Научната заедница нема докази дека станува збор за вештачка структура, па затоа е важно да се остане претпазлив и што е можно пообјективен во целата приказна.

„Досега сигурно би копале...“

Вирална објава, која се прошири низ интернет оваа недела, го привлекува вниманието кон видео од површината на Марс снимено од американската агенција НАСА.

Во видеото, некои тврдат дека може да се види „тристрана пирамида“, додека експертите нè потсетуваат дека ваквите форми често можат да бидат резултат на природни геолошки процеси.

Необичната формација ја забележал истражувачот Кит Лејни во 2001 година, додека анализирал фотографии направени од сондата Mars Global Surveyor.

Додека ги прегледувал видеата, во потрага по необични структури, наишол на она што го опишал како „можна вештачка формација“.

„Доколку ова беше пронајдено некаде на Земјата, ние би копале“, рече тој во тоа време.

Видливо на пет слики

Сликата неодамна ја сподели документарецот Брајан Добс, кој тврди дека на Марс можеби постои „пирамида“, со големина на Големата пирамида во Гиза.

Тој признава дека мистериозната структура не е доказ за „антички живот“, туку покренува прашања за историјата на Црвената планета.

Сликата е направена во западниот дел од кањонот Кандор Часм, во рамките на Долината Маринер, област позната по своите стрмни карпи, лизгање на земјиштето и слоевити карпи, за кои научниците веруваат дека „природно можат да формираат необични и јасно геометриски форми“.

Структурата е видлива на пет различни слики, направени помеѓу 2001 и 2016 година, од мисиите „Марс Глобал Сурвејор“ и „Марс Реконејнс Орбитер“.

Најраната, направена на 4 јули 2001 година, ја покажува структурата осветлена од запад, со другите страни во сенка, дополнително зајакнувајќи го впечатокот за правилна форма.

Уште во април 2002 година, нова слика, направена под различен агол на светлина, повторно покажа слична тространа форма. Подоцнежните слики со висока резолуција, особено оние од 2007 година, откриваат поостри рабови и поизразена симетрија - но сепак без дефинитивен доказ дека станува збор за вештачка структура.

Дополнителни слики од 2014 и 2016 година продолжија да ја покажуваат истата триаголна формација, при што променливата сончева светлина создава различни сенки - дополнително нагласувајќи го нејзиниот геометриски изглед. Во некои случаи, едната страна би била речиси целосно темна, додека другата би била делумно осветлена.

Нема конкретни докази

Истражувачите забележаа дека, и покрај разликите во квалитетот на сликата, аголот на сончевата светлина и сезонските услови, формацијата постојано покажува тространа симетрија. Сепак, сите се дистанцираат од заклучокот дека станува збор за „пирамида“.

Добс не е единствениот што ја остава отворена можноста за постоење на вештачки структури на Марс. Истражувачот Џорџ Хас претходно поддржуваше слични толкувања, зборувајќи за медиумите, објавува Дејли Меил.

„Не мора да бидете геолог за да разликувате карпа од скулптура - нешто што има јасна геометрија“, рече тој.

Сепак, без конкретни докази, научната заедница останува на мислењето дека најверојатно станува збор за необична, но природно настаната геолошка формација, која, поради светлината и аголот на набљудување, наликува на „пирамида“.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.