Македонија

Мисовски се сретна со главните државни ревизори на Македонија и на Полска

Потпретседателот на Собранието, Горан Мисовски, денеска оствари средба со главниот државен ревизор Максим Ацевски и со претседателот на Врховната ревизорска канцеларија на Полска, Мариан Банас, кој е во посета на Државниот завод за ревизија.

На средбата се разговараше за улогата на ДЗР, за неговата соработка со Собранието и за значењето на институцијата во поглед на контролата на јавните финансии, како и за можностите за користење искуства во однос на поставеноста на Врховната ревизорска канцеларија на Полска и нејзините релации со полскиот Парламент.

Мисовски истакна дека ДЗР има посебна позиција во земјава, дека главниот државен ревизор беше избран со консензус меѓу пратениците и дека институцијата остварува добра и плодна соработка со Собранието, каде што се цени релевантноста на ревизорските извештаи.

Потпретседателот на Собранието ги информира соговорниците дека следната седмица почнува изборната кампања во земјава, пред двата изборни циклуси што претстојат, така што во овој период не се предвидени седници и други поголеми активности во законодавниот дом. Затоа, пак, како што рече, очекува ДЗР будно да ги следи случувањата за време на изборите во делот на своите надлежности.

Во тој контекст, главниот државен ревизор Ацевски посочи дека ДЗР и овој пат до крај и објективно ќе ги следи сите процеси. Тој предложи по конституирањето на новиот состав на Собранието да се организира посета на пратеници во Парламентот на Полска, како можност за размена на искуства, посебно во однос на разгледувањето на ревизорските извештаи.

Ацески, како и неговиот колега Банас, ја истакнаа добрата меѓусебна соработка на ДЗР и Врховната ревизорска канцеларија на Полска, како и нивната соработка и постојана размена на искуства во рамки на Европската организација на државни ревизии.

Банас, исто така, истакна дека е добро да се слушне како е вреднуван ДЗР во земјава, посочувајќи дека за секоја држава е многу важно да има силни контролни институции, посебно во делот на контролата на јавните финансии, со оглед на тоа што, како што рече, станува збор за пари на граѓаните,соопштуваат од Собранието.

Свет

Најмалку 93 лица загинаа во поплавите во Кенија

Кенија го одложи отворањето на училиштата за една недела поради последиците од големите поплави предизвикани од обилните дождови кои ја погодија оваа источноафриканска земја од средината на март и досега однесоа речиси 100 животи.

Се проценува дека 93 лица загинаа во поплавите, а се очекува бројот да се зголеми откако синоќа се преврте брод во северниот округ Гариса.

Кенискиот Црвен крст соопшти дека 23 лица биле спасени од чамецот, но десетици се уште се водат како исчезнати.

Во соопштението на Министерството за образование се наведува дека во поплавите тешко се оштетени некои училишта. Локалните медиуми објавија дека повеќе од 100 училишта се поплавени, а на многу од нив им се урнати ѕидови и покриви.

Сите училишта кои денеска требаше да бидат отворени, го одложија тоа за 6 мај.

Обилни дождови ја погодија Кенија од средината на март, а Одделот за метеорологија на земјата предупредува на опасност од нови врнежи.

Најголем број жртви се евидентирани во главниот град на Кенија, Најроби, каде во вчера беше поплавен и аеродромот. Снимките на социјалните мрежи покажуваат дека се поплавени пистата, терминалот и товарниот дел на аеродромот.

Повеќе од 200.000 луѓе низ земјата се погодени од поплавите, а куќите беа потопени во областите подложни на поплави додека луѓето бараа засолниште во училиштата.

Кенискиот претседател Вилијам Руто побара од Националната служба за млади да обезбеди земјиште за привремени кампови за погодените од поплавите.

Во источноафриканскиот регион се соочуваат со поплави поради обилните дождови, а во Танзанија се пријавени 155 загинати, додека повеќе од 200.000 се погодени во соседен Бурунди. /МИА

Фудбал

Гвардиола: Арсенал повеќе нема да губи бодови, ние ако ремизираме нема да ја освоиме титулата

Тренерот на Манчестер сити, Пеп Гвардиола изјави дека неговиот тим треба да победи на сите преостанати натпревари доколку сака да ја освои шампионската титула во Англиското фудбалско првенство.

- Мислам дека Арсенал повеќе нема да губи бодови. Ова е слично на ситуацијата со Ливерпул во минатото. Нас ни остануваат уште четири натпревари, пат тежок како да се искачиме на висока планина. Ако негде ремизираме, нема да го освоиме шампионатот, изјави Гвардиола.

Манчестер сити е втор на табелата во Премиер лигата со 79 бодови од 34 натпревари. Лидер е Арсенал со 80 бода по 35 кола.

До крајот на првенството, Арсенал ќе игра дома со Борнмут и со Евертон, а ќе му гостува на Манчестер јунајтед.

Сити ќе го пречека тимот на Вулвс и на Вест Хем, а ќе гостува кај Фулам и на Тотенхем. /МИА

Регион

Над 157.000 Грци се пријавиле за поштенско гласање на евроизборите

Пријавувањето за поштенското гласање започна на средината на февруари, а завршува вечерва на полноќ.

За гласање преку пошта на претстојните европски избори на 9 јуни се пријавиле над 157.000 грчки граѓани, од кои мнозинството, односно 116.000 живеат во Грција, а останатите се од дијаспората, објави грчката новинска агенција АНА-МПА, јави дописничката на МИА од Атина.

Пријавувањето за поштенското гласање започна на средината на февруари, а завршува вечерва на полноќ.

Гласањето преку пошта за првпат ќе се спроведе на претстојните евроизбори, а имаат право да се пријават сите грчки граѓани без разлика дали живеат во земјата или во странство.

Според податоците што ги објави АНА-МПА, интересот за новиот начин на гласање е висок кај сите старосни групи, додека пак од дијаспората се пријавиле граѓани кои живеат во 115 земји,

Грците кои живеат во странство ќе гласаат исклучиво преку поштенско гласање, додека гласачите во внатрешноста на земјата ќе можат да одберат како ќе го остварат правото на глас или на избирачките места како досега или со гласање по пошта.

Избирачкиот материјал, по пошта ќе биде испратен до гласачите на нивната адреса, кои откако ќе гласаат, ќе треба гласачките ливчиња да ги испратат најдоцна до сабота 8 јуни, односно денот пред изборите.

Ковертот со гласачкиот материјал од Министерството за внатрешни работи ќе биде испратен до гласачите најдоцна до 15 дена пред изборите и ќе содржи коверт, гласачко ливче, упатства и сл. /МИА