Нова научна студија сега го открива клучниот пресврт кога ова забрзување најчесто се случува: а тоа е околу 50-годишна возраст. По таа возраст, траекторијата на нашите ткива и органи станува многу пострмна отколку во претходните децении, а истражувањето на протеините во човечкото тело покажува дека крвните садови први покажуваат знаци на влошување.

Пресвртна точка во стареењето

„Врз основа на промените во протеините поврзани со стареењето, развивме еден вид „протеомски часовници“ за секое ткиво, и на тој начин ги следевме траекториите на стареење на органите. Анализата откри дека пресвртната точка е околу 50-тата година, при што крвните садови се ткиво кое старее рано и е особено чувствително на овој процес“, напишал тимот научници од Кинеската академија на науките.

Човечкиот животен век е исклучително долг во споредба со повеќето други цицачи, но тоа си има своја цена. Една од нив е намалувањето на функцијата на органите, што доведува до зголемен ризик од хронични заболувања со текот на времето. За подобро да го разберат овој процес, истражувачите анализирале примероци од ткиво од 76 донатори на органи на возраст од 14 до 68 години.

Примероците опфаќале седум телесни системи: кардиоваскуларни, дигестивни, имунолошки, ендокрини, респираторни, кожни и мускулно-скелетни. Научниците ги споредиле своите наоди со базата на податоци за болести и откриле дека нивоата на 48-те протеини поврзани со болестите, вклучувајќи кардиоваскуларни состојби, фиброза на ткивата, замастен црн дроб и тумори поврзани со црниот дроб, се зголемуваат со возраста.

Кои органи стареат најбрзо?

Според истражувачите, најдраматичните промени, се јавуваат помеѓу 45-тата и 55-тата година. Во овој период, многу ткива претрпуваат значителна промена на обликот на ниво на протеини, при што најизразените промени се забележани во аортата, главен крвен сад, што укажува на нејзината висока подложност на стареење. Панкреасот и слезината, исто така, покажале трајни промени.

За да ги тестираат своите наоди, научниците изолирале протеин поврзан со стареењето од аортата на глувци и го инјектирале во млади глувци. Животните третирани со тој протеин покажале намалени физички способности, послаб стисок, намалена издржливост и полоша рамнотежа и координација. Тие исто така имале изразени маркери за васкуларно стареење.

Овие резултати се темелат на претходни истражувања кои укажувале дека врвот во стареењето се случува околу 44 и 60 години, што укажува дека човечкото стареење е сложен, постепен процес. Разбирањето како и кога стареењето влијае на одредени делови од телото би можело да помогне во развојот на целни медицински третмани кои би можеле да го олеснат процесот и да го подобрат здравјето на постарите возрасни лица.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.