Муртезани: Прво доверба со Софија, потоа чекори за евроинтеграциите - Канал 5

Македонија

Муртезани: Прво доверба со Софија, потоа чекори за евроинтеграциите

Подобрување на односите и враќање на довербата меѓу Скопје и Софија, па потоа конкретни чекори за деблокада на македонските евроинтеграции – ова е одговорот на министерот за европски прашања Орхан Муртезани

Муртезани: Прво доверба со Софија, потоа чекори за евроинтеграциите

Подобрување на односите и враќање на довербата меѓу Скопје и Софија, па потоа конкретни чекори за деблокада на македонските евроинтеграции – ова е одговорот на министерот за европски прашања Орхан Муртезани, прашан дали се подготвува трет протокол со Бугарија за да се надминат разликите, нешто што претседателката Сиљановска Давкова претходно го предложи како креативно решение. Муртезани откри дека за подобрување на дијалогот меѓу двете земји активно се работи со европските партнери, но додаде и дека во моментов не може да се говори за процесот на уставни измени бидејќи грижите и дилемите на земјава не се соодветно адресирани.

-Тоа што се работи константно по локалните избори заедно со нашите европски партнери е воспоставување на дијалогот и враќање на довербата. Во моментов се прават напори за воспоставување дијалог и градење доверба, а потоа ќе стане збор и за можните начини за надминување на проблемот. / Секако дека на уставните измени мора да се работи, тоа е превземена обврска без која нема отворање на преговори и членство во ЕУ. Но, како што нагласив во моментот не можеме да зборуваме за процес на уставни измени кога сите тие наши грижи и дилеми не се соодветно адресирани,- - Орхан Муртезани – Министер за европски прашања.

На заедничката прес-конференција со шведската колешка Розенкранц, Муртезани ја нагласи и важноста за зачувување на кредибилитетот на политиката за проширување заснована на заслуги. Шведската министерка пак, ги поздрави евроинтегративните напори на земјава и повика да се искористи моментумот за проширување кој оцени дека постои во Унијата.

-Верувам дека добар дијалог со соседите е многу важен и тоа е исто така дел од станување на земја-членка во ЕУ и ние го поздравуваме и го поттикнуваме секој добар дијалог кој што може да биде остварен во таа смисла. Што се однесува до процесот сам по себе, Шведска многу јасно искажува дека откако ќе бидат спроведени уставните измени е на земјите - членки да го почитуваат договорот кој е направен и формално да почнат преговорите веднаш штом ќе бидат направени уставните измени,- - Јесика Розенкранц – Министерка за европски прашања на Шведска .

Порака земјите од регионот да го искористат моментумот во Унијата од самитот во Тирана минатата недела упати и еврокомесарката за проширување Марта Кос, која додаде дека целта е полноправно членство со целосни права. Премиерот Мицкоски инаку, пред локалните избори посочи дека можни се некакви активности за деблокада на евроинтеграциите по новогодишните празници и порача дека очекува промени во делот на добивање на гаранции од европските партнери.

YouTube video

Тагови: евроинтеграциските процеси

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

ЗНАМ: Македонија спроведува реформи и испорачува резултати, но заштитата на националното достоинство е нашата црвена линија

Посетата на Претседателот на Европскиот совет, Антонио Кошта, претставува значајна потврда дека Република Македонија успешно ја спроведува реформската агенда и испорачува конкретни резултати во процесот на европска интеграција.

ЗНАМ: Македонија спроведува реформи и испорачува резултати, но заштитата на националното достоинство е нашата црвена линија

Движењето ЗНАМ за Наша Македонија ја поздравува пораката што произлегува од оваа посета, дека реформите се препознаени, а напредокот на државата е видлив и признаен од европските институции.

Тоа е потврда дека Македонија чекори во вистинска насока и дека вложените напори даваат резултати.

Денес Македонија е препознаена како една од најуспешните земји во регионот во спроведувањето на реформските процеси. Особено значајно е што токму ресорите предводени од кадри на ЗНАМ се меѓу клучните носители на реформскиот напредок, институционалната модернизација и ефикасното спроведување на владините политики.

Министерството за правда и Министерството за јавна администрација, предводени од министри на ЗНАМ, покажаа дека реформите не се само декларативна заложба, туку конкретна акција што носи мерливи резултати.

Со професионален пристап, одговорност и јасна визија, тие успеаја да реализираат политики кои ја зајакнуваат правната држава, ја модернизираат администрацијата и ги доближуваат институциите до европските стандарди.

Овие резултати денес се препознаени и од нашите европски партнери, што претставува дополнителен поттик за уште посилно темпо на реформи и развој.

Но едновремено, како што реформите и резултатите не смеат да бидат доведени во прашање, така не смеат да бидат доведени во прашање ниту македонското достоинство, идентитет и националните интереси.

Токму затоа заштитата на националното достоинство останува нашата црвена линија.

Остануваме доследни на ставот дека европската интеграција мора да биде процес заснован на вредности, критериуми и заслуги, а не процес на постојани билатерални условувања.

Македонија припаѓа во Европската Унија поради својата европска определба, својата култура, историја и вредности, но пред се заради реформите што ги спроведува и резултатите што ги постигнува.

Движењето ЗНАМ цврсто стои на позицијата дека членството во Европската Унија мора да биде резултат на исполнети критериуми и успешни реформи, а не на нови политички барања кои ги надминуваат европските принципи и стандарди.

Нашата поддршка за европската иднина на Македонија е недвосмислена, но исто така недвосмислена е и нашата определба дека нема да прифатиме политика на уцени, диктати и бесконечно поместување на целта.

Македонија останува посветена на европскиот пат, со крената глава и со самодоверба. Ќе продолжиме да спроведуваме реформи, да испорачуваме резултати и да ја градиме европската иднина на државата, но едновремено ќе останеме цврсти во одбраната на националното достоинство, кое за нас претставува непремостлива црвена линија.

Движењето ЗНАМ за Наша Македонија ќе продолжи да биде двигател на реформите, чувар на националните интереси и силен глас за европска Македонија која напредува врз основа на сопствените успеси, а не под товарот на нови условувања.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Балкан

Видео: Гори амбасадата на Пакистан во Белград

Последниот кат од зградата е зафатен, пожарникарите се на пат!

Видео: Гори амбасадата на Пакистан во Белград

Пожар избувнал во зградата на амбасадата на Пакистан во Белград, дознава српски Курир.

Како што може да се види од видеа објавени на социјалните мрежи, густ црн чад го покрил просторот.

Во моментов нема официјални информации дали има повредени лица во инцидентот, ниту за евентуална материјална штета.

Тагови: Србија

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Балкан

Мицотакис во Софија на средба со Радев

Грчкиот премиер Кирјакос Мицотакис е во официјална посета на Софија.

Мицотакис во Софија на средба со Радев

Билатералните односи, како и теми од заемен интерес и од европската агенда, се очекува да бидат во фокусот на разговорите на Радев и Мицотакис во Софија, според официјалното соопштение од бугарската влада.

Посетата на Мицотакис на Софија е на покана на Радев, планирана е тет-а-тет средба на двајцата премиери, а потоа и состанок на делегациите на двете земји.

Како што информираа од кабинетот на грчкиот премиер, Мицотакис по средбата и заедничката прес-конференција, од Софија ќе замине за Тиват каде што ќе присуствува на вечера организирана од претседателот на Црна Гора Јаков Милатовиќ за лидерите од ЕУ и земјите од Западен Балкан по повод националниот празник на земјата, а во пресрет на самитот ЕУ-Западен Балкан што ќе се одржи утре.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер