Надал: Време е да се вратам

Поранешниот најдобар светски тенисер, Шпанецот Рафаел Надал, објави денеска дека ќе им се врати на натпреварувањата и ќе настапи на турнирот Бризбејн Интернешнл, кој се одржува јануари и служи како загревање за Австралија Опен.

Освојувачот на 22 грен – слем титули последен пат се појави на тенискиот терен во јануари годинава кога се откажа во второто коло поради проблеми со колкот.

„По една година отсуство од натпреварувањата, време е да се вратам“, рече Надал во видео објавено на социјалните мрежи.

„Ќе бидам во Бризбејн, првата недела од јануари. Се гледаме таму“, порача шпанскиот тенисер.

Надал претходно изрази желба уште еднаш да настапи на Ролан Гарос и да ја претставува Шпанија на Олимписките игри во Париз идната година пред да се повлече на крајот на својот 23 сезона во професионалниот тенис./МИА

Почна со работа отворениот базен во Куманово

Почна со работа отворениот базен во рамки на спортскиот комплекс базени Куманово, информираа денеска надлежните од јавното претпријатие „Куманово паркинг“, кој менаџира со базенот.

Базенот ќе работи секој ден од 10 до 18 часот.

- Претходно се чистеше самиот базен и неговата околина, цевките, водните пумпи, одводот, беа извршени поправки онаму каде што имаше потреба. Подготвени сме да ги примиме рекреативците, да овозможиме забава за сите генерации кои во жешките денови сакаат да се разладат. Секако дека има правила на користење и тие сите ќе мора да ги почитуваат, изјави Сашо Петрушевски, директор на ЈП „Куманово паркинг“

И оваа сезона за капачите ќе се грижат вработените-спасители на вода и медицински персонал. Цената за влезот е непроменета и изнесува 150 денари за ден.

Сали Бериша останува „нон грата“ во Велика Британија

Поранешниот албански претседател и експремиер Сали Бериша останува непожелен за Велика Британија, откако не му е прифатена жалбата од страна на апелација на „Специјалната комисија за жалби за имиграција“ во Лондон.

-Адвокатите на Бериша се обидоа, но не успеаја да го поништат британското досие преку кое Министерството за внатрешни работи го прогласи за „нон грата“ на 19 јули 2022 година. Според Британците, поранешниот премиер бил вмешан во корупција, се мешал во работите на правдата и имал поврзаност со организиран криминал, објави Ора њуз, повикувајќи се на Ројтерс.

Британската агенција ја објавила одлуката донесена денеска во „Специјалната комисија за жалби за имиграција“, каде судијата во случајот го отфрлил тврдењето на Бериша дека „ужива имунитет и не може да биде казнет на ваков начин“.

-Сметаме дека е несоодветно да се примени формулата за имунитет како поранешен шеф на државата наведено во оваа жалба. Поради оваа причина и другите наведени на затворената седница, приговорот на господинот Бериша за забрана за влез во Велика Британија се отфрла, стои во одлуката.

Бериша (80) во мај 2022 година, САД го прогласи за „нон грата“ заедно со семејството (сопругата, синот и ќерката).

Тој од декември минатата година е во домашен притвор, по обвинението за вмешаност во корупција и злоупотреба на службената положба, при приватизацијата на спортскиот комплекс „Партизан“ во Тирана. За минимален финансиски износ просторот го добил неговиот зет за ќерка, кога Бериша бил премиер, каде изградил повеќекатници, здобивајќи се со над 5 милиони евра профит.

Зголемена фреквенција на граничните премини „Блато“ и „Џепиште-Требиште“, кај Дебар

На граничните премини „Блато“ и „Џепиште-Требиште“ кај Дебар, во последните три дена од минатата седмица забележана е зголемена фреквенција.

Преку двата премина минале 7118 патници, од кои на излез 3460, додека на влез 3658 патници.

- Гледано одделно, на преминот „Блато“ на излез се регистрирани 3217 патници, најмногу во сабота или 1287, додека на влез 3418 најмногу во петок 1254 патници. На вториот граничен премин, Џепиште-Требиште, регистрирани се вкупно 483 патници, од кои на излез 243, додека на влез 240 патници, потврдија за МИА од Министертвото за внатрешни работи.

На преминот „Блато“, кој е на оддалеченот од четири километри од Дебар, со пуштањето во употреба на автопатот „Руга е Арбрит“ (Патот на Арбр), со што оддалеченоста од преминот, до Тирана, се намали од 180 на 70 километри, фреквенцијата е значително зголемена. Така, минатата година за влез и излез беа регистрирани вкупно 310.981 патници.

Граничниот премин кај Џепиште е на 15-тина километри од Дебар, е од локален карактер, па во летниот период работи од 8 до 20 часот и право да го користат имаат само жителите од граничниот регион, што подразбира општина Дебар и областа Голо Брдо на албанска страна. На овој премин лани биле регистрирани 19.352 патници.

притисни ентер