Германските медиуми јавуваат дека е украдена колекција на антички накит.
Музејот поседува една од најголемите колекции накит, а според полициските информации, крадците провалиле во историскиот дел на музејот, кој се состои од два дела.
Во едниот се чува богатството од периодот на Август Втори, до 1733 година, а во другиот, нов оддел, има посебни експонати што му биле донирани на музејот од поединци.
Билд пишува дека имало прекин на електрична енергија во музејот и се верува дека станува збор за саботажа.
Разбојниците побегнале со автомобил и полицијата трага по нив, изјави пред новинарите полицискиот портпарол Томас Гитнер.
Тој додаде дека пожарот што избувнал ноќеска на мостот во близина на музејот, се верува дека е поврзан со прекинот на електричната енергија.
Музејот се состои од десет богато украсени простории кои прикажуваат околу 3000 парчиња накит и други ремек-дела направени од злато, сребро, скапоцени камења, слонова коска и друг вреден материјал.
Зградата била оштетена во Втората светска војна, но била повторно изградена. Таа е едно од најпосетуваните места во Дрезден од повторното отворање во септември 2006 година.
Еден од највредните експонати на музејот во Дрезден, 41-каратниот зелен дијамант, во моментов е сместен во Метрополитен музеј на уметноста во Њујорк, како дел од изложбата Making Marvels: Science and Slendor at Courts of Europe.