа што се прави за да се обезбеди врвно гостопримство за сите учесници: спортисти, делегации, медиуми и спортски ентузијасти.

Извршниот директор на Италијанската новинска агенција АНСА и претседател на Алијансата на медитерански новински агенции (АМАН), Стефано Де Алесандри изјави дека АМАН со моменталното претседателство на АНСА, има за цел да ја зајакне соработката меѓу агенциите од регионот и да ги споделува основните вредности на Медитеранските игри: пријателство, мир и почит.

- Обединувањето на повеќе од 20 новински агенции во Таранто во пресрет на 20. Медитерански игри, заедно со присуството на „Америго Веспучи“ е можност да се промовираат заеднички вредности и да се продлабочи мрежата на размена на информации низ медитеранскиот басен, вели тој.

Медитеранските игри, основани во Александрија, Египет во 1951 година, претставуваат прослава на спортската извонредност, дијалогот и културното единство меѓу народите кои ги делат бреговите на Медитеранот.

Приближувајќи се до своето XX издание во Таранто 2026 година, игрите гордо носат наследство од 74 години.

Со текот на времето, тие ги надминале границите на чистата конкуренција за да станат динамична арена за меѓукултурна размена, платформа за млади таленти во развој и жив симбол на извонредната разновидност на медитеранскиот басен.

Следното издание на Игрите ќе се одржи од 21 август до 3 септември 2026 година во Таранто, во регионот Апулија, земја позната по своите длабоки историски корени, живописни традиции и автентичниот медитерански дух.

На Медитеранските игри, спортистите се натпреваруваат во голем број спортови, кои се менуваат од година во година. Северна Македонија има свои претставници на игрите, а на последните игри учествуваше со 77 спортисти во 10 спортови, вклучувајќи ракомет, одбојка, таеквондо, џудо, карате, борење, пливање, атлетика, мечување и стрелаштво.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.