Новото судење за Навални започнува следната недела

Затворениот руски дисидент Алексеј Навални следната недела во среда ќе има ново судење за екстремизам, објави руската новинска агенција ТАСС.

Првото рочиште за новиот случај ќе започне во среда, јави ТАСС, повикувајќи се на Московскиот градски суд. Судењето нема да биде отворено за јавноста. Тој се соочува со седум обвиненија, вклучувајќи основање, финансирање и работење во екстремистичка организација, поттикнување екстремизам и тривијализација на нацизмот.

Московскиот градски суд пред две години пресуди дека Антикорупциската фондација (ФБК), основана од Навални, е екстремистичка организација. ФБК објави докази за корупција на водечки политичари, меѓу кои и рускиот претседател Владимир Путин.

Навални, најпознатиот руски дисидент, е во затвор повеќе од две години. Тој беше отруен со нервниот агенс Новичок на патување во Сибир во летото 2020 година, а потоа беше лекуван во болница во Берлин. Дисидентот ја обвинува домашната руска разузнавачка служба ФСБ дека стои зад обидот за атентат. Кремљ ги отфрла обвинувањата.

Навални беше уапсен по неговото пристигнување во Русија во јануари 2021 година под обвинение за прекршување на условите од претходната условна затворска казна.

Минатата година тој беше осуден на девет години затвор под особено тешки услови за измама. Амнести интернешенел го признава како затвореник на совеста, а Европскиот суд ја прогласи неговата казна за неправедна, пренесе Индекс.хр.

Вучиќ: Со кампањата во Македонија, Курти ја поткопува регионалната стабилност

Предизборната кампања во Македонија најде место и на седницата на Советот за безбедност на Обединетите нации, каде синоќа се расправаше за извештајот за работата на УМНИК на Косово.

Српскиот претседател Вучиќ во своето обраќање рече дека косовскиот премиер Курти се мешал во внатрешните работи на Македонија и дека бил вклучен во предизборната кампања во земјава. Косовската претсеателка Вјоса Османи, пак, обвини дека Белград со терористички тактики го поткопувал уставниот поредок во Косово.

Швајцарија замрзна руски имот во вредност од 5,8 милијарди франци

 Швајцарија замрзна руски имот во вредност од 5,8 милијарди швајцарски франци или 5,95 милијарди евра, соопшти денеска Државниот секретаријат за економски прашања на земјата (СЕКО).

Оваа бројка се однесува на вкупната вредност на руските средства замрзнати од Швајцарија од почетокот на војната во Украина до крајот на 2023 година.

Вредноста на замрзнатите руски средства во Швајцарија е помала отколку на крајот на 2022 година, кога изнесуваше 7,5 милијарди швајцарски франци.

„Вредноста на финансиските средства замрзнати во врска со санкциите против Русија изнесуваше 5,8 милијарди швајцарски франци на 31 декември 2023 година. Ова е за 1,7 милијарди швајцарски франци помалку од бројката пријавена за декември 2022 година. Покрај тоа, сега се блокирани 17 имоти во 7 кантони“ се вели во соопштението на СЕКО. /МИА

Првите шест авиони „Рафал“ во Хрватска пристигнуваат оваа недела

Хрватскиот министер за одбрана, Иван Анушиќ, денеска соопшти дека неделава во Хрватска ќе пристигнат првите шест од вкупно 12-те купени борбени авиони „Рафал“.

„Со историски прелет од Бордо до Загреб, пилотите на хрватското воено воздухопловство, кои беа обучени Франција, в четврток ќе ги донесат моќните ловци и нови заштитници на хрватскиот воздушен простор“, напиша Анушиќ на социјалната мрежа Х.

Тој додаде дека модернизацијата на воздушната флота е најголемата инвестиција на Владата и Министерството за одбрана во безбедноста на државата.

Во 2021 година Хрватска потпиша договор со Франција за купување на 12 половни француски борбени авиони „Рафал“ во вредност од 999 милиони евра.

Првиот авион беше преземен во октомври минатата година во француската воена база во Мон де Марсан.

Во Франција на обука беа испратени околу 90 членови на техничкиот и летечкиот персонал. /МИА

притисни ентер