Експлозијата се случила на влезот во болницата „Сардар Мохамед Дауд Кан“ со 400 кревети во центарот на Кабул, по што полицајци биле испратени во областа, изјави портпаролот на Министерството за внатрешни работи Кари Саед Хости.
Засега нема официјални информации за жртви, но талибански официјален претставник анонимно изјавил за Ројтерс дека најмалку 15 лица загинале, а 34 се ранети.
Италијанската хуманитарна група Emergency, која управува со болницата на 3 километри од местото на експлозијата, објави дека досега се хоспитализирани 9 лица.
Фотографиите споделени од жителите покажуваат облак чад над местото на експлозијата, во близина на областа каде што се наоѓале амбасадите, во областа Вазир Акбар Кан.
Очевидци велат дека најмалку два хеликоптери ја прелетале областа.
Засега никој не ја презел одговорноста за нападот, но официјалната новинска агенција Бахтар цитирала сведок дека неколку борци на Исламската држава влегле во болницата и се судриле со безбедносните сили.
Вработен во болницата, кој успеал да побегне, рекол дека слушнал силна експлозија, по што следело пукање кое траело неколку минути.
Десет минути подоцна, се случила уште една, поголема експлозија, рече тој.
Тој рече дека не е сигурен дали експлозијата и пукањето се случиле внатре во болничкиот комплекс.
Исламската држава, која изврши серија напади врз шиитските џамии откако талибанците ја презедоа власта во август, уби повеќе од 30 луѓе во напад на болница во 2017 година.