Младоженецот по свадбата доживеа разочарување кога го отвори подарокот од своите родители: „Што е ова, навистина не е фер!“ - Канал 5

Живот

Младоженецот по свадбата доживеа разочарување кога го отвори подарокот од своите родители: „Што е ова, навистина не е фер!“

Еден младоженец беше разочаран кога сфати дека поддршката од неговите родители за планирањето на неговата свадба, како и самиот свадбен подарок, не биле во согласност со неговите очекувања.

Младоженецот по свадбата доживеа разочарување кога го отвори подарокот од своите родители: „Што е ова, навистина не е фер!“

Поради ова почна да ги преиспитува семејните ветувања и принципот „еднакво за сите“ кој го учеле додека растел.

Во својата објава на „Reddit“, тој откри дека особено се чувствува повредено затоа што неговите родители вложиле значително повеќе пари во свадбата на неговата сестра отколку во неговата. Иако очекувал дека родителскиот придонес ќе биде сличен, големата разлика од дури 17.000 евра предизвикала чувство на неправда и фрустрација.

– Цел живот слушав како велат: „Секогаш ќе се погрижиме работите да бидат еднакви“ и дека, без разлика колку ќе потрошат за свадбата на мојата сестра, ќе сторат исто и за мене – напиша тој, додавајќи дека смета дека паричниот придонес од неговите родители за неговата свадба не бил фер:

– Потрошија вкупно околу 17.000 евра за свадбата и приемот на сестра ми, а покрија и трошок за нејзината венчаница – кој веројатно чинел стотици или илјадници евра – објасни тој, додавајќи дека родителите на нејзиниот сопруг платиле само вечера пред свадбата.

„Го отворив нивниот подарок и бев шокиран“

Сепак, една година подоцна, неговите родители не беа подготвени да се „отворaт“ толку многу, плативќи само вечера пред свадбата – додека родителите на неговата сопруга ја платиле целата прослава. Како што додаде, знаејќи дека не се потрошиле многу на свадбата, очекувал дека како подарок ќе добие поголема сума од нив, но тоа не се случило.

– Го отворив подарокот од родителите и бев шокиран – само честитка и 350 евра… дали сум луд што мислам дека требаше да ни дадат повеќе? Цел живот слушав како зборуваат за некаква еднаквост и сега доживеав вакво нешто?! – напиша тој, додавајќи дека знае дека може да звучи расипано или „како каприциозно дете“, но дека би сакал повеќе да не добил никаков подарок отколку оваа мала сума.

„Конзистентноста во еднаквоста вреди повеќе од сè“

Корисниците на Reddit изразија различни мислења во коментарите. Некои забележаа дека трошоците за свадбите на братот и сестрата биле поделени на ист начин, укажувајќи дека во двата случаи семејството на младоженецот платило вечера пред свадбата, додека семејството на младата ја платило свадбата. Други тврдеа дека родителите треба да им дадат на своите деца еднаков износ за „најправеден пристап“, дури и ако парите не биле искористени на ист начин.

– Никогаш не би им давал различни износи за свадба на своите деца само затоа што постои стара традиција дека родителите на младата плаќаат прослава – беше најпопуларниот коментар.

Друг коментатор се согласи и додаде:

– Таа конзистентност во еднаквоста вреди повеќе од било кој поединечен подарок, затоа што ја чува правдата и почитта меѓу браќата и сестрите.

Извор: Биз портал

Тагови: младоженец родители свадба

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Општина Аеродром го асфалтира паркингот пред детската градинка „Црвенкапа“

Градоначалникот на Општина Аеродром Дејан Митески денеска изврши увид во градежните активности за асфалтирање на паркинг-просторот кај детската градинка „Црвенкапа“ во Стар Аеродром.

Општина Аеродром го асфалтира паркингот пред детската градинка „Црвенкапа“

Со уредувањето и обележувањето на паркинг-местата се добива повеќе функционален простор, подобра инфраструктура и поуреден изглед во овој дел од општината.

Најважно од сè, со ова обезбедуваме посигурен и полесен пристап до градинката за родителите и за нашите најмлади. Кога инвестираме во инфраструктурата, инвестираме во секојдневието на граѓаните.

Општина Аеродром

Тагови: Општина Аеродром

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Култура

Смеење до солзи со „Секстет“ на НУ Народен театар Битола на годинешното издание на фестивалот „Денови на комедијата“

На сцената на НУЦК „Трајко Прокопиев“ – Куманово вчеравечер одекна силен и долг аплауз за екипата на НУ Народен театар Битола, која со својата изведба повторно ја воодушеви и ја насмеа до солзи публиката која ја исполни салата до последното столче.

Смеење до солзи со „Секстет“ на НУ Народен театар Битола на годинешното издание на фестивалот „Денови на комедијата“

„Секстет“ и овојпат покажа дека добрата комедија не познава граници – се игра, се чувствува и се споделува со публиката.

„Од срце му благодариме на организаторот на фестивалот „Денови на комедијата“ за поканата, прекрасното добредојде и гостопримството. До следната средба – со уште многу смеа, аплаузи и театарски моменти“, истакнуваат од Битолскиот театар.

Претставата „Секстет“ секогаш го полни гледалиштето до последното место, комедијата од Марк Камолети, во режија на Марјан Георгиевски, па така и овојпат салата беше исполнета со публика која ги награди актерите на Битолскиот театар со долготрајни аплаузи.

Недоразбирања, тајни, љубовни заплети и урнебесни пресврти секогаш ја тераат публиката да се смее од почеток до крај.

Зошто комедија? Затоа што премногу долго сме сериозни.

Живееме во време на прегласни информации и постојани кризи.

Научивме како да бидеме загрижени, заборавивме да се смееме. Во претставата играат: Бернар -Николче Пројчевски, Жаклина-Катерина Аневска Дранговска, Роберт -Александар Димитровски, Сузан-Сандра Грибовска Илиевска, Сузет -Анастасија Чипуровска, Џорџ-Борче Ѓаковски.

Костимографијата е на Андреј Георгиевски, сценографијата на Влатко Чачоровски, музика -Александар Димовски.

29.издание на Фестивалот оваа година се одржува од 23 септември до 5 октомври. Во текот на фестивалските денови, публиката има можност да проследи театарски претстави исполнети со хумор, квалитетна актерска игра и препознатлива фестивалска атмосфера преку изведба на театрите од Македонија и земјите од регионот. Фестивалот ќе биде затворен со претстава надвор од конкуренција, посветена на годинашниот лауреат Игор Џамбазов. Фестивалот е поддржан од Министерството за култура и туризам и од Општина Куманово.

Тагови: Денови на комедијата

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

Македонија

Јанев на Меморијалниот турнир „Загинати бранители 2001–2015“: Македонија ги памети своите херои, нивната жртва е наша трајна обврска

Директорот на Бирото за јавна безбедност Александар Јанев денеска се обрати на Централниот меморијален турнир во мал фудбал во чест на загинатите бранители 2001–2015, кој се одржува во спортскиот центар „Борис Трајковски“. 

Јанев на Меморијалниот турнир „Загинати бранители 2001–2015“: Македонија ги памети своите херои, нивната жртва е наша трајна обврска

На настанот се обрати и министерот за одбрана Владо Мисајловски, кој го отвори Меморијалниот турнир.

Пред членовите на семејствата на загинатите бранители, претставниците на Здружението „Херои на Македонија 2001–2015“, колегите и натпреварувачите, директорот Јанев истакна дека турнирот веќе 24 години ја чува жива меморијата за оние кои ги положија своите животи за Македонија, нејзиниот мир и безбедноста на граѓаните.

„Денес не сме тука само поради традицијата. Тука сме затоа што имаме обврска да паметиме. Да ги паметиме нашите колеги, пријатели, браќа, сопрузи, татковци и синови кои ја носеа униформата со чест и кои, извршувајќи ја својата должност, ја дадоа најголемата жртва што човек може да ја даде. Нивните имиња не се само дел од историјата на нашите безбедносни сили. Тие се дел од историјата на Македонија“, истакна Јанев.

Тој нагласи дека обврска на денешните генерации е споменот за загинатите бранители да се пренесува и на генерациите што доаѓаат, потсетувајќи дека слободата, мирот и безбедноста не треба да се земаат здраво за готово. Посебна почит им оддаде на семејствата на загинатите, нагласувајќи дека институциите имаат обврска да покажат дека жртвата на нивните најблиски никогаш нема да биде заборавена.

Министерот за одбрана Владо Мисајловски истакна дека мора да се чува споменот за оние кои го дале својот живот за татковината и да се пренесе на следните генерации.

„Она што треба да го направиме е да се сплотиме и да покажеме дека хероите не се забораваат. Се заблагодарувам на секој еден припадник на Армијата, сите што ја носат униформата кои секојдневно работат за нашата држава. Министерството за одбрана ќе биде секогаш тука да помогне и достојно да покаже почит кон хероите“, истакна министерот Мисајловски.

На крајот, директорот Јанев изрази благодарност до Здружението „Херои на Македонија 2001–2015“, Министерството за внатрешни работи и сите кои веќе 24 години ја одржуваат оваа традиција, порачувајќи дека хероите живеат сè додека ги паметиме и дека им должиме да ги паметиме со гордост, достоинство и благодарност.

Тагови: Александар Јанев

Крадењето авторски текстови е казниво со закон. Преземањето на авторски содржини (текстови) од оваа страница е дозволено само делумно и со ставање хиперлинк до содржината што се цитира.

притисни ентер