Општина Кочани навремено го поништила известувањето за користење паркинг-простор и побарала од Државниот пазарен инспекторат и Министертството за економија да не издаваат лиценца за работа на дискотеката „Пулс“, бидејќи објектот се наоѓал во зона за лесна и незагадувачка индустрија. Ова го истакна сведокот Драги Илиевски, кој е раководител на секторот за градежно земјиште во општината на денешното рочиште за пожарот во „Пулс“.

Илиевски, кој на оваа функција е од 2012 година, појасни дека објектот се наоѓал во зона каде што не е дозволена пренамена за угостителска дејност од ваков тип. Првично, во октомври 2012 година, Општина Кочани дала позитивно известување на барањето на Дејан Јованов за користење на јавните паркинзи во таа зона, но подоцна истото било повлечено откако дознале за вистинската намена на објектот, кажа сведокот.

-Имаше едно барање за паркинг места од ‘Класик ДМ’, преку Дејан Јованов. Ние одговоривме дека може да се користат паркинг места, за лесна индустрија. Барањето беше пред да стане ‘Класик’ угостителски објект, односно на 3.10.2012 година. По одредени сознанија дека таму ќе се прави дискотека, ние решението за дозволените паркинзи за лесна индустрија го поништивме. Известувањето го доставивме до ‘Класик’ и до Дејан Јованов. Натаму, го известивме и Државниот пазарен инспекторат. Тогашниот градоначалник Ратко Димитровски имаше исти такви сознанија, па го праша Министерството за економија на 19.10.2012 година дали е поднесено барање за лиценца и дали е дадена лиценца за дискотека во тој објект. Одговор не добивме. На 6.11. Испратив барање до Пазарниот инспекторат да не се издаде лиценца на ‘Класик ДМ’ за дискотека, изјави Драги Илијевски.

Вториот сведок Дејан Рашков, кој бил секретар во општина Кочани, изјави дека не знае колку точно дискотеки и кафулиња има во градот. За „Пулс“ првично кажа дека слушнал, во еден наврат бил и гостин, но за кафулето „Класик“, вториот објект на Дејан Јованов, сведокот кажа дека воопшто не бил запознаен.

-Не знам колку кафулиња има во Кочани, ниту колку дискотеки и ноќни клубови. За Пулс сум слушнал, но натпис не сум сигурен дека сум видел, можеби имало над вратата. Не сум слушнал ниту за кафуле Класик, кажа сведокот Рашков.

На претходното рочиште Обвинителството побара да повлече 13 сведоци од својот список, а денеска беше постигната согласност да бидат повлечени четворица. Дел од одбраната реагираше велејќи дека во овие сведоци има клучни детали за тоа кој ја донел и запалил пиротехниката, а воедно и за тоа кој колку помагал и спасувал животи во кобната вечер. Вишиот обвинител Јакимовски, пак, одговори дека тоа што тие спасувале по пожарот, не ги амнестира од одговорноста дека придонеле за истиот.

-За Обвинителството не е спорно да се прочитаат сите искази кои потврдуваат дека сте спасувале отпосле, како што спасувале и други лица и пожарникари кои настрадале при спасувањето и сега се мртви. Тука сме за другиот дел – за вашата улога во тоа како настанала трагедијата, а не за спасувањето - Дарко Јакимовски - Виш јавен обвинител.

Следното рочиште за пожарот во „Пулс“ е закажано за на почетокот на април.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.