14-те експерти од двете страни денеска и утре во Софија ќе се обидат да ги остварат оптимистичките очекувања на бугарскиот премиер Борисов, прашањата да се затворат до крајот на месецов. Но, уште не почната средбата, првиот човек на бугарската страна, домаќинот Ангел Димитров, распали по македонските колеги.
Во денешното интервју за бугарското национално радио, екс амбасадорот вели дека македонската страна неправилно го интерпретира минатото, а обвини и дека се повлекла од некои прашања кои го третираат средниот век, а кои се сметале за затворени. Тој даде свое мислење и како треба да се гледа на ликот на Делчев.
-Нашите колеги не можат да бидат индиферентни пред фактите, документите, како и пред неопходноста личноста на Гоце Делчев да ја разгледуваат во контекст на неговото историско време, а не на начин, според кој, тој е прифатен и наложен како симбол подоцна, во време на постоењето на современата македонска држава.
Сигналите што пристигнуваат, особено во последните неколку месеци, покажуваат дека нашите колеги не пројавуваат голема склоност да се разделат од традиционалните тези во толкувањето на минатото, изјави Ангел Димитров
За изјавата на Димитров, Канал 5 се обиде, но не успеа да добие став од претседателот на македонскиот тим на комисијата, Драги Ѓорѓиев. Ова е седма во низа средба на мешовитата комисија, на која покрај Делчев, треба да се усогласат и македонските учебници за седмо и бугарските за шесто одделение, кои го опфаќаат средно-вековниот период.
Досега комисијата договори заеднички чествувања на Св.Кирил и Методиј, Св.Климент, Св.Наум и Цар Самоил, како согласнот за подобрување на учебниците по историја, кои се однесуваат на античкиот период од минатото.