Можно ли е вистинско обединување околу националните интереси? - Канал 5

Македонија

Можно ли е вистинско обединување околу националните интереси?

Обединување на власта и опозицијата за националните прашања е неопходно, но тоа треба да биде искрено, а не за дневно политички фолклор, децидни се политичките аналитичари. 

Можно ли е вистинско обединување околу националните интереси?

По повиците од премиерот Мицкоски за обединување и експресното отфрлање од СДСМ и Филипче препознавајќи во нив изговор за изолација на државата и неспроведување на уставните измени, дел од аналитичарите со препорака до партиите посериозно да ја сфатат неопходноста од национално обединување за државните прашања и евроинтегративниот пат. Според Марко Трошановски ветувачка беше лидерската средба меѓу Мицкоски и Филипче по изборот на новата Влада, но се покажа, дека нема политичка волја за дијалогот да продолжи.

-Ние немаме луксуз да се делиме. Тоа на сите ни е јасно и гледаме дека веќе 30 години ненаоѓањето на консензус околу стратешките цели не врти во место. Ситуацијата од тогаш па натаму е се повлошена. Дали тоа беше стратегија на СДСМ во стилот на ВМРО-ДПМНЕ кога беше опозиција да опонира на секоја идеја за обединување и консензус или, пак, е повеќе ригидноста на ВМРО-ДПМНЕ да ги прифати ставовите на СДСМ, во секој случај партиите мора да излезат над дневно партиската култура на поделби преку која што жнеат омраза на некој начин кај граѓаните и да ги делат. Мојата препорака би била да не биде тоа дневен фолклор како што е сега и да не се декларативни изјави туку и едната и другата страна имаат експерти коишто можат да продонесат за реформската агенда, с,ета Трошановски.

Повиците за обединување се добредојдени, но тие различно се отфрлаат зависно кој е власт или опозиција, вели Благојче Атанасовски. Според него политичките елити не успеаја да изградат национален консензус, а за тоа да се случи, вели, потребно е партиите да го сменат својот дискурс и реторика за нормален политички дијалог.

-За жал Македонија покажа преку практиката и преку искуството дека политичките елити не најдоа и не смогнаа сили да направат т.н национален консензус околу националните и државни интереси. Сето ова сме го гледале многу пати во минатото, без разлика дали ВМРО-ДПМНЕ или СДСМ биле на власт, секогаш имало некоја подадена рака, за жал во минатото сме гледале ситуации во кои едната или другата политичка партија од позиција на опозиција тоа не го смета дека е искрена подадена рака и на крај се сведува дека е дневно политички фолклор. Апсолутно без разлика дали доаѓаат од опозиција или од власта се добредојдени. Но ќе бидам умерен оптимист или реален песимист дека и од оваа најава може навистина да се случат суштински промени, изјави Атанасовски.

И покрај дијаметрално спротивставените позиции на ВМРО-ДПМНЕ и СДСМ во моментов и Трошановски и Атанасовски очекуваат поголема свесност од лидерите и партиите за приоритетите на државата и граѓаните.

YouTube video

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Честитка од претседателката Сиљановска-Давкова по повод 11 Октомври – Денот на народното востание

На 11 Октомври 1941 година, македонските востаници му се придружија на антифашистичкиот демократски фронт, решени да го продолжат патот на илинденците до конечната победа и слобода, формирајќи македонска држава. 

Честитка од претседателката Сиљановска-Давкова по повод 11 Октомври – Денот на народното востание

На 11 Октомври 1941 година, македонските синови и ќерки тргнаа во решителен бој против фашистичките окупатори, бранејќи ја татковината.

Во време кога фашистичките сили маршираа низ европските држави, македонскиот мирољубив народ не беше тивок набљудувач на злото, туку патриотски ја прифати обврската за ослободување.

Идеја водилка на востанието како народен отпор беше вековниот стремеж за слободна македонска држава. Востанието прерасна во Народноослободителна борба, низ која, со крв, саможртва и непоколебливост на знајни и незнајни јунаци, се трасираше патот кон АСНОМ.

11 Октомври не е само важен историски датум. Тој е незаборавна и небришлива меморија и вечен завет за чување и развој на татковината. Заветот пак, не значи евоцирање спомени, имиња и настани, туку водење државен и општествен живот, достоен на нивната жртва.

Прилепските и кумановските востаници, но и сите други, не ни оставија само славна страница од минатото, туку аманет дека слободата се добива со храброст, дека правдината бара стаменост и пожртвуваност, дека држава се гради со труд, чест и одговорност. Нивниот херојски подвиг нè задолжува да бидеме не само нивни благодарни потомци, туку и достојни чувари и бранители на нивното непроценливо дело.

Се разбира, денешново време наметнува други приоритети, но секогаш остануваат човековата жед за правда, достоинство и слободен живот како насушна потреба.

Современиот бурен, сложен и конфликтен историски миг, од нас бара сплотеност, зрелост и мудрост, како неопходни доблести во справувањето со новите предизвици и проблеми со коишто сме соочени не само ние, туку и Европската Унија, Европа и светот.

Време е да се однесуваме кон државата како кон заеднички дом, во кој различностите не се повод за делби, туку причина за учење едни од други, за разбирање едни други, за градење свест за заедничко добро.

Мора да градиме правна и демократска држава, но и граѓанско општесто во кое законите ќе важат за сите, институциите ќе им служат на сите, а сечие човеково достоинство ќе биде неприкосновена вредност.

Секое поколение има свој испит пред историјата. Нашиот испит не е да раскажуваме, а уште помалку да ги повторуваме битките на претходниците, туку, да ги оживотвориме нивните подвизи: со знаење, наместо со незнаење; со право, етика и морал, наместо со самоволие; со единство, наместо со раздор; со заслуги, наместо со политички, партиски и статусни привилегии.

На крајот, на востаниците и на партизаните им должиме заслужена почит што се избориле и ни оставиле држава!

Ние пак, имаме политичка, економска и граѓанска обврска да градиме демократска, правна и просперитетна европска држава.

Нека ни е честит 11 Октомври – Денот на народното востание!

д-р Гордана Сиљановска-Давкова

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Мицкоски со честитка за 11 Октомври: „Слободата е дело што секоја генерација мора да го продолжи“

Премиерот Христијан Мицкоски упати честитка по повод 11 Октомври – Денот на народното востание, потсетувајќи на храброста и пожртвуваноста на предците кои се бореле за слободата на Македонија.

Мицкоски со честитка за 11 Октомври: „Слободата е дело што секоја генерација мора да го продолжи“

Во објавата, Мицкоски истакнува дека борците од пред 85 години немале гаранција за победа ниту сигурност дека ќе се вратат во своите домови, но верувале дека слободата вреди повеќе од сопствениот живот.

Пред осумдесет и пет години, во една од најтешките ноќи на нашата историја, имало луѓе кои не знаеле дали ќе го дочекаат утрото. Но, знаеле дека татковината мора да дочека подобро утро. Тие немале гаранција дека ќе победат. Немале сигурност дека ќе се вратат во своите домови. Немале можност да знаат како ќе изгледа светот што ќе го остават зад себе. Но, имале нешто посилно од стравот. Имале верба дека слободата вреди повеќе од сопствениот живот.

Нашите предци го направија она што во нивното време изгледало невозможно. Ја отворија вратата на слободата. Нашата должност е таа врата никогаш да не се затвори и низ неа да поминат генерации кои ќе живеат подобро, послободно и подостоинствено.

Нека овој 11 Октомври не биде само ден на сеќавање. Нека биде ден на нова одговорност. Одговорност да ја чуваме слободата. Затоа што слободата не е завршена приказна. Слободата е дело што секоја генерација мора да го продолжи.

Честит 11 Октомври!

Да е вечна Македонија!

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Свет

Видео: Масакр на аеродромот во Ријад: 12 загинати, повеќе од 300 повредени

Дванаесет лица загинале, а повеќе од 300 беа повредени во вчерашниот ракетен напад врз Меѓународниот аеродром „Крал Калид“ во Ријад, соопштија саудиските власти. 

Видео: Масакр на аеродромот во Ријад: 12 загинати, повеќе од 300 повредени

Одговорноста за нападот ја презедоа јеменските Хути, кои се поддржани од Иран.

Меѓу загинатите има четворица државјани на Саудиска Арабија, како и државјани на Бангладеш, Палестина, САД, Египет, Јордан, Сирија и Судан. Некои од повредените се во критична состојба.

Проектилот погоди дел од аеродромскиот комплекс каде што се наоѓаат терминалите 3 и 4 за домашни летови. Ова беше трет напад врз аеродромот во Ријад во рок од неколку дена.

По нападот, сите аеродромски операции беа привремено прекинати, а летовите наменети за Ријад беа пренасочени кон други аеродроми. Очевидец изјави за Ројтерс дека по експлозијата видел неколку повредени лица како лежат во терминалот. Друг повреден патник раскажа дека видел нешто на небото непосредно пред ударот, по што дел од таванот се урнал во близина на излезот за качување во авион.

Саудиската управа за цивилно воздухопловство претходно извести за жртви, повредени лица и материјална штета како последица на претходни напади. Тројца саудиски државјани загинаа во нападите на 8 октомври, додека еден судански државјанин почина претходниот ден во посебен напад врз аеродромот во Ријад.

По најновиот напад, Хутите изјавија дека авиокомпаниите треба да го избегнуваат саудискиот воздушен простор, кој тие го прогласија за зона на воени дејствија.

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер