Научниците пронашле широко распространет и вообичаен коронавирус во шумските волухари (Myodes glareolus) наречен вирус Гримсо, според местото на откритието.

Засега не е познато дали новооткриениот вирус на кој било начин е опасен за луѓето. Сепак, ова е добар потсетник дека е добро да се следат вирусите на дивиот свет, особено оние што ги пренесуваат животните кои живеат во наша непосредна близина, пишува Science Alert.

„Сè уште не знаеме какви потенцијални закани може да претставува вирусот Гримсо за јавното здравје. Сепак, врз основа на нашите набљудувања и претходните коронавируси идентификувани меѓу животните, веруваме дека постојат добри причини за понатамошно следење на коронавирусот кај глодарите од дивиот свет“, рече вирологот Аке Линквист од Универзитетот во Упсала во Шведска.

Волухарите се еден од најчестите глодари во Европа. Често се среќаваме со нив во дивината, а познато е дека може да го имаат вирусот Пумала, кој предизвикува таканаречена глувчешка треска, односно хеморагична треска. Хеморагичната треска со бубрежен синдром, позната и како треска на глувци, е акутна вирусна болест која се манифестира со треска, крварење и нарушена бубрежна функција.

Волухарите знаат да се кријат во зградите за време на бури, што пак го зголемува ризикот од инфекција во нашите домаќинства.

Дури и пред да започне пандемијата на Ковид-19, Лундквист и неговите колеги ги следеле избувнувањата на болеста меѓу волухарите за подобро да предвидат како и кога вирусот што го носат може да се пренесе на луѓето. Со оглед на немилосрдното темпо на климатските промени и уништувањето на живеалиштата, сè поверојатно е дека во иднина ќе имаме повеќе интеракции со нив.

Помеѓу 2015 и 2017 година, шведските научници забележале 450 диви волихари кои живеат западно од Стокхолм во местото наречено Гримсо. Ги тестирале за различни болести и откриле нов бета-коронавирус во 3,4 отсто од примероците.

Бета-коронавирусите најчесто се наоѓаат кај лилјаците и глодарите, а кога се пренесуваат на луѓето, тие можат да предизвикаат настинки и респираторни вируси како што е САРС-КоВ-2.

Досега, вирусот пронајден во волухарите не се проширил на луѓето, но пандемијата на Ковид нѐ научи дека е потребен зголемен надзор на болестите на дивиот свет за да се спречи понатамошно ширење. За време на тригодишно истражување, научниците во Шведска откриле неколку различни подтипови вируси на вирусот Гримсо кои циркулираат меѓу популациите на глодарите.

Покрај тоа, други тесно поврзани коронавируси се широко распространети меѓу глодарите во другите делови на Европа, како што се Франција, Германија и Полска, што сугерира дека овие суштества се природни носители на овој тип на инфекција. Лош знак е многу дивергентната природа на вирусот Гримсо, што укажува дека вирусот лесно се прилагодува на новите домаќини и живеалишта.

Различните соеви во оптек можеби првично потекнуваат од волухари или може да им се пренесат од некои други видови.

„Со оглед на тоа што волухарите се еден од најчестите видови глодари во Шведска и Европа, нашите резултати сугерираат дека вирусот Гримсо би можел широко да циркулира меѓу нив. Ова дополнително укажува на важноста на контролата на коронавирусот кај дивите цицачи, особено глодарите“, велат истражувачите.

Но, не се само глодарите кои се подложни на пренос на коронавирус. Пријавено е дека 40% од дивите елени во североисточниот дел на Соединетите држави, кои исто така се во близок контакт со човечката цивилизација, биле изложени на САРС-КоВ-2.

Вирусот се проширил и меѓу одгледуваните куни, по што се убиени 11.000 одеднаш во Данска.

Доколку климатските промени се влошат во иднина и се зголемат живеалиштата на дивиот свет, веројатноста за појава на нови видови коронавирус кај луѓето се зголемува.

Студијата наречена Discovery of a Novel Coronavirus in Swedish Bank Voles (Myodes glareolus) е објавена во списанието Viruses.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.