МНР побара од Софија да се огради од изјавите на Џамбаски и Костадинов

Македонското МНР побара од официјална Софија да се огради од како што велат, недолични изјави на политички фигури од Бугарија... 

МНР реагира до официјална Софија за антимакедонските провокации во Скопје од бугарскиот европратеник Ангел Џамбаски и лидерот на Преродба Костадин Костадинов. Двајцата бугарски политичари на вчерашното одбележување на 95 годишнината од смртта на Мара Бунева во центарот на Скопје упатија иредентистички пораки, а на собирот меѓудругото се скандираше дека „Македонија е Бугарска“, македонските политичари пак, беа наречени србомани. Од МНР велат дека со големо внимание ги следат ваквите изјави на како што велат одредени маргинални политички фигури од Бугарија чии провокации продолжуваат, без да се води сметка за напорите кои ги вложуваат Македонија и Бугарија за одржување на конструктивната соработка во билатералните односи.

„Министерството, по дипломатски пат соодветно реагира до официјална Софија, во кое побара оградување од недоличните изјави кои ги повредуваат чувствата на граѓаните на Македонија, и воедно серизно им наштетуваат на напорите за унапредување на добрососедските односи меѓу двете земји“, соопштија од МНР.

Реагираа и дел од политичките партии. Од Македонски Концепт бараат да се преземат институционални мерки против Џамбаски, по како што велат, неофашистичките напади врз уставниот поредок на Македонија и негирање на сè што е македонско од негова страна. Осуда дојде и од опозициската ВМРО – ДПМНЕ, од каде велат дека ваквите пораки доаѓаат поради политиката на власта.

Сепак, дел од политичките аналитичари во земјава сметаат дека државата не треба да преземе сериозни чекори против оваа група. Според аналитичарот Петар Арсовски треба да се провери дали провокациите доаѓаат од мала група граѓани или пак ги претставуваат официјалните политики на Бугарија.

„Ги гледам провокациите кои доаѓаат од тие неколкумина кои беа таму собрани. И сега, прашањето е како македонската страна треба на тоа да реагира. Јас не сум застапник на тезата дека ние околу тоа треба да правиме некаква преголема драма или некакви пресериозни реакции, од две причини. Прво, на балканот нема недостаток на националисти. Поентата е дали се тие маргиалци или ја претставуваат main stream бугарската политика. Ние се бориме за тие да останат маргиналци“, вели Арсовски.

Џамбаски и Костадинов и се познати на македонската јавност по честите настапи во кои упатуваат иредентистички пораки и навреди за македонскиот народ и за политичарите во земјава. Македонското МНР до сега во неколку наврати упати официјални ноти до Софија, но без ефект. Последната провокација беше за време на отворањето на бугарскиот културен центар во Скопје, каде бугарскиот пратеник и лидер на Преродба порачаа дека Македонија и Бугарија треба да бидат една држава, во таа прилика премиерот Ковачевски истакна дека политичари како Џамбаски и Костадинов се непожелни во државава.

Нетанјаху е против едностраното признавање на Палестина, парламентот го поддржа

Парламентот на Израел денеска гласаше за поддршка на декларативната одлука на премиерот Бенјамин Нетанјаху со која се противи на едностраното формирање на палестинска држава.

Парламентот на Израел денеска гласаше за поддршка на декларативната одлука на премиерот Бенјамин Нетанјаху со која се противи на едностраното формирање на палестинска држава, по зголемените меѓународни апели за заживување на напорите за постигнување решение со две држави по деценискиот конфликт.

Партијата Ликуд на Нетанјаху соопшти дека 99 од 120 пратеници гласале за поддршка на одлуката, која е усвоена од владата претходно оваа недела.

Ставот на Израел е исто така дека секој траен договор со Палестинците мора да се постигне преку директни преговори меѓу страните, а не со меѓународни диктати.

Војната во Газа, која беснее по ненадејниот напад на Хамас на 7 октомври 2023 година, е последниот во серијата конфликти меѓу Израелците и Палестинците што трае седумдесет години и континуирано го дестабилизира Блискиот Исток.

Напорите за постигнување решение со две држави се во мирување од 2014 година. Американскиот претседател Џо Бајден, исто така, се обидува да постигне поширок договор на Блискиот Исток, кој исто така би вклучувал нормализација на односите меѓу Израел и Саудиска Арабија и другите арапски држави , како и формирање на палестинска држава.

Јакимовски: На Македонија ѝ треба квалитетен претседател

Вечерва својата кандидатура за претседател ја објави и претседателот на ГРОМ, Стевчо Јакимовски…

Јакимовски во обраќањето пред членството рече дека на Македонија ѝ е потребен квалитетен претседател, со што ја најави својата кандидатура за претседателските избори.

Парис Хилтон го прослави роденденот со супер луксузна забава во приватниот авион (ФОТО)

Славната Парис Хилтон го прослави својот 43-ти роденден за време на викендот, а со своите следбеници на Инстаграм сподели видеа од нејзината луда забава.

Парис во приватен авион тргна на патување со сопругот Картер Реум и нивниот едногодишен син Феникс Барон.

Иконата од почетокот на 2000-тите првпат сподели видео од Реум како го носи нивното машко бебе додека оди кон црн автомобил, додека му кажува како „ќе се забавува за роденденот на мама“. Таа потоа објави уште едно видео на кое се гледа надворешноста на приватниот авион украсен со десетици балони.

Кога се качила во авионот, Хилтон ја насочила камерата кон неколку маси украсени со цвеќиња, шишиња шампањ, слатки и бели очила за сонце во облик на срце. Во кадарот можеа да се видат и колачиња и голема кутија Шанел, потенцијален роденденски подарок за Парис.

Во третото видео што Хилтон го сподели на Инстаграм, таа се појави пред камера облечена во крзнена капа од Луј Витон, црна јакна и пижами со леопард принт. Иако таа го држеше синот во кадрите, нивната ќерка Лондон Мерилин не беше во ниту една од кадрите, но таа се отвори за својот живот како мајка на две деца во објава на Инстаграм во саботата.

- Се чувствувам благословено. Од мајчинство до женските должности и залагање за она што е правилно... Ова беше најдобрата година досега! – напиша Парис, пренесува Јутарњи лист.

Да потсетиме, наследничката на една од најголемите империи во светот, Парис Хилтон, во 2023 година доби две деца со помош на сурогат мајка.

Прво го доби синот Феникс, а потоа и ќерката Лондон.

притисни ентер