Технологија

Мистериозна мисија: Слета американски вселенски авион, не се знае кога бил лансиран

X-37B Spacecraft го надмина претходниот рекорд на најдолг лет со тоа што останал во орбитата 908 дена.

Автономното летало со кое управуваат Вселенските сили на Соединетите Американски Држави (USSF), е официјален и класифициран проект, па затоа се објавени малку информации за неговата намена или мисии.

Но, официјални лица велат дека последниот лет, лансиран во мај 2020 година, извршил серија научни експерименти. X-37 Orbital Test Vehicle (OTV) најпрво ѝ припаднал на НАСА, но моделот подоцна бил предаден на американската војска, која ја создаде варијантата X-37B, пишува New Scientist.

X-37B прв пат полетал во орбитата во 2010 година. Досега се конструирани две такви летала кои вршеле долготрајни летови; вклучително и мисија која траела 674 дена и завршила во 2014 година. Леталото било конструирано од Боинг и наликува на минијатурен вселенски шатл и функционира на сличен начин.

Разликата е во тоа што X-37B нема човечки екипаж, туку се контролира со далечински управувач од Земјата. Се лансира вертикално на ракета Atlas V или Falcon 9. Поминува долги периоди во орбитата, на надморска височина од околу 400 километри, а потоа слетува како традиционално вселенско летало. За време на летот во орбитата, користи соларни панели за собирање енергија.

Последната мисија, позната како OTV-6, завршила на 12 ноември кога X-37B слетал во вселенскиот центар Кенеди на НАСА. Властите наведуваат дека за време на мисијата биле спроведени низа научни експерименти, вклучително и тест дизајниран од американската поморска истражувачка лабораторија, во кој сончевата енергија се собирала од соларните панели и се емитувала на Земјата во форма на микробранови.

X-37B исто така испуштил сателит на електромагнетен погонски систем дизајниран од кадети на Академијата за воздухопловни сили на Соединетите Американски Држави. Други експерименти биле спроведени од НАСА и, меѓу другото, тестирале како престојот во вселената влијае на различни материјали и семиња.

Се шпекулира дека X-37B има и воена намена, како што било случајот со неговиот претходник. Шефот на руската вселенска агенција Роскосмос во тоа време, Дмитриј Рогозин, изјави во интервју претходно оваа година дека леталото може да носи „некаков вид на шпионска направа или оружје за масовно уништување“.

USSF не одговориле на прашањата на New Scientist за целта на овој мистериозен вселенски авион, но Џозеф Фритшен изјавил дека „X-37B продолжува да ги поместува границите на експериментирањето“.

"Способноста да се спроведуваат експерименти во орбитата и да се носат примероци назад на Земјата за подетална анализа значи многу и за воздухопловните сили и за научната заедница. „Додадениот модул на OTV-6 ни овозможи да спроведеме повеќе експерименти од кога било досега." изјавил Фритшен од УССФ.

Живот

Град им нудел милиони на луѓе за да се доселат, но имало бизарен услов- никој не се јавил

Градот Каинан во јапонската префектура Вакајама смислил необичен план за привлекување жители, а понудата вклучувала и финансиска помош за новодојдените.

Стратегијата била дизајнирана за 2021 година, но за кандидатите имало услов - тие да го носат презимето Сузуки.

Како „родно место“ на Сузуки, било одлучено да се игра на таа карта, а посебно се мислело на 750.000 граѓани кои го носат тоа презиме и живеат во Токио и соседните префектури (Чиба, Саитама и Канагава).

Најавено е дека секое семејство што ќе се пресели ќе добие по 1 милион јени (6.300 евра), како и исто толку за секое дете под 18 години, пренесува The Guardian.

Меѓутоа, две години по започнувањето на кампањата, објавени се поразителни резултати.

„Потврдувам дека никој со презиме Сузуки не се преселил во Кајнан. Едно лице се распраша, но не отиде подалеку од тоа“, откри Томонари Фуџита, шеф на канцеларијата за развој.

Покрај паричната стимулација, на луѓето очигледно не им делувал и слоганот дека со преселбата „ќе се поврзат повторно со своите предци“.

Забележано е дека кланот Сузуки се преселил во денешен Кајнан за време на периодот Хејан (794-1185).

„Гледаме сериозен пад на бројот на жители. Мислевме дека со кампањата ќе привлечеме луѓе со презимето Сузуки, но се чини дека имало и други пречки“, изјави Фуџита.

Официјалните лица се надеваат дека новиот хотел, чија изградба ќе биде завршена во 2024 година, ќе ги инспирира граѓаните со презимето Сузуки да дојдат и да се поврзат со местото на нивното потекло.

Фудбал

Наредните два месеца во Грција ќе се игра фудбал пред празни трибини

До 12 февруари 2024 година, на навивачите ќе им биде забранет влез во натпреварите од фудбалската Суперлига во Грција.

Ова го соопшти портпаролот на грчката Влада, Павлос Маринакис.

Ова е конкретен чекор во борбата против хулиганите, кои со децении вршат насилство на трибините.

Последниот инцидент беше виден во четвртокот кога полицаец беше тешко повреден за време на нередите на одбојкарскиот натпревар меѓу Олимпијакос и Панатинаикос. Во таа прилика полесно се повредени десетици полицајци, а уапсени се најмалку 400 хулигани.

Оваа одлука важи и за европските натпревари, па ТСЦ во четврток ќе игра против Олимпијакос без присуство на публика.

Свет

Израелците со падобрани им доставуваат вода на своите војници во Газа (ВИДЕО)

Израел со падобрани им испрати седум тони вода на војниците во Газа, соопштија израелските одбранбени сили (ИДФ) и прикачија видео од воената акција.

Оттаму додаваат дека ова е прв ваков логистичко-воен зафат, објави Телеграф.

„Испорачавме околу седум тони вода на израелските војници во градот Кан Јунис со падобрани. Системот „водено снабдување“ е напреден оперативен систем кој овозможува испорака на опрема до копнените сили преку падобрани и со употреба на прецизна навигациска технологија “, пишува ИДФ на Телеграм.

„Ова е прва ваква оперативна употреба на системот по Втората либанска војна. Го користевме товарниот авион Шимшон за испорака“, додава тој.