Наталија Канем: Заштита на здравјето и правата на жените и девојките, дури и за време на Ковид-19

Мирот во нашиот свет почнува со мир во домот.

Мирот во нашиот свет почнува со мир во домот, изјави неодамна генералниот секретар на Обединетите нации Антонио Гутереш во својот повик за глобален прекин на родово базираното насилство, што претставува пандемија во рамките на пандемијата со Ковид-19, вели извршната директорка на Фондот за население на Обединетите нации – УНФПА, Наталија Канем во нејзината изјава по повод Светскиот ден на населението.

-Во текот на животот, една од три жени е жртва на физичко или сексуално насилство. Во моментов, како резултат на мерките за карантин и зголемените тензии во домаќинствата, се зголемува и родово базираното насилство, додека, пак, пристапот до здравствените услуги за сексуално и репродуктивно здравје е отежнат поради тоа што здравствените системи се борат да се справат со вирусот Ковид-19. Огромен број луѓе, заедници и економии во светот се зафатени со кризата поради појавата на пандемијата со Ковид-19. Сепак, сите не се подеднакво засегнати, односно од тоа што честопати можеме да го видиме, оние коишто најмногу страдаат се жените и девојките, истакна Канем.

Таа нагласува дека влијанието на Ковид-19 ќе ги отежне глобалните напори за постигнување на трите „нули" до 2030 година преку, како што вели, нашата работа во УНФПА – нула неисполнета потреба за планирање на семејството, нула превентивна смрт на мајките и нула родово базирано насилство и штетни практики против жените и девојките.

-На пример, УНФПА предвидува дека пандемијата ќе го намали глобалниот напредок кон ставање крај на родово базираното насилство во оваа деценија за најмалку една третина. Покрај тоа, доколку ограничувањата на движењето продолжат за уште најмалку шест месеци, ќе придонесат за големи нарушувања во однос на пристапот до здравствени услуги, односно 47 милиони жени во земјите со ниски и средни приходи може да бидат лишени од пристапот до модерни контрацептивни средства, што резултира со несакана бременост кај седум милиони жени, вели Кенем во изјавата.

На овој ден, вниманието е свртено кон ранливоста и потребите на жените и девојките за време на кризата со Ковид-19, како и зошто заштитата на сексуалното и репродуктивно здравје и права и ставањето крај на пандемијата со родово базирано насилство, е императив, особено во овој период кога се соочуваме со Ковид-19.

-УНФПА работи на соодветно снабдување со современи контрацептивни средства и производи за репродуктивно здравје, како и обезбедување соодветна лична заштитна опрема за акушерките и другите здравствени работници на коишто им е потребна за да останат безбедни. Ние сме охрабрени што досега 146 земји членки се пријавиле на повикот на генералниот секретар да го остварат мирот во домот, на коишто целосно им се приклучуваме со цел да ги поддржиме. Како дел од нашето справување со Ковид-19, ние воведуваме иновации за да испорачаме далечински услуги, како што се телефонски линии, телемедицина и соодветно советување, како и користење и прибирање распределени податоци со цел поддршка на владите во врска со идентификување на оние на кои им е најпотребна, истакнува Канем.

Според неа, позитивните јавни пораки околу родовата еднаквост и родовите стереотипи и штетните социјални норми со кои се соочуваме може да го намалат ризикот од насилство. Во ова, додава таа, мажите и момчињата можат и мора да бидат клучни сојузници.

-Сексуалната и репродуктивната здравствена заштита претставуваат право, и како и бременоста и породувањето, така и човековите права не запираат за време на пандемија. Затоа, тоа што е потребно сега е заедно да придонесеме кон запирање на пандемијата и да го заштитиме здравјето и правата на жените и девојките, повика Канем. /МИА.

Клиниката за неврологија: „Водич за справување со невролошки заболувања во услови на ковид 19“

Со растечкиот број заболени од COVID-19, се објавуваат и сознанија за директно и индиректно инволвирање на нервниот систем.

Универзитетската клиника за неврологија изготви Водич за справување со невролошки заболувања во услови на Ковид-19 пандемија, кој содржи стручни препораки и насоки во однос на следење на одложени имунолошки посредувани компликации, невропсихолошки последици, и евентуално одложен развој на невродегенеративни заболувања кај заболените со Ковид-19. Препораките се направени врз основа на досегашните искуства и известувања од повеќе медицински центри, стручни асоцијации на невролози и мислења од експерти, а во согласност со иницијативaта на Европската академија за неврологија (EAN).

Водичот содржи посебни поглавја во однос на невролошките заболувања и ковид-19, како и генерални препораки за имуносупресивна/имуномодулаторна терапија кај пациенти со невролошки заболувања, како што се пациенти со мултипла склероза, миастенија гравис, невромускулни заболувања и неинфламаторни заболувања на централниот нервен систем.

- Со растечкиот број заболени од COVID-19, се објавуваат и сознанија за директно и индиректно инволвирање на нервниот систем. Со оглед на фактот дека ACE-2 (angiotensin converting enzyme-2), рецепторот за SARS CoV-2 е присутен во мозокот, јасно е дека вирусот може да ги инфицира невроните и да предизвика директни и индиректни невролошки компликации. Од друга страна, пациентите со некои невролошки заболувања и терапијата која ја примаат за третман, спаѓаат во групата лица со зголемен ризик за развој на компликации од COVID19. Сознанијата за COVID-19 секојдневно се збогатуваат и менуваат, што значи дека ставот за третман, постапување и процена на ризик кај пациенти со невролошки заболувања во услови на COVID-19 пандемија не е дефинитивен. Се наоѓаме на турбулентен терен со постојани динамични промени кои бараат следење и збогатување на знаењата и токму тоа е основната идеја за изработка на овој краток водич, кој треба да биде рамка во која неврологот со своето знаење и искуство ќе направи процена и ќе донесе одлуки за третман запазувајќи го индивидуализираниот пристап кон секој пациент, се посочува во воведот на овој водич.

Во Софија повторно демонстрантите со шатори го блокираа сообраќајот

Откако полицијата ги отстрани шаторите од клучните раскрсници во Софија во петокот наутро, група демонстранти синоќа повторно поставиле шатори  и го блокирале сообраќајот на најмалку три места.

Овојпат полицијата не ги отстрани шаторите. Главниот инспектор Красимира Стојадинова од управата за внатрешни работи изутринава изјави дека полицијата ќе продолжи да се обидува да ги убеди демонстрантите да ги отстранат блокадите. Никој не е приведен во текот на ноќта.

Претседателот Румен Радев прокоментира на Фејсбук дека Владата ја вклучила полицијата во судир со илјадници демонстранти.

„Подготвеноста да се жртвува социјалниот мир во името на политичкиот опстанок е чин на досега невидена политичка ескалација за време на бугарската транзиција. Кризата на бугарската демократија не може да се реши со репресивни и полициски мерки, може само да се продлабочи“, наведе Радев.

Тој смета дека оставките на Владата и на јавниот обвинител ќе бидат првиот чекор кон враќањето на Бугарија во владеењето на правото и демократијата.

24

СДСМ: Јакнењето на економскиот стандард на сите граѓани главен императив на новата Влада предводена од СДСМ

Продолжување на растот на платите и обезбедувањето постојана поддршка на домашниот приватен сектор се меѓу главните принципи на новата македонска економија.

СДСМ започна сериозни, темелни преговори со претседатели и високи претставници на политички партии кои се дел од новиот собраниски состав, за формирање на демократска, политичка, одговорна Влада, која на прво место од својата агенда ќе ја има новата македонска економија.

Продолжување на растот на платите и обезбедувањето постојана поддршка на домашниот приватен сектор се меѓу главните принципи на новата македонска економија.

Тука се вложувањата во младите и во рамномерниот регионален развој и продолжуваме да водиме посебна грижа за најсиромашните граѓани.

Јакнењето на економскиот стандард на сите граѓани ќе биде императив на новата Влада.

За две и пол години покажавме дека платите и економскиот стандард со СДСМ растат многу побрзо. Во следните 4 години ќе покажеме дека тие ќе растат уште повеќе, за да биде уште подобро.

Граѓаните ни ја дадоа довербата, бидејќи знаат дека во наредните четири години ќе работиме уште повеќе и уште подобро.

СДСМ

притисни ентер